Taunu’u i le Fono tofiga fou a le kovana e sui ai tofiga ua teena

E tolu isi tofiga fou a le kovana ua mae’a ona tu’uina atu i luma o le fono faitulafono i le vaiaso na te’a nei, lea e aofia ai ma le tofiga e tasi e sui tulaga ai lana ulua’i tofiga ua le pasia e le Fono Faitulafono.

 

O tofiga fou a le kovana e aofia ai lona tofia o le susuga a Tuala Mike Sala e avea ma totino o le Komiti Fa’afoe o le Ofisa o Femalagaaiga, atoa ai ma le tofiaina o le afioga i le alii Senatoa ia Galea’i M. Tu’ufuli faapea ai ma le afioga i le sui fofoga fetalai ia I’aulualo Fa’afetai Talia e avea ma totino o le Komiti Fa’afoe o Pulega o Atina’e ma le Tamaoaiga a le malo.

 

O le isi tofiga e aofia ai le tofia o le faletua ia Etenauga Lutu e avea ma totino o le Komiti Faafoe a le Falema’i o le LBJ, e sui tulaga ia Leiataua Leauga Turner na teena e le Fono i le masina na te’a nei.

 

Na taua e Lolo Matalasi Moliga i sana tusi i ta’ita’i o le fono i le aso 9 Setema, 2013 e faapea, ua ia tofia le faletua ia Lutu e fai ma sui o le tina ia Turner sa le’i pasia e le Senate.

 

I le fa’amatalaina o le soifua galue o le faletua ia Lutu na taua ai e Lolo e faapea, o Lutu o se tama’ita’i tausima’i ua lesitalaina, sa tu’uina atu lona soifua atoa e tautua ai le atunuu i le maota gasegase, sa tofia e avea ma fa’atonusili o ali’i ma tama’ita’i tausima’i, ma o le taimi nei ua malolo litaea o ia.

 

“O lona tomai i galuega fa’afoma’i ua ou manatu ai ua talafeagai le tofiaina o ia e avea ma sui o lenei komiti,” o se vaega lea o le tusi a Lolo i ta’ita’i o le fono.

 

Na taua fo’i e le alii kovana e faapea, e le gata e malamalama lelei Lutu i fa’agaioiga o galuega a le falema’i, ae na te silafia lelei fo’i lu’itau o lo o feagai ma le au tausima’i, ma o ia tulaga uma o le a mafai ai ona ia fesoasoani e foia ni isi o fa’afitauli o lo o tula’i mai i totonu o le falema’i mai le tele o tausaga ua mavae.

 

Na fa’ai’u le tusi a Lolo i lona talosagaina lea o ta’ita’i o le fono, ina ia vave iloilo ma fa’amaonia le suafa o Lutu, ina ia maua ai le avanoa e fa’aaoga ai lona tomai e tautua ai le atunuu e ala i le komiti a le falema’i.

 

I le tofiaina e le kovana o Sala e avea ma totino o le Komiti Faafoe a le Ofisa o Femalagaaiga, na taua ai e Lolo e faapea, ua ia tofia Sala e galue i le Komiti lenei e sui tulaga i le afioga ia Moetului Sipili Fuiava ua fa’amavae mai le avea ma totino o le komiti, ina ua ia taliaina se galuega i totonu o le malo o Amerika Samoa.

 

Na faailoa e Lolo i se vaega o lana tusi i ta’ita’i o le fono lona fiafia tele, ina ua talia e Sala le tofiaina o ia e avea ma totino o le komiti, ma o le a fa’aaoga i ai lona agava’a i tulaga tau tulafono e fesoasoani ai i galuega a le komiti.

 

E silia i le 40 tausaga o galue Sala mo le malo, e aofia ai ma tausaga e tele sa avea ai ma fa’atonu o le Matagaluega o le Saogalemu Lotoifale. Sa i ai taimi na avea ai o ia ma komesina le tumau a le ofisa o leoleo i ni isi o tausaga.

 

Na taua e Lolo e faapea, o le tomai o Sala i tulaga tau femalagaaiga ma le fa’amalosia o mataupu tau tulafono, ua ia talitonu ai o le a avea o ia o se tasi o sui taua o le komiti.

 

Ae mo tofiga a le kovana mo Galea’i ma I’aulualo, na taua ai e Lolo e faapea, o le umi lava e avea ai i laua nei ma senatoa ma faipule, o le umi fo’i lea e avea ai i laua ma totino o le komiti o Atina’e ma le Tamaoaiga a le malo.

 

Saunoa Lolo e faapea, o Galea’i ma I’aulualo ua lava lo la tomai i mataupu faalemalo aemaise ai o mataupu e a’afia tele ai le tamaoaiga o le teritori.

 

O Galea’i e le gata sa galue i le malo ae sa i ai fo’i taimi na tautua ai i kamupani tua, na te silafia lelei manaoga i le teritori, ae o I’aulualo, e le gata sa avea ma teutupe lagolago a le malo ae sa avea fo’i ma fa’atonu o le matagaluga o Auaunaga mo le Soifua Manuia o Tagata Lautele, e lava fo’i lona tomai i tulaga tau tupe.

 

O le vaiaso nei lea ua fa’atulaga e maota e lua latou te iloiloina ai ni isi o tofiga nei a le kovana, a’o le’i alo atu le fono mo lana malologa umi i le faaiuga o le masina nei.

 

Comment Here