Ads by Google Ads by Google

Taunu’u vala’aulia mo le Sisiga Fu’a a Samoa

Lua fautasi, tasi se ‘au kirikiti ma afioaga e lua mo fa’afiafiaga

Na fa’amaonia mai e le Ta’ita’ifono o le Komiti o Tapenaga o le Fu’a a le malo o Samoa Tuto’atasi, o ia foi o le Minisita o le Matagaluega o Tina ma Atina’e, le afioga Tolofuaivalelei Falemoe Leiataua i se talanoaga ma le Samoa News i le taeao ananafi i luga o le telefoni, ia le vala’auliaina o ni fautasi se lua a Amerika Samoa, e tauva i le tu’uga fautasi o le fa’amanatuga o le 50 tausaga o Samoa i le masina o Iuni.

Na saunoa Tolofuavalelei e faapea, ua maea ona faaoo mai i le Ofisa o Mataupu Tau Samoa a le malo o Amerika Samoa, ia le valaaulia mo ‘au malaga mo le fu’a a le malo o Samoa, ma o valaaulia na tuuina mai o loo aofia ai nuu e lua o le a malaga atu e faafiafia, tasi le au kirikiti faapea ai ma fautasi e lua.

“Ua manatu le komiti e valaaulia atu le siamupini o le tuuga fautasi a Amerika Samoa i lana fu’a o le tausaga lenei, atoa ai ma le fautasi e tulaga lua,” o le saunoaga lea a Tolofuavalelei.

O fautasi e lua ia ua valaaulia mai e le malo o Samoa, e le o aofia ai le fautasi o i ai fausaga faaonapo nei, lea ua tele ina i ai fautasi a nisi o afioaga i le atunuu.  Ae o lo o talosagaina mai i totonu o le vala’auia ia fautasi o lo o fausia i fausaga faa Samoa, e pei o le Satani II mai i Nu’uuli, o fautasi ia ua manatu le komiti o le fu’a a Samoa e faaaoga i le tuuga.

“Pau le tulaga ia manino i le faafofoga a Amerika Samoa, ua manatu le komiti e faataua fausaga o fautasi sa amata mai ai tuuga a Samoa i lana ulua’i tuto’atasi i le 50 tausaga talu ai, o le ala lea ua manatu ai, e na o le tasi lava le tuuga fautasi o le fu’a i lenei tausaga, e na o le tuuga fautasi lava mo fautasi o loo fausia mai i fausaga Samoa, e le faaaogaina fo’i ni foe sipuni, ae faaaoga lava foe Samoa,” o le saunoaga lea a Tolofuavalelei.

Saunoa le alii Minisita e faapea, e lei faia lea faaiuga a le komiti ona o le manatu e taofi fausaga fou o fautasi ia ua faaaoga i Amerika Samoa nei, ae ona o le manatu ia toe faataua ituaiga vaa sa folau mai ai Samoa i tausaga ua mavae, atoa ai ma auala na soifua mai ai tuaa i ulua’i tausaga o lana sisigafu’a.

O le valaaulia mai Samoa e pei ona saunoa Tolofuavalelei, na tuuina mai i le Ofisa o Mataupu Tau Samoa a’o lei faamanatuina le fu’a a le teritori i le vaiaso na te’a nei, ma ua i ai le manatu o le tofia o fautasi e tali i le valaaulia, ua taoto atu lea i le Ofisa o Mataupu Tau Samoa.

E le’i manuia taumafaiga a le Samoa News i le Sui Failautusi o le Ofisa o Mataupu Tau Samoa, le tofa Nanai Afuola e tusa ai o lenei mataupu, pe ua i ai ni fautasi ua manatu le Ofisa e tofi e fai ma sui o Amerika Samoa, pe faaauau pea ona malaga le vaa na mua ma le tulaga lua.

E ese mai ai i fautasi ia ua valaaulia mo le faamoemoe a Samoa, e lua afioaga ua valaaulia e faafiafia i siva ma pese faaleaganuu, lea e aofia ai Aasu ma Alataua.

Saunoa Tolofuavalelei, o Aasu o le a faatinoina le siva faaleaganuu, ae o le itumalo o Alataua o le a tapena mo le pese faaleaganuu.

Ua faapea foi ona valaaulia e le komiti le au kirikiti a alii mai Vatia lea na avea ma siamupini o le taamilosaga o le fu’a 2011 e fai ma sui o Amerika Samoa, i le sailiga o le siamupini o le taaloga kirikiti i le aso o le fu’a.

Na taua e se sui o le afioaga o Pago Pago ina ua fesiligia e le Samoa News pe o i ai se faamoemoe e malaga i le fu’a a Samoa, o lo o faatali le afioaga i se valaaulia mai Samoa pe mananao e alu atu le Aeto e tauva i le tuuga fautasi o le fu’a.

O le Aso Toonai, 2 Iuni ua faatulaga e faia ai le tuuga fautasi mo le sisiga fu’a a Samoa.