Ads by Google Ads by Google

TAUMAFAI FAO FA’AMALOSI TUPE A SE FAFINE NA MATAPOGIA

O le ula lea na ia tu’iina se fafine ma matapogia ai, ona taumafai lea e gaoi se taga sa ia masalomia o lo o i ai ni tupe i totonu, ua taofia nei i le falepuipui i Tafuna e faatali ai le isi ana iloiloga lea ua faatulaga e faia i le vaiaso fou i luma o le Faamasinoga Faaitumalo.

O lea faalavelave na tulai mai i luma o le Faleoloa o le Tutuila Store i Nuuuli i le aso Faraile, 21 Tesema, a’o pisi ai le atunuu i faatauga mo le Kerisimasi na te’a nei.

O le alii ua molia e le malo i lenei mataupu o Michael Falaniko, o se alii e lei leva ona sau mai le aai o Utah i Amerika e asiasi mai i lona aiga i Amerika Samoa nei, e le faigaluega e maua ai sana tupe, ma ua avea ai lea tulaga ma itu ua faaletonu ai lona mafaufau, ma lagona ai lona toe fia fo’i i lona aiga i Utah, e pei ona ia faailoa i leoleo ina ua fesiligia o ia.

O lenei mataupu na tofu atu i le Ofisa o Leoleo i Tafuna, pe tusa o le itula e 5:00 i le afiafi o le aso 21 Tesema, ina ua valaau e se molimau sa i ai i le taimi na tupu ai le faalavelave se fesoasoani a leoleo, ina ua ia vaaia le tu’i e Falaniko o se fafine sa ofo mai i fafo o se taavale a le kamupani telefoni o le BlueSky ma taatia ai i lalo ua matapogia.

Na taua e le molimau i leoleo e faapea, e fetaui lava le oso mai i fafo o le tamaitai na aafia mai le taavale o le a savali atu i le fasitepu o le faleoloa o Tutuila, ae ona vaaia loa le agai atu o Falaniko ma tu’i ona foliga ma pau ai i lalo ua matapogia.

Na taua e le molimau lona vaaia o lima o Falaniko ua o solo i le taga o le ofu a le tamaitai o lo o fai, atoa ai ma lona taumafai e gaoi se taga sa uu i le lima o lea tamaitai, e foliga o se taga e teu i ai ni teugatupe sa faia i le faletupe.

E lei manuia taumafaiga a Falaniko i le taumafai lea e fao faamalosi mea totino a le fafine o lo o taatia, ina ua oso atu le molimau faatasi ai ma ni tagata sa tutu ai i le taimi lea ma fai loa a latou tuliga.

O le tama a le molimau na faaauauina le tuliga o le alii faomea, peitai e lei maua ina ua sola mamao i le auala o lo o ui atu i tua o le faleoloa o le Family Mart i Nuuuli.

Na taunuu leoleo ma o latou sailia loa le nofoaga na ui agai i ai le ua molia, ma o latou maua atu ai o ia, ona faatonuina loa lea o ia latou te o i le ofisa mo suesuega peitai sa musu le ua molia.

Na toe faatonu e leoleo le ua molia e usitai i faatonuga ma savali i le taavale a leoleo, peitai sa faaauau pea le musu o le ua molia, ma i’u ai loa i le fetagofi atu o leoleo ua sii le ua molia i luga ma amo i le taavale ma momoli atu ai loa o ia i le ofisa o leoleo mo suesuega.

Ina ua fesiligia e leoleo sa taua ai e Falaniko e faapea, o ia na malaga asiasi mai i le teritori mai Utah, e le faigaluega e leai foi sana tupe o maua, o le mafuaaga lea ua le mautonu ai lona mafaufau, ma oso ai loa lagona o le toe fia foi i lona aiga i Utah.

Sa ia faamaonia i leoleo e faapea, ina ua ia vaaia le fafine ma se taga e teu ai tupe o lo o uu i lona lima, sa oso a’e loa le manatu ia te ia na te osofaia le fafine, o lea na ia alu atu ai ma tu’i le fafine ma pau ai i lalo, ma amata ai loa ona tago ona lima i taga o lona ofu poo i ai se tupe peitai e lei manuia ana taumafaiga.

E tolu moliaga ua faila e le malo faasaga ia Falaniko ina ua tulai i luma o le faamasinoga faaitumalo i le taeao ananafi.

O ia moliaga e aofia ai moliaga mama e lua o le faaoolima i le tulaga tolu ma le tetee atu i leoleo ao taumafai e taofi faapagota o ia, faatasi ai ma le moliaga mamafa e tasi, o le taumafai e fao faamalosi meatotino a se tagata i le tulaga lua, lea e mafai ona faasala ai se tasi i le toese mo le umi e le silia i le 7 tausaga, pe faasala foi i se salatupe e le silia i le $5,000, poo le faasala foi i faasalaga uma ia e lua.

Ae o moliaga mama e lua o le faaoolima i le tulaga tolu ma le tetee i leoleo ao taumafai e loka faapagota se tasi, e mafai ona faasala ai se tasi i le toese mo le umi e le silia i le tausaga atoa, poo le faasala i le salatupe e le silia i le $1,000, pe faasala foi i faasalaga uma ia e lua.

E $20,000 le tupe ua faatulaga e le faamasinoga e totogi ona faatoa mafai lea ona tatala le ua molia i tua, peitai afai e mafai ona tatala i tua, ua faasa ona ia toe alu pe latalata i le faleoloa o Tutuila i Nuuuli i soo se taimi, pe toe taumafai foi e faafesootai le tamaitai na aafia i lenei mataupu, poo molimau foi a le malo.

Ua faasa ona ia toe soli se tulafono, pe taumafai e sola ese ma le atunuu, a ia tuuina atu lona tusi folau e taofi e le ofisa o le loia sili, sei maea lana mataupu ona toe tuuina atu lea ia te ia.

O le vaiaso fou lea ua faamoemoe e toe tulai ai le ua molia i luma o le faamasinoga, mo le faatulagaina lea o le aso e faia ai lana uluai iloiloga.