Ads by Google Ads by Google

TAUNU'U LE FA'AOLATAGA I AUNU’U

E le toe fesiligia e tagata Aunu’u se isi lava fa'afitauli e ono toe fa'alavelaveina ai i latou mai taimi o fa'alavelave fa'afuase’i, ona o lea ua fa'alauiloa aloaia mai le mae'a lea ona fa'atuina le sailini i totonu o le motu, e fesoasoani ai i le tu'uina atu o fa'ailoilo i tagata i so o se taimi e tula'i mai ai ni fa'alavelave fa'alenatura.

O se tasi lenei mata'upu ua tele masina o taumafai mai ai le Matagaluega o le Puipuiga o le Saogalemu Lotoifale (HLS), i le tau sa'ilia lea o se auala e mafai ai ona fa'ao'o atu le sailini mo Aunu'u.

Na o'o lava fo'i i luma o le Fono sa fesiligia pea e le afioga i le ali'i Senatoa ia Fuata Dr.  I’atala atoa ai ma ni isi o faipule mai le maota o sui, po o afea se taimi ma se aso e fa'ataunu'uina ai lenei fa'amoemoe taua mo Aunu'u.

“Ua mae'a ona fa'atuina le sailini mo Aunu'u, ma ua ou iloa fo'i ua o'o mai le fa'aolataga i lenei motu, e fa'afetai atu ai i le malo ma ona ofisa ona o le galuega fita i tuga sa alo atu i ai e le faigofie,” o le saunoaga lea a le afioga i le ali'i Senatoa ia Fuata.

Saunoa Fuata ina ua fesiligia e le Samoa News, o le tulaga lelei i le fa'apipi'ina o le sailini lenei, o le a mafai ai e tagata Aunu'u ona latou iloa tonu le taimi e tula'i mai ai ni fa'alavelave e pei fo'i ona i ai fa'ailoilo ua maua e tagata Tutuila ma Manu’a.

Sa ia faafetaia foi le vaega a le ASPA aua o le latou faatanaga lea na mafua ai ona auina atu vaega o le sailini i luga o le vaa o le Fotu o Samoa ina ua malaga atu i Aunuu.

Na fa'amaonia mai e se sui o le Ofisa o le HLS e fa'apea, o le vaega a le ASPA na faa' faigaluegaina le va'a o le Fotu o Samoa mo le la’uina atu lea o a latou uta i Aunu'u, lea fo'i ua mafai ai loa ona maua le avanoa e fa'ataunu'u atu ai lenei fa'amoemoe taua.

Ua fa'amaonia mai le lelei atoatoa o le sailini, ua mae'a fo'i ona faia le su'ega ma ua fa'amaonia o lo o ola lelei pea lava.

Saunoa le afioga i le ta'ita'i komiti o le Saogalemu Lotoifale a le maota o sui ia Tu'umolimoli Saena Moliga e fa'apea, o le ta'ua o le fa'ao'oina atu lea o le sailini i Aunu'u, ua tula'i mai ai le atoatoa o le galuega sa alo atu i ai le malo, ina ia maua uma e tagata lapataiga ma fa'ailoilo e uiga i ni fa'alavelave e ono tutupu mai.