O le taeao ananafi na fofogaina ai i luma o le senate ma le maota o sui faasea faasaga i ni isi o pisinisi ma faleoloa o lo o pulea e tagata Asia, ona o faaletonu o lo o maitauina i taumafa o lo o faatau atu i le mamalu o le atunuu lautele.

O le afioga i le alii senatoa ia Faagata Mano na faaleoina le faasea i luma o le senate a’o le afioga i le alii faipule ia Vaamua Henry Sesepasara na faaleoina le faasea i luma o le maota o sui.

Na taua e Faagata e faapea, o le po o le Aso Gafua na te’a nei na faanatinati atu ai se tasi o lana fanau i le falema’i i Fagaalu, ina ua ‘ona i le meaai lea e taua o le ‘sushi’ o lo o tele ina gaosi ma faatau i faleoloa.

Fai mai Faagata, ina ua taunuu lona atalii i le falema’i, e to’atasi le isi tamaititi o lo o taofia ai, na avatu fo’i i le faafitauli lava fo’i lea e tasi, o le ‘ona i le ‘sushi’, ae ina ua maea mai togafitiga a lona atalii pe tusa o le 12:30 i le vaveao, na maua ai le tala mai foma’i, ua oo atu i le to’afitu fanau laiti na faanatinati atu i le falema’i i le po lava lea ona o le faafitauli e tasi.

Ina ua fesiligia e le Samoa News na saunoa ai le alii senatoa e faapea, e tatau i le matagaluega o le soifua maloloina ona mataalia i faleoloa o lo o faatau ai meaai eseese, ina ia mautinoa, a te’a loa le 5:00 i le afiafi o meaai uma o lo o totoe, e tatau ona lafoa’i aua ne’i toe faaaogaina, aua o isi taimi e toe faafana e le au faipisinisi meaai nei mo le isi aso.

“Pau lava le itu taua i tagata Asia nei o le maua o a latou tupe, a’o se upu i le popole i le soifua maloloina o le atunuu, e misi atoa,” o le saunoaga lea a le alii senatoa.

Sa talosagaina e Faagata ia le komiti o le Falema’i a le Soifua Maloloina a le maota, ina ia faatulaga se iloiloga e fesiligia ai le Matagaluega o le Soifua Maloloina e uiga i lenei mataupu.

I luma o le maota o sui na saunoa ai Vaamua e faapea, ua faailoa atu e ni isi o lona itumalo ia te ia ni isi o faaletonu sa latou maitauina i se tasi o faleoloa o lo o pulea e tagata Asia i totounu o Pago Pago, i le le saogalemu o auala o lo o taulimaina ai taumafa mo le atunuu.

Na taua e Vaamua e faapea, o pusa moa atoatoa ia o lo o faatau mai e faleoloa laiti mai faleoloa siiatoa, e avatu ona tatala lea o le pusa moa atoa ae faataape vaemoa pe ta’i fa pe ta’ilima i totonu o tama’i taga pepa laiti ona toe faatau atu lea i le atunuu.

O le popolega e pei ona taua e le alii faipule, e faaaoga e tagata Asia samala e talepe ai pusa moa, o isi foi taimi e togi ai i luga o le sima ina ia nuti ma matala le aisa, ma e foliga mai e le o saogalemu le auala o lo o faatinoina ai lea gaioiga.

E oo foi i taga alaisa lapopo’a o lo o faatau e faleoloa laiti mai i faleoloa siiatoa, o lo o vaaia le faaaoga o taga pepa iila e utu i ai alaisa ina ia mafai ai ona laiti ma faigofie ona faatau atu i le atunuu, ae o le faafitauli, o fatu alaisa e toulu i lalo o le fola o le fale i le taimi e utu ai taga pepa alaisa, e toe salusalu uma e le faatauoloa ma toe tuu i totonu o le taga pepa iila ma toe faatau atu i le atunuu.

“E le o popole tagata Asia nei i le soifua maloloina o le tatou atunuu, pau lava le itu e taua ia i latou, ia maua a latou tupe ma ia taulia a latou oloa,” o le saunoaga lea a Vaamua i luma o le maota.

Saunoa le fofoga fetalai ia Savali Talavou Ale, e manaia foi le mataupu pe afai ae maua atu tagata o le nuu a le alii faipule e fai ma molimau i lenei faaletonu.  Sa ia talosagaina le komiti o le falema’i ma le soifua maloloina a le maota ina ia silasila toto’a i lea faaletonu.

Na taumafai e saili mai se faamatalaga mai le vaega o le Soifua Maloloina o lo o asia faleaiga ma faleoloa e faatatau i lenei mataupu, peitai e le’i manuia.

Ae na taua e se tagata faigaluega e le faatagaina ona talanoa i mataupu faapenei, o lo o faagasolo pea lava asiasiga a le Matagaluega i faleaiga ma faleoloa ina ia mautinoa, o lo o usitaia ma tausisi i tulafono e faatatau i le saogalemu o mea taumafa o lo o faatau atu i le atunuu.