Ads by Google Ads by Google

Taunuu i Samoa ulua’i fesoasoani Amerika Samoa

O le Aso Sa na te’a nei (taimi Samoa) na taunuu ai i laufanua o Samoa le ulua’i uta o faamomoli mai Amerika Samoa, e fesoasoani ai i nai aiga ua pagatia ona o aafiaga  matautia e mafua mai o le afa o Evan, lea na taia ai Samoa i le aso Lulu na te’a nei.

O le ulua’i uta o faamomoli ua tuuina atu e aofia ai pailate e ono o pusa vai, tolu pailate o lavalava ma pailate e lua mo taumafa faapea ai ma isi mea o lo o manaomia vave e Samoa i le taimi nei.  O lo o aofia ai foi i le uta ni tapoleni, o mea fai kuka atoa ai ma le anoanoa’i o isi mea taua o lo o moomia mai e Samoa.

O lenei foa’i na mafai ona tuu faatasia e le Ofisa o le Kovana Sili i le aso Faraile na te’a nei, i le maea ai lea ona faalauiloa e kovana Togiola Tulafono i sana saunoaga, o le faasilasilaga mo se tasi e fia fesoasoani i aiga i Samoa, ina ia faaoo atu ni a latou faamomoli e  tuu faatasi e lona Ofisa, ona momoli ai lea i le malaga a le Lady Naomi i le faaiuga o le vaiaso na te’a nei.

Na faaaoga e le alii kovana lana polokalame i le faaiuga o le vaiaso na te’a nei, e momoli atu ai faamafanafanaga ma faamaisega i le Ao o le malo o Samoa, afioga Tui Atua Tupua Tamasese Lealofi, le afioga i le alii Palemia, susuga Tuilaepa Lupesoliai Sailele Malielegaoi ma le malo atoa o Samoa, ona o le faalavelave ua pagatia ai Samoa ma maimau ai soifua o ni isi o fanau.

Na taua e Togiola e faapea, e le faapea ua alofa faapito le Atua ma faasao Amerika Samoa ae pagatia na o Samoa i Sisifo i le afå, peitai i lona talitonuga, atonu ua avea le faasaoina mai o Amerika Samoa mai lenei faalavelave faalenatura ma itu e momoli atu ai sa tatou fesoasoani mo aiga mafatia i Samoa.

Na maua se avanoa e talanoa ai le alii kovana ma le palemia o Samoa i luga o le telefoni i le afiafi o le aso Faraile na te’a nei, ma faailoa mai ai e le alii palemia tulaga pagatia ua i ai Samoa, faapea ai ma manaoga i le fia maua lea o se suavai mo i latou.

I ni ripoti mai Samoa o lo o taua ai e faapea, o le tele o nofoaga sa faaputu ai faatanoa vai mo le atunuu atoa, ua faaleagaina uma i le malolosi o tafega ma lologa, e oo lava foi i ogapaipa tetele sa ta’i ai le suavai i nofoaga eseese i le atunuu, ua motusia uma  ma faaleagaina ona o le tetele o tafega.

I le taunuu mai ai o le talosaga mo se fesoasoani mai Samoa i le alii kovana, ua ia manatu ai loa, o le a avea lona Ofisa e fai ma nofoaga autu e taunuu uma atu ai faamomoli mai le atunuu, i soo se tasi e fia fesoasoani i aiga mafatia i Samoa.

Ua tofia ai foi e le alii kovana le susuga Motu Seui e faauluulu i ai le Ofisa mo le faamaopoopoina o fesoasoani e maua atu i le atunuu. O le numera o le Ofisa pe afai e fia fesootai i ai se tasi mo sana fesoasoani o le 633-5161.

Na faafetaia e le alii kovana i latou uma na mafai ona ofoina atu a latou fesoasoani e pei o pusavai, pusa meaai, lavalava ma isi oloa ia ua auina atu i le uta o faamomoli mo Samoa, o lo latou tali vave mai i le taimi na faatagisia ai se fesoasoani mo nai uso i Sisifo, peitai o lana talosaga i le atunuu atoa, o ai lava e fia fesoasoani mo Samoa, ia faaoo uma atu a latou fesoasoani i le Ofisa o le kovana i lenei vaiaso ma fuafua ai loa le uta lona lua mo Samoa.

O ituaiga oloa o lo o manaomia e Samoa i le taimi nei e aofia ai faguvai, o meaai tuuapa ona o lea ua motusia le eletise, o lavalava mo aiga ua leai ni fale e nonofo ai, faapea ai ma faleie ma oloa e fai ai kuka.

Ua maea foi ona fesootai atu le alii kovana i lona Ofisa i Honolulu, mo le faamaopoopoina o ni fesoasoani e maua mai i tagata Samoa o lo o aumau i le setete o Hawaii, pe afai o lo o i ai le lagona e fia fesoasoani mo nai uso i Samoa.

Na taua e Togiola e faapea, ua maea ona ia talosagaina le fesoasoani a le vaega o le Militeli a le malo tele o Amerika, atoa ai ma le Ofisa o le Coast Guard i Hawaii, mo se avanoa e faaaoga ai a latou vaalele e faaoo mai ai iinei faamomoli e maua ane i Hawaii, ina ia mafai ai ona tuu faatasia uma fesoasoani ua fuafuaina mo Samoa.

Ua maea foi ona faia sa latou fesootaiga ma le Peresetene o le Senate atoa ai ma le Fofoga Fetalai o le Maota o Sui, o le Fono Faitulafono a le atunuu, mo se auala e talanoaina ai se fesoasoani tupe a Amerika Samoa e tuu sa’o atu mo Samoa.

E le gata i lea, afai ae manaomia mai e Samoa ni tagata e avatu i Amerika Samoa nei e fesoasoani i le faamamaina o mea ua faaleagaina, e manaomia foi se tupe e faatupe ai le auina atu o i latou nei i Samoa.

Ma le vaega mulimuli e pei ona saunoa Togiola, ua ia saunia se poloaiga e faataga ai ona tuua e tagata sitiseni uma o Samoa o lo o galulue i totonu o le malo o Amerika Samoa a latou galuega mo le lua vaiaso, ae malaga atu e asi o latou aiga ma fesoasoani i le tulaga pagatia ua feagai ma i latou, pe afai e manaomia le fia malaga o i latou nei i Samoa.

Fai mai Togiola, e ui lava i manatu o ni isi fai mai, e le tatau ona aapa mai Samoa o le malo tutoatasi ia Amerika Samoa o le teritori, peitai i lona talitonuga, e sili atu ona mamafa i lona manatu le va faa Samoa nai lo tulaga faavaomalo, aua o Samoa i Sisifo ma Sasa’e nei e le o ni faigamalo, a’o le uso ma le aiga