O le tama lea o loo loka i le toese i Tafuna ona o tu’uaiga i lona fa’amalosia lea o lona to’alua la te faiaiga, fa’apea ai ma lona taumafai e taofi fa’apagota o ia i se auala sese, sa ia faailoa i le fa’amasinoga maualuga e fa’apea, o ia sa taumafai e fa’atonu lona to’alua ina ia taofi ana amioga fa’asotoma o lo’o fai, ae ua avea ma auala ua loka ai o ia i le falepuipui.

“Ou ke iloa o le kulafogo a le kakou malo e kakau ga koe suia iga ia mafai ai oga fa’amagigo ikuaiga makaupu fa’apegei,” o le finau atu lea a lenei alii i alii faamasino sa iloiloina lana mataupu, lea e aofia ai le afioga i le faamasino sili lagolago ia Lyle L. Richmond, ma le afioga i le alii faamasino lagolago ia Mamea Sala Jr.

I le tumau ai pea o le tete’e o lenei ali’i i tu’uaiga a le malo fa’asaga ia te ia, ua fa’atulaga ai loa e le fa’amasinoga le aso 12 Setema e fa’ataunu’u aloaia ai le fa’amasinoga autu o lenei mataupu.

O ali’i o loo molia, lea e le o mafai ona fa’ailoa lona suafa ona o puipuiga lava i le ono mafai ai ona iloa ma lona to’alua, o loo tuuaia i moliaga mamafa e aofia ai lona fa’amalosi o lona toalua la te faiaiga, taumafai e ave fa’amalosi o ia faapea ai ma lona tagofia o ona itutinosa, ma le moliaga mama o lona taofia fa’apagota lea o ia i se auala fa’asolitulafono.

O le vaiaso i ona tua atu na sainia ai e lenei alii sa latou maliliega ma le malo, lea na talosaga ai le malo i le fa’amasinoga ina ia talia suiga ua latou toe faia i moliaga fa’asaga i lenei alii.

O le maliliega sa tu’uina atu i le fa’amasinoga sa taua ai le sauni o lenei alii e tali ioe i le moliaga lona tolu lea na toe suia e le malo, o lona tagofia lea o itutinosa o lona to’alua, fa’apea ai ma lona tali ioe i le moliaga lona lua o lona taumafai e ave fa’amalosi se tagata, ae solofua le moliaga e pito sili ona mamafa o le faiaiga fa’amalosi ma le moliaga lona fa o lona taofia faapagota o lona toalua i se auala sese.

Ae ina ua fesiligia e le faamasinoga le ua molia pe na te ioeina moliaga faasaga ia te ia, na tali le ua molia, “leai”, na te le’i faamalosia lona to’alua, ae sa taumafai e fautua i ai ina ia taofi ana amioga faasotoma o loo faia.

O le vevesi i le va o le ua molia ma lona toalua na afua mai ina ua masalomia e lenei alii o loo i ai se faanunumi a lona toalua ma se isi tamaloa o loo fai, o lea na alu ai loa i le fale faigaluega a lona toalua e fesiligia o ia e tusa ai o lea mataupu.

Peitai fai mai faamaumauga a le malo, e alu atu le ua molia o loo aai faatasi mai lona toalua ma le sifi lea i le nofoaga o loo i ai le kamupani i’a i Atuu, ma tula’i mai ai loa se vevesi i le va o le ua molia ma lona to’a, ma sulu ai le fafine i leoleopo a le kamupani mo se fesoasoani ma i’u ina faafesootai ai loa e le leoleopo le ofisa o leoleo ma suesue le mataupu, ma i’u ina auina atu ai le fafine ma tuu i lalo o le vaavaaiga a le Social Service, ma tuu atu ai loa le fafine e nofo i le shelter.

O le aso 15 Fepuari 2012 na tuua ai e le fafine le shelter ma agai atu ua nonofo ma lona aunty i le fale o lona aunty i Fagatogo, ma o iina na tula’i mai ai le faalavelave lea e pei ona tuuaia ai le ua molia e le malo, ina ua ia alu atu i le fale o le aunty a lona toalua ma fai i lona toalua la te o i totonu o le potu la te talanoa ai e uiga i le la ulugalii.

Ina ua la o i totonu i totonu o le potu, fai mai faamaumauga a le faamasinoga na faatonu ai loa e le ua molia lona toalua e aveese uma ona lavalava (tulou) atoa ai ma lona faia o isi uiga mataga e aofia ai loa ma lona faamalosia o ia, e ui sa faailoa e le fafine i leoleo sa musu e faiaiga ma lona to’alua, ona ua le toe i ai ni ona lagona alofa ia te ia.

Ina ua maea ona faamalosi e le ua molia lona toalua e pei ona tuuaia ai o ia a le malo, sa ia toe fai i le fafine la te toe faiaiga, ma o iina na tagi ai loa le fafine ma talosaga i le ua molia e aua, lea foi na talia e le ua molia, ma ia fai ai loa i le fafine la te o i le la fale la te talanoa ai e uiga i le la ulugalii.

Ina ua agai atu i laua i luma o le faletupe o le ANZ Bank i Fagatogo, o iina la lea na fai mai le malo na taofi ai loa e le ua molia le taavale a se tasi o ana uo, ae taumafai e toso ai i totonu lona toalua peitai sa ee le fafine ma valaau i tagata sa i ai mo se fesoasoani, e le’i umi ae agai atu loa le tamaitai leoleo ia Sgt. Margie Alofaituli ma faato’a filemu le mataupu, o ia foi lea sa gafa ma le suesueina o lenei mataupu.

O loo taofia pea le ua molia i le toese i Tafuna ina ua le mafai ona ia totogiina le $35,000 na faatulaga e le faamasinoga e tatala ai o ia i tua.