Ads by Google Ads by Google

Tauaao Senate ripoti Fa’aaliga Tu ma Aganuu Pasefika

Ua i ai nei i a’ao o le taitaifono o le Komiti o le Faagaioiga o le Malo ia Galea’i Tuufuli, le ripoti a le Komiti Faafoe o Faaaliga o Tu ma Aganuu a le Pasefika (10th Festival of Pacific Arts), ae talu ai o le ripoti e le’i faamaonia e Su’etusi, ua faia ai e Galea’i le faaiuga ina ia tuu atu muamua le ripoti e suesue ma faamaonia mai e Su’etusi a le malo, ona faatoa maua lea o le avanoa e tufa ai i afioga i Senatoa, ma faatulaga ai loa se aso o le iloiloga.

 

O lo o taua i le ripoti le aofaiga e $1,629,923.62, o tupe sa foa’i e kamupani, pisinisi, faalapotopotoga, tagata taitoatasi faapea ai ma le malo e fesoasoani ai i le faatupeina o lenei faamoemoe.

 

E $480,000 le foa’i a le aufaipisinisi i le atunuu, $100,000 o foa’i mai isi tagata, ma le silia i le $1.1 miliona o le foa’i mai le malo o Amerika Samoa.

 

O ni isi o foa’i na mafai ona tuuina mai i pisinisi mai isi atunuu e pei o Niu Sila, Hawaii ma Amerika, atoa ai ma le ulua’i foai na tuuina mai i le Faletupe o Hawaii e $50,000, faatasi ai ma le latou fesoasoani i le sapasapaia o le nofoaga autu mo fesootaiga (festival media center.)

 

E lata i le 1,000 i latou sa ofo fua o latou taimi e fesoasoani ai i lenei faamoemoe, e pei ona taua i le ripoti.

 

I le taimi o le iloiloga a le Senate ma le Maota o Sui mo le tofa ia Fagafaga Daniel Langkilde e avea ma Faatonusili o le Ofisa o Faasalalauga a le malo, le KVZK-TV, na fesiligia ai e sui o komiti a maota e lua ia le tofa a Fagafaga, i le mafuaaga o le tuai ona tuuina atu o lenei ripoti i le fono.

 

O Fagafaga, o le isi lea taitaifono o le Komiti Faafoe na tofia e le alii kovana ua mavae atu ia Togiola Tulafono, latou te faatautaia gaioiga uma o le taligamalo a Amerika Samoa i le Faaaliga o Tu ma Aganuu a le Pasefika i le 2008.

 

Na faamanino e Fagafaga i luma o le fono e faapea, o le ripoti a le komiti na maea tapena lava i le taimi na uma ai le Faaaliga o Tu ma Aganuu a le Pasefika i le 2008, ona tuuina atu loa lea i le alii kovana.

 

“Sa matou fesiligia le kovana e faatatau i le ripoti, ina ua taunuu atu se talosaga a le fono i lena vaitaimi e fia maua se kopi o le matou ripoti, ae o le tali a le kovana ia matou, e le faaooina maia e le komiti le ripoti i le fono ae o le tiute lena a ia,” o le saunoaga lea a Fagafaga i luma o le komiti a le maota o sui i le vaiaso nei.

 

Sa ia taua foi e faapea, ina ua fesiligia o ia e le senate i le mataupu lava foi lea, o lana tali foi lea sa tuuina atu i ai.

 

Na toe faatepa e Fagafaga fetusiaiga sa la faia ma le afioga ia Laolagi Fonoti Savali Vaeao ao avea ma faipule i lea taimi, e faatatau i le ripoti a le latou komiti lea ua maea ona tuuina atu i le kovana.

 

Na faamalulu Fagafaga i le komiti ona o le tulaga e faatatau i le ripoti, ae i ai lona talitonuga, e faigata i le latou komiti ona faia se isi laasaga  i luga atu o le mea ua saunoa i ai le alii kovana ua mavae atu, ona o i latou sa tofia e le kovana e faataunuuina le galuega.