[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua toe fo’i ai le tamaititi o Koso i uta i lona nofoaga mautu..]

Na ona taunuu lava o le tamaititi o Koso i lona faleoo i uta i lona ma’umaga, taoto loa i lalo ma fai loa lana malologa, ua lagona lona vaivai ina ua alu le po o pisi i le tapenaina o taumafataga mo le aso fiafia o lona tuafafine. Ua moni ai le upu i le tulaga lea ua oo i ai le tamaititi o Koso, “e moeiini mata ae ala le loto” i le mea lea ua i ai, e na o le taoto o le tino e moe ae o lona mafaufau e le mapu i le mafaufau solo i le tele o le mau fa’afitauli o loo fetuleni i totonu o le aiga, aemaise ai lava i le va o ia ma Keli lea ua avea nei ma to’alua o lona tuafafine. Na pei o se miti fa’asolo a Koso lea ua fai nei, “fai mai ua vaaia Keli ma Silia o loo savavali mai i le ala e aga’i atu i lona faleo’o, ona ia lafi lea ma le fa’amoemoe o le taimi lelei lea mo ia e fa’ao’o ai le oti ia Keli, peita’i ina ua ia meme’i le tao, ma isi ma Keli ae na manu’a ai si ona tuafafine pele e to’atasi ma maliu ai,” o le te’i o Koso i lana misi ma le vaaiga lea ua tula’i mai ma itu na e e ai i luga ma avea ai ma ala na nofo fa’afuase’i ai ua autago solo ona lima e foliga mai o se tagata ua oso se ma’i aitu, ae ina ua toe sagatonu lona mafaufau sa ia iloa ai, o ia lea o loo moe i totonu o lona faleo’o, ae ua amata fo’i ona fetagisi alisi o le afiafi, ua aga’i ati fo’i le La i lona nofoaga mau. Na iloa e Koso ua leva ona mae’a le aso fiafia a lona tuafafine, ai fo’i ua ta’ape fiafia tagata i le tele o taumafataga o le aso, ona oso lea o lona fiafia ma te’i ai lava ua toe ata to’atasi na o ia ina ua ia iloa, sa lelei lona sao mo le aso o si ona tuafafine.

Sei o tatou liliu atu lava i le aai i le fa’aipoipoga ma aiga na lua ia o loo tumutumu ai lava i le aai o le nu’u, i luma o le maota o le tuua o le nu’u, le tama o Koso lea o loo pisi ai le siva o le fa’aipoipoga, aua o le tama’ita’i o Silia, o le Taupou lea a le aiga. O le maea ogatotonu o le siva ma le fiafia tele o loo faia i le malae na fa’atoa maua ai loa le avanoa o le aiga atoa e feiloa’i atu ai i le ulugali’i, e le gata o le aiga o Keli ae fa’apena fo’i i le aiga o Silia, ao gasolo atu le aiga o Silia e feiloa’i i le ulugali’i fou, na vaaia le maligi o loimata o le tama’ita’i, na manatu le toa’tele, o loimata o le fiafia lea ua mafua ai ona tagi Silia i lea afiafi atoa, peita’i i le taimi o lana fa’amatalaga e fa’afetaia ai uo ma aiga sa alolofa atu ma lagolagoina lo la fa’amoemoe, na fa’atoa manino ai loa le mata o le vai i le mafua’aga tonu o le mafatia o le tama’ita’i fa’aipoipo. “Ou te iloa o lea ua mafuta mai i lenei aso o ma aiganalua, fa’afetai i lo outou lagolagoina o la ma aso fiafia, ae ou te iloa e to’atasi lava le tagata e le mafai ona fa’atasi mai i lenei afiafi,” o le fa’amatalaga lea a Silia na tau tai fetepaa’i solo ai le aiga i le fia iloa poo ai e le o auai i lea po.