Silia ma le 10 tausaga e lei toe avea se Tausala Samoa ma Tausale o le Pasefika

O le tausaga fou e atoa iai le 11 tausaga e le i toe faapaleina lava se Tausala Samoa e avea ma tausala a le Pasefika i Saute. Na o le faafa lava ona manumalo Samoa i le pale o le lalelei o le Pasefika.

I le talimalo ai o le atunuu i le sailia o le tausala o le Pasefika i Saute i le faaiuga o le vaiaso na sei mavae atu nei, na faamanatuina ai foi ma le atoaga o le 25 tausaga talu ona faavae mai lenei tauvaga, o se tofa na a’e i taitai o le malo ma amatalia ai i le 1987.

I le manumalo ai o le Tausala mai i Fiti ia Alisi Rabukawaqa i le tauvaga i le po o le Aso Toonai na sei mavae atu i le malae taalo numera tasi i Tuanaimato, o le faa 2 a’i lea ona manumalo o Fiti.

O loo sili pea Rarotonga i le faafitu ona manumalo a latou tausala, sosoo ai Amerika Samoa i le faalima ona pale i le tofiga, Samoa i le faafa, o Tahiti, Niue ma Fiti e ta’i lua, Samoa Hawaii e tasi, Samoa Niu Sila e faatasi, ma Tonga e faatasi foi.

I le tauvaga i le po o le Aso Toonai, e le’i faamanuiaina le tausala a Samoa, le tamaitai o Olevia Ioane i se faailoga. O le tulaga 5 na maua lea e Rarotonga, tulaga 4 o Papua Niu Kini, tulaga lima o Tonga, tulaga 2 o Hawaii ma le Tausala o le Pasefika 2011- 12, o le tamaitai Fiti, na tauaaoina atu ai le pale e le Tausala o le Pasefika ua maea nei lona tofiga, le tausala Rarotonga, le tamaitai ia Joyana Meyer, e iai sona pito Samoa.

O le tauvaga Tausala a le pasefika mo le tausaga fou, o le a tali malo ai Amerika Samoa.