Ua i luma nei o le Fono Faitulafono isi tofiga a le alii kovana, mo ni isi e avea ma taitai o Ofisa ma Matagaluega a le malo, faapea ai totino o Komiti Faafoe e aofia ai Douglas Fiaui e avea ma Loia Fautua mo Tagata Lautele, Fagafaga Daniel Langkilde e avea ma Faatonusili o le Ofisa Faasalalau a le KVZK-TV, Matautu Foma’i Peter Tinitali e avea ma Faatonu Ofisa Puipuia i latou aafia gasegase o le mafaufau, faapea ai ma Frank Gaisoa, Sherry Butler, Rev. Aneterea Misioka, Meotului Sipili Fuiava ma Fred Memea e avea ma totino o le Komiti Faafoe Ofisa Femalagaaiga.

I se vaega o le tusi a le alii kovana i taitai o le fono o lo o ia taua ai e faapea, o le alii loia ia Fiaui ua lava lona tomai e faatino ai galuega faaloia.

I le fa tausaga talu ai, sa galue ai Fiaui i le Ofisa o loia fautua mo le alii kovana ua mavae atu, ma maua ai lona avanoa e galue ai i le faamaopoopoina o tulafono, aemaise ai o le malamalama i gaioiga faaloia i le malo.

O ni isi o mataupu sa galue ai o ia e aofia ai ni isi o pili mo suiga o tulafono, o le faatulagaina o faafinauga mo tagi faasaga i le malo, atoa ai ma le tele o isi tiute faaloia.

Ao lei galue o ia i le ofisa o le kovana, sa avea muamua o ia ma Loia Fautua lagolago mo tagata lautele i le tele o tausaga.

Mo le tofa Fagafaga, na taua ai e le alii kovana, ua silia ma le 29 tausaga o galue i lenei ituaiga matata, ma ua lava lona silafia ma le tomai e faatino ai ona tiute.

E tele galuega sa mafai ona fesoasoani i ai Fagafaga mo le manuia o le atunuu mo le tele o tausaga ua mavae. Sa amata galue o ia mo mataupu tau faasalalauga ma avea ai o ia ma pule i le Radio Samoa - WVUV. O isi o ona tiute sa galue muamua ai e aofia ai le galue i le vaalele o le Pan Am, sa avea o ia ma faipule mo le itumalo o Ituau mo nofoaiga e lua i le maota o sui, sa avea foi o ia ma pulesili o le kamupani telefoni a le Blue Sky, atoa ai ma le avea pule o le Malama TV.

E tele isi agavaa na taua e le alii kovana sa mafai ona ausia e Fagafaga, ma ua talitonuina ai le lava o lona tomai e faatino ai tiute e pei ona tofia i ai o ia i le taimi nei.

Na faaiu le tusi a Lolo i taitai o le fono, ina ia tuuina atu la latou lagolago ia Fagafaga i le avea lea o ia ma taitai o le Ofisa Faasalalau a le atunuu.

Na taua e Lolo i lana tusi i taitai o le fono e faatatau ia Tinitali e faapea, o le alii foma’i ia Tinitali ua silia ma le 39 tausaga o galue i le matata lenei, o lo o ia umia foi faailoga maualuluga mai aoga ma Iunivesite sa aoaoina ai o ia e faatatau i matata o lo o galue ai.

O le tele o tausaga o lana auaunaga sa galue ai i le Ofisa o Aoga mo le vaega o aoaoga faapitoa, lea foi sa ia maua ai le avanoa e aoaoina ai faiaoga i auala e tausia lelei ai fanau o lo o aafia i gasegase o le mafaufau.

Na taua e Lolo e faapea, o le filifilia o Tinitali i lenei tofiga, o le a mautinoa le faamanuiaina ai o lea foi auaunaga a le malo mo le atunuu.

Ae mo le toalima ua tofia e avea ma totino o le Komiti Faafoe o Femalagaaiga, na taua ai e le alii kovana i lana tusi i taitai o le fono e faapea, o Gaisoa ma Sherry, o i laua o ni tagata faipisinisi iloga i le atunuu, o lo o la faa faigaluegaina foi ni tagata e toatele i la galuega.

O Rev. Misioka o se faifeau faaaloalogia o le Ekalesia Faapotopotoga Kerisiano i Amerika Samoa, o lo o avea ma Feagaiga a le Ekalesia i Amanave.

O Moetului sa galue mo le silia i le 40 tausaga i le malo tele, ma ua toe taliu mai o ia i le atunuu ua litaea, ma le susuga Fred ua tele tausaga o galue i le malo o Amerika Samoa, sa avea foi o ia ma faatonusili o le matagaluega o Tagata Faigaluega a le malo mo se vaitaimi, ao lei malolo litaea o ia i le taimi nei.

Ua i ai le faamoemoe o se taimi o lenei vaiaso o le a tuuina atu ai isi tofiga a le kovana i luma o le fono faitulafono.