Ads by Google Ads by Google

TAUASO LE ALOFA

[E toe fa’atalofa atu i paaga masani a le tatou polokalame i lenei vaiaso,malo le soifua manuia, ae o le toe soso’oina atu lea o le tatou polokalame fa’asolo, lea na gata mai i le vaiaso na te’a nei i le taimi lea ua talia ai e le tina a Koso le fautuaga a le toeaina, la te o i le falema’i e asi Keli o lo o taoto ai.]

 

E ui i le faigata o le fa’aiuga ua faia e matua a le ali’i o Koso, ae sa manatu le toeaina, pau lava o le auala e maua ai le fa’aolataga mo si ona atali’i, lea ua ia maua tala ua sola aga’i i le mauga e lafi ai, ona ua saili le aiga o Keli e fasioti ia te ia. Ua tapena le ulua’i ma la aga’i atu loa i le falema’i i le leva o le po, o le taimi lea, o lea ua fa’atasitasi uma le aiga o Keli i le fale e faia ai asiga a le falema’i, e tapuaia ai le taotoga o Keli lea ua amata i le taimi lea. O le nofoa pito lava i luma o lo o nonofo to’atolu ai matua o Keli  ma le tama’ita’i o Silia, lea lava e le o matu ona loimata i lea taimi, ae o isi nofoa i totonu atoa o le fale, o lo o nonofo ai le to’atele o le aiga e aofia ai taulele’a, tamaloloa, fafine ma tamaiti, o lo o fai le ipu ti ma nai masi sa maua atu i le faleoloa, e tali alo ai le aiga a o tapuaia le taotoga o Keli.

 

Na taunu’u matua o Koso ma la fesili i se Leoleo po o le falema’i, po o fea le vaega o lo o i ai le ma’i o le ali’i lea na fa’anatinati mai i le falema’i ona o manu’a tuga i lona tino, ae na fa’ailoa i ai e le Leoleo po, o le ali’i lena ua toso atu nei i le potu tipitipi mo lona taotoga, ae o lona aiga lea ua mapu atu i le fale tele o lo o pito i le isi itu o le falema’i, e mapu ai mo le afiafi.

 

Na iloa mamao atu lava e matua o Koso le tumutumu mai o le aiga i totonu o le fale, ae o le ulugali’i ma le la tama o Silia o lo o nonofo mai i le nofoa pito lava i luma. E le i toe fa’atali matua o Koso, ae ua savavali telea’i atu nei i le itu o lo o i ai le faitoto’a o le fale, ma la ulufale loa e aunoa ma se isi na iloa maia i laua. E fetaui lava le iloa ane e le to’atele o le aiga le ulugali’i, ae la to’atotoli loa i le faitoto’a o le fale ma la punonou i lalo, e aunoa ma se isi o i laua na toe ea i luga.

 

Na ona iloa mai lava e uso o le tama o Keli o le mea ua tupu, tutu loa i luga ma savavali mai i le faitoto’a o le fale o lo o tototutuli atu ai le ulugali’i, ae na vave le alaga mai o le toeaina matua o Lapa, le tama o Keli ma fa’apea mai, “Kaofi! Kaofi, lo’u aiga e, aua ge’i i ai se mea e gase”, o upu ia a le toeaina matua o Lapa na vave ai ona toe tutu ona uso laiti atoa ai ma isi taulele’a o le aiga lea ua savavali ane nei i le vaega tonu o lo o tootutuli atu ai matua o Koso. Na ona uma lava o upu ia a le toeaina matua o Lapa, ona punou ifo loa lea i lalo ma tagi, ua tagi masusu le toeaina, ua tagi aueue fo’i, ma ua leo tele lana tagi, ua lagona uma fo’i e itu e fa o le falema’i le mafatia o le toeaina, ona fa’aepa atu lea o ana upu, “Silia, fa’afekai i le koa o lou loko, fa’afekai i le mogi o lou alofa, ua avea ai oe ma fa’aola i le va o gai o kakou aiga i legei aso”, e fai lava tala a le toeaina matua o Lapa ma savali mai ua fa’atutu i luga matua o Koso, o lo o tootutuli i le faitoto’a o le fale.