[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua talanoa atu ai Koso i ona matua e fa’atatau i le mafutaga a Silia ma Keli.]

E lei gagana le toeaina o Lapa ma lona to’alua i le mataupu lea ua talanoa atu i ai Koso, ae ua popole le ulugalii ina nei toe tulai mai se isi faalavelave matuia ai,  a’o lea e maualuga i le vaai a le ulugalii le fa’aleleiga lea fa’atoa mae’a ona faia i le va o aiga e lua atoa ai ma le nu’u, ona o le vevesi e pei ona tula’i mai i le va o Koso ma Keli. “Vaai oe Koso le akalii, e le o mama i ma loko ma lou kiga le makaupu lega ua e fa’asoa mai ai, e pei o se pelu e kui ma aki i ma loko pe a ma vaai aku i ai ....” ua motu fa’afuase’i le talanoa a le toeaina o Lapa ina ua le mafai ona fai sana tala i le mafatia tele o lona loto, “ae ui i lea Koso si o’u akali’i pele, kuu mai ia maua ma lou kiga le makaupu ia Silia, se’i sema so ma kaimi oga ma kalakalagoa lemu lea i lou kuafafige,” o le talanoa atu lea a le toeaina o Lapa i lona atali’i, ae na vave lava fo’i ona fa’auilavea le olomatua ma fa’aopoopo atu ia Koso e fa’apea, “Koso, ka’akia mai Silia ia maua, aua ge’i koe kula’i mai se isi mea e fa’aluaiga ai le vevesi lea na magu’a ai Keli .....” na motu le talanoa a le olomatua ina ua maligi ona loimata, ao Koso i le taimi lea, sa na o le pulaloa e aunoa ma se gagana.

Se’i o tatou liliu atu lava i le solo fa’aniutu a le aiga o Keli lea ua fo’i atu i lo latou pitonu’u, ina ua mae’a ona faia le leleiga i le va o aiga e lua, ma ua talanoa fiafia fo’i le aiga i le naunau atu o si toeaina o Lapa ma si ona aiga e faia le leleiga, ma fa’amuta ai le toe tula’i mai o se isi vevesi i le lumana’i. Ae i le ogatotonu o talanoaga o le fiafia i lea po, na fa’ateia ai le aiga uma ina ua fa’alogoina le leo o le tama’ita’i o Silia, lea ua talanoa atu e fa’amanino lona mafaufau atoa ai ma le la mafutaga ma Keli. “Akogu o loo kuu fesili lo kakou aiga i le pogai o lo’u i ai i le falema’i i le kaimi akoa ga kaoko ai Keli i oga magu’a, akoa ai ma legei afiafi iga ua ou le gofo i lo makou aiga ae ua kakou o mai fa’akasi i legei iku, ou ke fa’apea aku, o loo i ai se mafukaga i le va o maua ma Keli, ma ua uma fo’i oga ma kalagoa, ma ua ma malilie o a’u e faia akua se ma fa’amakalaga i lo kakou aiga ...”, na motu faafuase’i le talanoa a Silia mo ni nai sekone, ona toe faapea atu ai lea o le tama’ita’i, “ou ke magaku fo’i, ua oo i le kaimi ua kakau ai oga ou kalakalagoa i lo’u aiga e kusa ai o legei makaupu.” Na umi se taimi e leai se isi o le aiga e gagana poo se leo fo’i e toe gase, sei vagana ai lava le leo o Silia lea e tagi masusu. Na umi se taimi e leai se isi e gagana, ae fa’afuase’i loa ona fa’alogoina e le aiga le leo o le tamaititi o Keli mai luga o le nofoa lea o loo nofo mai ai, ua fa’apea atu i ona matua, “Vaai oulua o’u matua, e le toe i ai se isi upu e sili atu i sa’u tala, o lena ua talanoa atu Silia, e ui i se mafanafana fo’i i le mafutaga ma Koso, ae ua faigata ua tauaso le alofa.”