[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea na fa’ateia ai Keli ma lana uo ina ua fa’afuase’i ona vili atu Silia i le telefoni a Veli.]

Na pei e gatete lima o le ali’i o Keli ao tago atu e aumai le telefoni a Veli e talanoa ai ia Silia lea ua telefoni atu. “Talofa oe le Tausala, ae saunoa ia o lea ua fa’alogologo atu lau auauna”. O ulua’i upu ia na talanoa atu ai Keli i le telefoni, ae na te’i ina ua fa’alogo atu i le ata o Silia ma fa’apea atu lana tala, “Talofa Keli, ta’i malolosi fo’i upu e te fa’afeiloaia ai tagata talanoa i luga o le laina”. O upu malie ma tala fa’afiafia loto na mafai ona fetufaa’i ai le ulugali’i i luga o le telefoni, ma ua pei ai lava o se mafutaga e le o i ai ni fa’afitauli o tutupu mai ai. Ua aga’i i le itula o talanoa ma fa’asoa Keli ma si ona to’alua i luga o le telefoni, ma ua vavala mai ai i le fa’alogo a le ali’i, e foliga mai e le o i ai se fa’aletonu ogaoga e ono mafai ai ona fa’amuta fa’afuase’i le la mafutaga ma si ona to’alua. “Fa’afetai Silia mo le valaau mai, ae o la’u fesili ae e te le’i tu’uva’a ese atu mo Niu Sila i le po nanei, o i ai sou finagalo e te toe fo’i mai e toe sosoo lo ta aiga, e tusa ai o la’u talosaga e pei ona avatu i le laupepa na alu atu ma Veli”, o le fesili lea a le ali’i o Keli isi ona to’alua.

Na umi se taimi o nofo Silia e le gagana i se upu, ona toe fa’apea lea o Keli, e foliga mai o lo o i ai se fa’aletonu ua mafua ai ona tuai se tali mai a Silia. “Afai ua tuai sau tali ona e le o mautonu lou mafaufau i le tulaga o le ta aiga, pe mafai ona e fa’ailoa mai se tali moni mo a’u, ina ia aua ne’i ou saga fa’atali pea mo se tali”. Na vaaia e Veli le sui fa’afuase’i o foliga o lana uo ao talanoa i le telefoni, ona manatu ai loa lea o le ali’i e sili pe a savalivali i le isi itu o le auala laupapa e nofonofo ma faasavili ai, ina ia aua ai ne’i fa’alogo atu i le talanoaga a lana uo ma Silia i le telefoni, peita’i e le’i umi ae toe savali atu Keli ma tu’u atu le telefoni ia te ia ma fa’apea atu, “Fa’afetai uso mo le telefoni, ae ou te manatu o le a ou savalivali i le fale ua malu mai fo’i le afiafi ma ua oo fo’i i taimi o faigalotu, ae ta te toe talanoa atili nanei pe a uma meaai o le afiafi”. Na fa’amavae Keli ma lana uo ona fo’i loa lea i lona aiga mo faigalotu o le afiafi.

E fetaui lava le uma ane o taligasua o le afiafi i totonu o le afioaga i Amomua ma le aiga o Keli ae tofu atu loa fo’i ma Veli i totonu o le faleo’o a si ana uo, ma maua atu ai o lo o taotooto to’atasi lava na o ia, ona ia tu’u atu ai loa lea o le telefoni ma fai atu i ai, “Sole, vaai Silia na e uma ona toe valaau mai lea e te lua talanoa i le telefoni, ae a uma ona lua talanoa ona e alu atu lea i luma o le aai ta te fetaui ai ma ta talanoa”. Na pei o ni ufi e tutupu i le tino o Keli le tala lea ua avatu, ma nofo fiafia ai loa le ali’i e fa’atali le toe valaau ane o Silia i le telefoni.