[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua fa’ailoa ai e Keli i ona matua ma lona aiga atoa le faigata lea ona toe momotu le mafutaga ma Silia, ona ua tauaso le alofa.]

E lei gagana le toeaina o Lapa le tama o Keli mo se taimi umi, ae ua na o le nofo o le toeaina ma mafaufau loloto i le vevesi lea sa a’afia ai lona atali’i ina ua fasi e Koso ma isi tama le aiga, e foliga mai e fa’aauau pea ona o lea ua manino le mata o le vai, e le toe mafai ona taofia le mafutaga a lona atalii ma Silia. Na umi se taimi e le o toe gagana se isi o le aiga, ae ua na o le nonofo ma sioa aga’i ia Keli ma Silia lea o loo saofafa’i mai i le nofoa pito i luma o le fale. E tutusa lagona o loo mafatia ai loto o aiga e lua i le taimi lava lea o le po. E le gata e le o mapu le ita i le loto o le tamaititi o Koso ona o le vaaiga lea ua molimauina i le mafutaga a lona tuafafine ma Keli, ae faapena foi i lagona o le aiga o Keli, o loo popole ina ne’i toe tula’i mai se isi mea e sili atu ona matuia i le lumana’i i le va o Koso ma Keli ona o Silia.

“Vaai oe Silia si o’u afafige,” o le talanoa atu lea a le toeaina o Lapa. “O a’u ou ke le ika, pau le lagoga lea e oo mai o le popole, ae sili pe a e alu eke kalagoa i gai ou makua poo le a le la kala, iga ge’i faapea mai ua leai se ma upu ma le olomakua e fai aku ia ke oe, e afai o le a se la fa’aupuga ma se kou kala e fai, oga e koe oo mai lea e fa’ailoa mai,” ua malilie uma le aiga i le fautuaga a le toeaina o Lapa, ma vaaia ai loa le tula’i o Silia ma savali loa aga’i i le latou fale i le po lava lea. Na iloa mamao atu lava e Silia le latou fale o loo mumu mai le moli, o loo i ai fo’i tagata o loo nonofo mai i luma o le fale talimalo. E leai ma se isi o le aiga na gagana i le taimi na ulufale ai Silia ma savali sa’o atu lava ua nofo i le nofoa o loo i tafatafa o ona matua.

“Silia, ua e sau,” o le fesili muamua lava lea a le olomatua isi ana tama, ae o le tama’ita’i i lea taimi, e lei gagana i se upu sei vagana ai le maligi o ona loimata, ma ua vaaia ai fo’i le fetagisi atu ai o le aiga, sei vagana ai lava le toeaina o loo nofonofo lava ma tapili lona ‘ili, ma tilotilo aga’i i fafo o le fale. Na fa’ateia le aiga ina ua tootuli Silia i luma o ona matua ma fa’atoese e tusa ai o le mea sa tupu, ma ia augani i ai mo se avanoa e fa’amagalo ai o ia, ina ua avea o ia ma tagata ua tula’i mai ai vevesi ma maseiga i le va o le latou aiga ma le aiga o Keli. Ao tootuli le tama’ita’i o Silia o ona matua, ma vaaia le tula’i mai o lona tuagane o Koso ma fusi lona tuafafine ma fa’anofo i lalo, peita’i sa fa’aauau pea le fa’atoesega a Silia. “ ... ua faigaka oga koe faamaopoopo mai le ipu vai ua masa’a, o a fo’i gi o’u leaga i se kaimi ua sola, fa’agalo i guu mamao, ae ole mea mogi lo’u aiga, ua faigaka sa’u fa’aiuga, oga ua ou alofa ia Keli, ua kauaso ai fo’i lagoga o le alofa.”