Ads by Google Ads by Google

TAUASO LE ALOFA

[E toe fa’atalofa atu i paaga masani a le tatou polokalame i lenei vaiaso, malo le soifua manuia, ae o le toe soso’oina atu lea o le tatou polokalame fa’asolo, lea na gata mai i le vaiaso na te’a nei i le taimi lea valaau atu ai le tamaititi o Koso i lana uo mamae o Keli e alu atu loa la te o i le kirikiti o le afiafi.]

 

Ua savavali fiafia aut nei le au ali’i ia i le malaga, ma ua pei lava o se masaga i le vaai a le tupulaga a le nu’u, i le feofeoa’i fa’atasi ma fai fai mea fa’atasi i aso uma o la olaga. A o i le lotu le au ali’i lenei e o fa’atasi, e oo i faagaioiga a le autalavou, o le aufaipese a le ekalesia, e oo lava fo’i i le taimi e o ai i le talaloa, faiga fafie, faiga popo seia oo i taimi o ta’aloga i le malae kirikiti, e vaaia lava le o faatasi o le au ali’i ia. O le tamaititi o Keli, o le fa’amoemoega lea o le au kirikiti a le nu’u i soo se ta’amiloga e faia, e le gata i au a le nu’u ae fa’apea fo’i i au a le autalavou pe a fai soo ma isi autalavou, e manumalo lava le au kirikiti a Amouta ona o le lelei o le fa’ate’a a le tamaititi o Keli, e oo fo’i i lana ta atoa ai ma le tali tuaa.

 

Na lilo i le mafaufau o Koso sa talanoa Keli ma lona tufafine ao lumana’i ai le la o mai i le malae kirikiti. Ua pulu le ta’aloga ma ua vaaia fo’i le malosi o le au lea e au fa’atasi ai Keli ma Koso, e leai ma se polo e alu mamao, ae sapoia uma le tele o ta e le tamaititi o Keli. O le ali’i o Koso, e lelei fo’i lana taalo ae le tutusa lava ma Keli. E fetaui loa le ta ta o le au a Keli ma Koso ae amata loa ona gasolo ane tafaoga a tama’ita’i o le nu’u i le afiafi, o le to’atele lava e gasolo i le malae kirikiti ma matamata ai i ta’aloga a taulele’a, e o atu ai fo’i ma fafine o le nu’u e fia matamata i le ta’aalo a latou ta’ito’alua. O le ali’i o Keli ma Koso na ta mua i le latou au, na fiu le au fa’ate’a lelei a le isi au e taumafai e tape le a Keli ua le mafai lava, se’i vagana ai Koso e atoa loa ana ‘ai e 8 ae pe loa, ona fa’asolo mai loa lea o le au, seia oo lava ina mae’a lelei mai ae o lo o tu lava le ali’i o Keli.

 

O le ta mulimuli lava a Keli na manumalo ai i le isi ‘au ae fa’alogo atu loa ua valaau ane se tama’ita’i i lona igoa, ma le faliu atu i tua o Keli, o le tama’ita’i o Silia le tuafafine o Koso lea e valaau atu i lona igoa, ona fa’ataga ata lea o le ali’i ma savali punou i tua ua mae’a le ta’aloga, ae ua tau fai tali e uma atu lana au ma fa’amalo atu ia Keli e tusa ai o le latou ta’aloga, se’i vagana ai fo’i lana uo o Koso lea fo’i ua fai fai tala malie atu i lana uo, ma ua masani ai fo’i le tupulaga i uiga o le au ali’i ia. E taape loa le tumutumu o taulele’a sa i ai i le malae, ae vaai atu loa Keli ua savali sa’o atu lava Silia i le vaega tonu o le malae lea la te tutu mai ai ma Koso, ma ua faigata i le tama ona fai se isi alofaga po o se gaioiga, ona o lea ua uma ona la tu’u tala ma Silia. “Magaia le kou ‘au boys, e le ula lava se isi i le malolosi o kauau a le kagaka lea o Keli ali’i”, o le tala ula lea a Silia i lona tuagane ma Keli lea o lo o tutu toalua i luga o le malae.