Ads by Google Ads by Google

Taua’ao Fesoasoani Tupe - Pisinisi Laiti & Tautua Iloga

O le Aso Faraile Ianuari 4, 2013, na taua’ao aloa’ia ai fa’ailoga tupe  mo Pisinisi Laiti sa talosaga i le Small Business Development Center mo nei fesoasoani e fa’aleleia atili ai a latou pisinisi ua fa’atula’ia i Amerika Samoa.

O le aofai o nei meaalofa tupe na taua’aoina e $32,000. ma o se vaega tupe sa fa’ameaalofa mai e le Faletupe o Hawaii mo le fa’amoemoe lava e tasi, “Ia fa’amalosia le fa’atautaiga o pisinisi laiti i totonu o le atunu’u!”

I le fa’atasiga fa’apitoa  i le potu fono Naumati 1 i le faletalimalo o le Tradewinds i Tafuna, sa auai fa’atasi i ai sui o Pisinisi Laiti ua lautogia mo nei meaalofa tupe, fa’atasi ai ma nisi o sui sa manatu le Small Business Development Center e ao ina fa’aalia i ai lo latou agaga fa’afetai ona o se tautua ua mae’a fa’atino, sa fa’amalosia ai fo’i le latou taumafaiga i le tatou teritori.

O le susuga Herbert Thweatt, o le fa’atonu o le SBDC sa auai ma lana aufaigaluega fo’i latou te taua’aoina aloaia nei fa’ailoga tupe ma fa’ailoga fa’apitoa mo e ua agava’a ai. O nisi o sui iloga sa vala’aulia, o le susuga Alex Zodiacal mai le Matagaluega o Fefa’ataua’iga a le Malo [DOC] ma sui mai faletupe e lua i le teritori, BOH ma le ANZ Amerika Samoa Bank, fa’atasi ai ma sui mai le Kolisi Tu’ufa’atasi.

Ona o le toe tausaga lenei o le Faletupe o Hawaii i le teritori, o lea na o’o atu ai fo’i le sui o le ANZ Amerika Samoa Bank, aua afai ae fa’aauau lenei fo’i ituaiga o fesoasoani, o lona uiga o le a fa’auia mai i le faletupe o totoe i le tatou teritori, o le ANZ-ASB.

O le lona lua o fa’ailoga fa’apitoa, sa taua’aoina lea i le tamaitai faigaluega i le Ofisa o le SBDC o Catherine Balauro ona ua atoa ai i lenei tausaga le lima tausaga o lana tautua.

O i latou na lautogia mo fa’ailoga tupe ta’i $5,000. ua aofia ai:

Chef Sualua - American Samoa Culinary Academy; Donna & Tamiano Gurr - Island Flowers by Liana; Mapu Jamias - Maliu Mai Beach Resort; Ephraim Temple  - Ta’iala Academy.

Mo fa’ailoga tupe ta’i $4,000 e tolu na taua’aoina lea ia:

Alanoa Florist i Nuuuli - Aniani Sili; Sal’s Day Care Center - Lina Aumoeualogo ma Talofa Hideaway Bar & Grill - Pouono Fau.