O lo o faaauau pea ona galulue malosi le Matagaluega o Fa’atoaga mo le sailia o auala e foia ai fa’afitauli o lo o tula’i mai i ni isi o le aufai fa’atoaga faapea ai a latou fa’atoaga i le atunuu, e pei ona fa’amaonia mai e le Fa’atonusili o lea Matagaluega, le tofa Lealao M. Purcell i le Samoa News.

O ni isi o taumafaiga o lo o galulue i ai le ofisa e faaleleia e aofia ai le sailia o ni isi nofoaga lelei e toto ai fa’atoaga a ni isi o le aufai fa’atoaga, lea o lo o faia a latou fa’atoaga i fanua e latalata i le nofoaga o lo o lafoa’i ai le lapisi i Futiga.

“O isi a matou fuafuaga o lo o faatulaga o le faia lea o auala uma ina ia mautinoa e usitaia e le tagata fai faatoaga tulafono mo le saogalemu o ia aemaise ai o le fa’atoaga, e pei o le mama o le nofoaga e nofo ai le fai faatoaga, aemaise ai fo’i o le mama o le fa’atoaga,” o se vaega lea o le saunoaga a Lealao ina ua fesiligia e le Samoa News i lenei mataupu.

E le fou le mataupu e faatatau i faaletonu o lo o tula’i mai i ni isi o le aufai faatoaga, ma fua o a latou faaeleeleaga o lo o faatau atu i le polokalame a le School Lunch, e pei ona saunoa Lealao.

Sa ia taua e faapea, ua tele faasea mai ni isi o le atunuu atoa ai ma aoga e faatatau i fua o faaeleeleaga o lo o la’u atu i le school lunch, ma faia ai loa le faaiuga ina ia taofia le toe faatau atu e ni fai faatoaga se to’alua o fua a laua fa’aeleeleaga i le school lunch, se’i vagana ua faaleleia vaega ua fautuaina i laua e tatau ona fai.

“O ni isi o suiga ua matou galulue ai ma le Ofisa o le School Lunch atoa ai ma le Matagaluega o le Soifua Maloloina mo le faaleleia o le polokalame lenei, o le taumafai lea e faaaoga atigi pusa po o ato lalaga e fu’e i ai fua o faaeleeleaga pe a faatau atu i le shool lunch, ae aua nei toe faaaogaina taga pepa ina ia mautinoa e saogalemu le tino o le fualaau aina pe a taunuu atu i le aoga po o le nofoaga o lo o faamoemoe e ave i ai,” o le isi lea saunoaga a Lealao.

Ina ua fesiligia e le Senate le tofa a Lealao i le masina na te’a nei e tusa ai o faaletonu o lo o alia’e mai i ni isi o le aufai faatoaga, sa ia taua ai le tapunia e le latou ofisa o faatoaga se tolu ina ua latou maua e le o tausisia e i latou nei tulafono e tatau ona faia.

Ae o le taimi nei e pei ona saunoa Lealao, o lo o faaauau pea ona latou tulimata’iina fa’atoaga na latou tapunia ina ia mautinoa latou te ausia vaega uma sa faatonuina, e pei o le mautu lea o fale e nonofo ai tagata fai faatoaga mai Asia o lo o galulue e toto fualaau aina, ma ia mautinoa foi e mama vaega uma o le siosiomaga o lo o toto ai le faatoaga.

“O ni isi o mafuaaga e ala ai ona matou tapunia faatoaga, o le faapaepae solo lea o atigi fagu vailaau o lo o fana ai le faatoaga i tafatafa o laau toto, a le o lena fo’i, o le fu’e o fualaau aina i totonu o ato ma atigi pusa i tafatafa o atigi fau vailaau, e aunoa ma le aveina i se nofoaga saogalemu e teu ma fu’e ai,” o le saunoaga fa’ai’u lea a Lealao.