[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua fa’atoese ai le tama’ita’i o Silia i ona matua e tusa ai o le mea sa tupu.]

Na matua ese lagona o matua o Koso i le vaaiga lea ua la molimauina i lea vaveao, ina ua la vaaia le fa’atoese o le tama’ita’i o Silia e tusa ai o le mea sa tupu, ao lea fo’i ua alu atu ai ma le tamaititi o Koso e fesoasoani i lona tuafafine, ma ua manino mai ai i lagona o le ulugali’i, o le muta’aga moni lava lea o le vevesi sa tula’i mai i le va o Koso a Keli, lea lava o loo la popole i ai ina ne’i toe tula’i mai i se taimi o i luma. E lei toe i ai se isi o le ulugalii e toe gagana i se upu i lea taimi, se’i vagana ai loimata o le fiafia ina ua la mautinoa lele, o lea ua tau fai lagona e le la fanau lo la sese e tusa ai o le mea sa tula’i mai. “Fa’afekai Silia ua e sau, ua leva ga ou fia vaai aku ua e sau...” o le tala lea a Koso ao ia fusi si ona tuafafine, ona ia fa’atula’i lea o ia i luga ma la savavali to’alua atu ua la nonofo i le nofoa o loo i luma o la matua, a’o le olomatua ma le toeaina i le taimi nei, ua na o le fetagisi i le fiafia o la loto.

“ ...fa’amolemole, fa’amagalo mai a’u .. fa’amoemole, fa’amagalo mai ka ika ..” o upu ia sa fa’aauau ona tautala i ai Silia ao nofo i luga o le nofoa ma fa’asaga atu i ona matua, ae o le taimi lea, ua le toe i ai lava se mea e toe gase i totonu o le nu’u atoa, ua ta’aligoligoa fo’i le nu’u atoa, ua tau fai momoe uma le nu’u i tofaga e fa’atali ai le aso fou ua fotua’i mai.

O le toeaina o Lipa le tama o Koso ma Silia, e le o se tama e tautala soo, e tautala tasi lava i se mea, o le mafua’aga fo’i lena sa faigata ai ona fai sana fa’aiuga i le taimi atoa na tula’i mai ai le fa’alavelave, ona o lona manatu, se’i maua muamua se la fesootaiga ma lona afafine ona fa’atoa fai lea o sana fa’aiuga maumaututu e fa’atatau i le mataupu o loo tula’i mai. Ua mou lagona o le tagi ma le fa’ateia sa poia ai le ulugali’i i lea vaveao, a’o lea ua alo atu nei le toeaina o Lipa e fa’asoa ona lagona i lana fanau e tusa ai o le fa’alavelave sa tula’i mai.

“ .. Silia, e ofo o ma loko i legei mea ua e faia, mai kausaga e kele o le kakou mafukaga ma Keli, sa lilo i o ma magaku e ke koe kuia o ma faku, aemaise ai loko o ou kuagage, ae ua a gei, a lea ua kaugu’u le mea sa ma popole i ai ..” na motu fa’afuase’i le talanoa a le toeaina o Lipa ina ua tau le mafai ona fai se upu i le mafatia o lona loto. Ua ea i luga o le toeaina ona toe fa’aauau lea o lana lauga fa’aumiumi i lana fanau i le mea tonu e tatau ona taoto ai le mataupu e pei ona vevesi ai aiganalua. E tau fa’ai’ui’u loa le lauga fa’aumiumi a Lipa, ae vaaia loa le ulufale atu o se tagata i totonu o le fale talimalo a le aiga lea o loo fai ai a latou talanoaga, ma le tete’i o le aiga ina ua latou vaaia le ali’i o Keli ua ulufale atu i totonu o le fale, ma savai sa’o atu lava ma to’otuli i luma o matua o Koso ma Silia ma tagi ai.