[E toe fa’atalofa atu i paaga masani a le tatou polokalame i lenei vaiaso, malo le soifua manuia, ae o le toe soso’oina atu lea o le tatou polokalame fa’asolo, lea na gata mai i le vaiaso na te’a nei i le taimi lea ua taunu’u ai le aiga o Keli i le falema’i.]

“.... afai o le aka lea ua aumai e Koso, ua lava lea mo a’u, a ia e iloa Silia, e le sisiga fua le koko o la’u kama i le eleele, se’i loga lava fo’i e kaui i le koko masa’a fa’akoa malie loko o le aiga legei ....” o isi tala ia o le ote fa’aumiumi a le tina o Keli ina ua latou taunu’u atu i le falema’i o lo o saofa’i mai ai le tama’itai’ o Silia i luga o le moega o lo o taoto mai ai si ana tama o Keli. E tiga ona fa’afitifiti fa’aupuga tau fa’afefe a le olomatua, ae ua atili ai ona fusi mau e Silia le tamaititi o Keli ma tagi ai i luga ma fa’atoese, “Keil, fa’amolemole ia e alofa ma fa’amagalo Koso, ua ou iloa o a’u le mafua’aga o le mea legei, aga ou le sau ia ke oe e le kula’i mai legei mea i le lua va ...”

E lei taunu’u le ta’avale na malaga atu ai matua o Keli ma isi o lona aiga, ae taunu’u loa ma isi piku apu tetele e tumu i tama ma tamaloloa o le aiga, ma vaaia ai foliga o le ita ma le fia taui ma sui o loo o atu ma latou.

“ ... Silia!, a o fea la o i ai lou kuagage fia ula vale ma le pu-pu i fale, aisea ua le sau ai e fa’ailoa mai oga foliga ae ua sola sola solo fa’apea aisea ..?”, o le alaga atu lea a le isi ali’i soga’imiti, o le tuagane laititi o le tina o Keli, ma savali atu lava i totonu o le falema’i i le mea o lo o nofo mai ai Silia i tafatafa o le moega o Silia, a’o tumu isi tagata na o atu e avatu a latou ma’i i le falema’i.

“ .. sa makou fai fa’alelei ia Koso e pei lava o se uso o Keli, e maka uma i ai mea sili, e pei o se kagaka sa fagau mai i o makou magava, soo se mea e maga’o i ai e maua, ao lea ua ia kaui mai lo makou alolofa i legei mea makuia, afai o le iuga lea ua ia maga’o iai, ua makou saugi e kaui atu ia ke ia e pei oga ia faia ia Keli, ua e fa’alogo mai”, o le e e leo tele atu lea o le uncle a Keli ia Silia, ae na o le nofo lava o le tama’ita’i i tafatafa o le moega o Keli ma ona loimata e le matu.

Se’i o tatou toe fo’i atu i totonu o le nu’u. Na pei o le ao le taimi lea i totonu o le nu’u, ina ua feala uma aiga ma tagata sa momoe, i lo latou fia mauaina o le au o le paipa, aemaise ai lava, a ta’u Koso ma Keli i totonu o le nu’u, o se uo mafana i laua, a’o lea ua fa’ateia tagata ina ua fa’alogo, o lo o tau fa’aola Keli i le falema’i ina ua fasi tigaina e Koso ma ana uo. O le tamaititi o Koso i le po lea, na ona mae’a lava ona tupu o le fa’alavelave, sosola loa ma ana uo i le isi a latou fale i le latou fanua galue ma momoe ai, e leai ma se isi o i latou o iloaina le mea lea e pisi ai le nu’u i tai i le aai, atoa ai ma Keli lea ua iai nei i le falema’i fa’atasi ai ma lona tufafine, aemaise ai o le aiga atoa o Keli. E lata loa i le vaveao ae taunu’u loa ma se ave feau i uta e logo 
Koso ma ana uo, o lea ua toe fo’i mai le aiga o Keli e saili o ia ma ana uo na fasia Keli.