Tausaga mulimuli lenei fa’afoe ai Malisi ta’ito’a 7 fu’a

I le fa’alauiloa aloaia ai i le vaiaso nei o tapenaga a le Kalapu Lakapi a Malisi Sagato Iosefo a Amerika Samoa, o le latou fa’amoemoe mo le faatautaia o le ta’amilosaga ta’ito’a 7 fa’avaomalo o le fu’a o lenei tausaga, ua atagia mai ai fo’i, o le tausaga mulimuli lenei o le a latou toe fa’atautaia ai lenei ta’amilosaga, ona o lea ua manatu le Iuni Lakapi a Amerika Samoa (ASRU), e toe tuuina atu le fa’atautaiga o le ta’amilosaga i lalo o le latou va’ava’aiga.

 

O le tolu ai lenei o tausaga talu ona fa’atautaia e le kalapu a Malisi le ta’amilosaga ta’ito’a 7 lenei o le sisigafu’a a le malo, ma ua lua tausaga sosoo o siamupini ai le kalapu a Vaiala mai Samoa.

 

O se sauniga lotu puupuu sa faia i le Fale Samoa a le Fale’aiga o le Sadies by the Sea i Utulei i le aso Tofi na te’a nei, na tatala aloaia ai loa tapenaga a Malisi mo le ta’ito’a 7 o lenei tausaga, lea ua fa’amoemoe e fa’ataunu’uina i le aso 11-12 Aperila 2014, i le malae taalo o le Veterans Memorial Stadium i Tafuna.

 

Na taua e le tofa a Siigava’a Tauileave Toluono, o le Ta’ita’ifono o le Komiti o tapenaga o le ta’amilosaga o lenei tausaga, ua mafai e le kalapu a Malisi ona latou toe fa’afoeina lenei ta’amilosaga, ona o le lagolago malosi mai a le kamupani a le TMO Family of Companies, lea e aofia ai le TMO Hardware; TMO Wholesale; TMO Windows Plus ma le TMO Beverages, i lalo o le ta’ita’iga a le susuga ia Frank Gaisoa ma lona aiga.

 

E le i mafai e Malisi ona fa’alauiloa i le vaiaso nei le aofa’i o le tupe lea ua tu’uina e le kamupani a le TMO, e lagolago ai le tatala aloaiaina o tapenaga mo le ta’amilosaga ta’ito’a 7 o lenei tausaga, ona o ni isi o mafua’aga tatau.

 

“Pau le itu e fia fa’alauiloa atu i le mamalu o le atunuu faapea le kalapu a Malisi, o lea ua mae’a ona tu’uina mai le fesoasoani tupe mai le kamupani a le TMO, e tatala aloaia ai le tapenaga mo le ta’amilosaga ta’ito’a 7 o lenei tausaga,” o le saunoaga lea a Si’igava’a.

 

E 23 au ua fa’amaonia o le a tausinio i le ta’amilosaga o lenei tausaga, ma o nei au e aofia ai au e 15 mai Samoa ae 8 au mai Amerika Samoa nei.

 

O ‘au e 15 mai Samoa o lo o aofia ai ‘au e lua mai Savaii ma le 13 mai Upolu, lea e aofia le ‘au a Vaiala lea ua lua tausaga sosoo o latou umia le siamupini, faapea ai ma le au malosi a Vailele lea fo’i ua lua tausaga sosoo o la sailia ma Vaiala le siamupini.

 

O le ‘au a Vailele sa siamupini i le ta’amilosaga ta’ito’a 7 a Malisi Sagato Iosefo i Samoa, lea sa faia i le faaiuga o le masina o Fepuari na te’a nei.

 

O ni isi o malo fa’aaloalogia o le a mafai ona auai mai i le taamilosaga ta’ito’a 7 o lenei tausaga e aofia ai laufali e to’atolu a le IRB, e pei o le ali’i mai Fiti ia James Bolabiu, faapea ai alo e to’alua a Samoa le susuga ia Tui Komiti ma Kelekolio Petelo.

 

O isi malo fa’aaloalogia e aofia ai le tofa ia Lemalu Semo Sititi, lea sa avea muamua ma kapeteni o le au ta’ito’a 7 a Malisi, kapeteni i le au ta’ito’a 7 a Samoa, faapea ai ma le taimi na kapeteni ai i le au a le Manu Samoa, aemaise le sui o le Kalapu a Malisi mai Niu Sila, o ia fo’i lea o le Fa’atonu o Atina’e tau Ta’aloga i Niu Sila, susuga Tony Meachen.

 

Na taua e le tofa a Siigava’a e fa’apea, o le taua o le ta’amilosaga ta’ito’a 7 lenei a Malisi, o le a mafai ai e tama ta’aalo mai kalapu lakapi i Amerika Samoa ona maua le avanoa e ta’aalo fa’atasi ai ma isi tama lakapi ua lava lo latou iloa i le ta’aloga, aemaise lava i uso mai Samoa lea o lo o ta’aalo i le au ta’ito’a 7 a Samoa.

 

O le amataga o le tausaga nei na tuuina atu ai e le Ta’ita’ifono o le ASRU se tusi i le Ta’ita’ifono o le Kalapu a Malisi, e fa’ailoa i ai le faaiuga e fa’atatau i le sauni lea o le ASRU e fa’afoe le ta’amilosaga ta’ito’a 7 o le fu’a o lenei tausaga.

 

Ina ua tauaao e le afioga a Toleafoa Isitolo Wulf le tusi a Togiola T. A Tulafono e tusa ai o le fa’aiuga a le ASRU, na talosagaina ai loa e Toleafoa le afioga i le matua ia Togiola e ala i sana tusi sa tuuina atu i ai i le aso 11 Mati 2014, e talosagaina ai se avanoa se tasi e toe faafoe ai e le Malisi le ta’amilosaga ta’ito’a 7 o le fu’a o lenei tausaga.

 

“E fa’aoloolo ma’au atu pea le Mafutaga ma le loto maualalo e ala atu i lau afioga i le ta’ita’ifono, mo se finagalo fa’atamali’i o le tatou Iuni Lakapi, se’i to maia lau pule e fa’aauau ai le ta’ito’a 7 o le sisigafu’a o lenei tausaga, ona o lea ua tele sauniuniga ua maea ona tapena, ma ua tele fo’i ‘au mai fafo ua tali mai i lenei fa’amoemoe,” o se vaega lea o le tusi a Toleafoa ia Togiola.

 

O ni isi o folafolaga sa tuuina atu e Malisi i le ASRU, o le tupe fa’asili e totoe mai i le tapenaina o le ta’amilosaga lenei, o le a tuuina atu uma i le ASRU, e fesoasoani ai i le atina’eina o le lakapi i Amerika Samoa.

 

Ua malilie fo’i Malisi, a mae’a loa le ta’amilosaga ta’ito’a 7 o le tausaga lenei, ona toe tuuina atu loa lea o le fa’atautaiga o le ta’amilosaga mo le fu’a o le tausaga fou 2015 i lalo o le ta’ita’iga a le ASRU, ae o le a tapua’i Malisi ma tali i lagi so latou aso talafeagai e fa’aauau ai pea la latou tautua e ala i atina’eina o le ta’aloga lakapi i le atunuu.

 

I le tusi a Togiola sa tuuina atu ia Toleafoa i le aso 11 Mati 2014, sa fa’aalia ai e Togiola le talia aloaia e le ASRU o le talosaga a Malisi, ina ia tuuina atu le ta’amilosaga ta’ito’a 7 o lenei tausaga latou te faatautaia.

 

“Ua manatu le Fono Faatonu a le Iuni Lakapi a Amerika Samoa, ua talia e le Iuni folasaga uma sa folasia mai e le Mafutaga a Malisi i lau tusi, o le a faapena fo’i ona taoto atu le fa’atautaiga oatoa o le taamilosaga lakapi taitoa 7 o le fu’a o lenei tausaga 2014 i aao o la outou Mafutaga,” o se vaega lea o le tusi a Togiola ia Toleafoa.

 

“Ua manatu le Iuni Lakapi, a aulia  le tausaga fou 2015, ona toe fo’i mai lava lea o le faatautaiga o le taaloga o aso o le fu’a i le vaavaaiga a le Iuni lakapi e pei ona sa masani ai,” o le isi lea vaega o le tusi a Togiola ia Toleafoa.

Comment Here