[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua alu ai le alalafaga a le aiga o Koso i le tamaititi o Keli lea ua te’a mai i tua mai le falema’i.]

Na mae’a le saunoaga fa’aumiumi a le tama o Koso i le alalafaga a le aiga ma le Ekalesia, ona sosoo ai loa lea ma le fa’atoesega aloaia a le aiga ia Keli, e tusa ai o le fa’alavelave sa tula’i mai, lea na mafua ai ona manu’a lona tino, ia ua fasi o ia e Koso ma nisi tamaiti o le nu’u.

“Keli lo’u akali’i, e fai a’u ma sui o le aiga akoa o Koso, makou ke fa’akoese aku ai ....” na motu fa’afuase’i le fa’atamalaga a le toeaina matua o Lapa ina ua tau le mafai ona fai se upu i le maligi o ona loimata, ae fa’afuase’i loa ona vaaia e aiganalua faapea ai le Ekalesia ma tula’i mai o le tamaititi o Koso ma savali sa’o atu lava i le nofoa o loo nonofo fa’atasi mai ai Keli ma lona tuafafine o Silia i le pito lava i luma o le fale, ae o le taimi lea ua leai ma se isi e toe gagana poo se leo e toe gase, ae ua tuli mata’i uma e le nu’u le tamaititi o Koso ma lana gaioiga lea ua fai.

Na ona savali atu lava o Koso, fusi le tamaititi o Keli, ona to’otuli ifo loa lea i ona luma ma tagi ai, e aunoa ma se upu na gagana ai. Ina ua tuana’i ni nai sekone talu ona tootuli Koso, sa taumafai Keli e pa’i atu i ai, ae sa faigata ona o fusiga o loo i lona tino, ona fa’apea atu lea o Keli i le tamaititi o Koso, “Koso lo’u uso, tula’i mai, ua leva ona ou fa’amagalo ia te oe,” o le tala lea a Keli na savali mai ai loa lona tina ma fa’atu i luga o le tamaititi o Koso ma fa’asaofa’i i tafatafa o Keli, ae o le taimi lea i le nu’u atoa, uo ma aiga faapea le Ekalesia, e leai ma se isi e le’i lagona le mafatia o le mafaufau ona o le mea ua tupu.

Ina ua tuana’i le afa itula talu ona faia le feiloaiga, na fa’ai’u ai loa i le toona’i tele na saunia e le aiga o Koso, lea na aai uma ai le nu’u atoa ma fiafia ai, ina ua toe te’a mai i tua le tamaititi o Keli, ao lea fo’i ua mae’a ona faia le leleiga i le va o aiga e lua, o le nu’u atoa lava fo’i lea. O lea ua mae’a le fa’aleleiga i le va o aiga e lua, ua mae’a fo’i ona teuteu tulaga uma e pei ona finagalo i ai aiga na lua, ina ia fai fa’aaloaloga fa’aleaganu’u e fa’ai’u ai le ao pogisa lea s ufitia ai le aiga, ae o le fesili tele lea ua tu’u fesili ai le to’atele o tagata, o le a fa’afefea nei la le mafuataga a Koso ma Keli, o lea ua manino le mata o le vai, ua naunau lava le tuafafine o Koso, le tama’ita’i o Silia e avea Keli ma ana paaga mo le olaga atoa. O le afiafi lea ina ua mae’a feiloaiga a aiga e lua, na fa’ateia ai matua o Koso ina ua sese’e atu le tamaititi i o la tafatafa ma ona loimata, ona fesili lea o le ulugali’i pe i ai se mea ua tupu, ae na tali le tamaititi o Koso, “vaai oulua, o lea ua mae’a ona toe teuteu le ao pogisa sa ufitia ai lo tatou aiga, ae o le mea lea ua ou maitauina, e foliga mai ua avea Silia ma se tasi na te aumaia le toilalo popo i lo tatou aiga.”