Ads by Google Ads by Google

Taua’ao fa’ailoga ta’amilosaga ‘Ben Solaita Classic’

O le aoauli ananafi sa fa’atasia ai ‘au Softball e fa sa mautulaga i le Ta’amilosaga 3rd Softball Ben Solaita Classic lea na fa’ai’u i le fa’ai’uga o le vaiaso na te’a. O ‘au softball sa auai o i latou ia na tulaga fa i lea ta’amilosaga se’ia o’o mai i le ‘au Siamupini o lenei tausaga,“Alanoa Rebels.”

 

O le ulua’i manumalo lea ua maua e le Alanoa Rebels talu mai ona fa’atautaia lea liki mo le tolu ai lenei o tausaga, peita’i, o le ‘au na latou maua le tulaga lua, Leone Angels, o i latou ia sa mua’i avea ma siamupini i le ulua’i tausaga o lea liki ma toe fa’apena fo’i i lona tausaga lona lua.

 

Ua fa’ailoa mai e valu ‘au sa tauva i lea ta’amilosaga, peita’i ua fa’amanuiaina le taumafaiga a le ‘au a “Airbase 1” i le tulaga fa. O le tulaga tolu na se’i lea “East Side Softball Team.”

 

E tolu ipu ua fa’amau nei e le Rebels, “Talita o le Siamupini o le tausaga,” Ipu Tu’ufa’asolo o lenei liki Softball sa saunia fa’apitoa e le auaiga o Sa Solaita i Nuuuli, ma le latou lava Fa’ailoga o le manumalo i le liki na saunia e le Vasega o Kamupani sa avea ma “Pa’aga e fa’atupea” lea ta’amilosaga, GHC Reids Co. Ltd i Tafuna, Star Kist Samoa i Satala, ma le Matagaluega o Paka ma Malae Ta’alo.

 

Sa i ai fo’i ipu na saunia lelei mo sui MVP e to’alua, o le ali’i ma le tama’ita’i Ta’alo Lelei. O le ali’i sa ia mauaina lea fa’ailoga i le liki lea o Samuel ‘Smurf’ Sili ma le tama’ita’i ta’alo lelei o Jennifer FC Ben Afalava.

 

Sa auai fo’i le sui mai le GHC Reids Co. Ltd. ina ia fa’ataua fo’i le avea ai o i latou ma kamupani na tele lana fesoasoani e fa’atautaia lea ta’amilosaga. O le tama’ita’i o Theresa Ameperosa Siataga, o le sui fesoasoani i ‘Fa’atauga & Maketiga o Oloa a Leala Peter Reids’ i Tafuna.

 

Na tula’i fo’i le sui fa’atonu o le Matagaluega o Paka ma Malae Ta’alo, Ken Tupua, ma ia fa’ailoa, “O lenei liki ua fa’atulaga ina ia matua tapena tomai ma agava’a o tatou fanau ta’a’alo Softball i le atunu’u, ma o lo ua mae’a fa’ailoa atu i ‘au uma, e mo’omia ona matua i ai se ‘au malosi mo Amerika Samoa ae a ta’amilosaga fa’avaomalo a le Pasefika, lea e auina atu i ai se tatou ‘au i le tausaga a sau. E mo’omia lo outou lagolagosua mai ma fa’amautu a’ia’i leafa’amoemoe!”

 

Na tatala le taua’aoina aloaia o fa’ailoga ma ipu i ‘au lautogia e le susuga Dave Godinet, lea sa ia fa’ailoa ai, “Ua mae’a le fa’amoemoe o lenei tausaga, ae tepa taula’i i le isi liki o lea tausaga, ia fa’aleleia atili, ma ia saunia lau ‘au ia e maua fa’ailoga fa’apenei.”

 

TA’ALOGA MO TALAVOU

 

E le o toe mamao le taumafanafana po’o le tu’uaga umi o a’oga. Ua tatau ona saunia matua ma fanau talavou e i lalo o lo’o i a’oga, ma ua fa’atulaga ai le ulua’i fonotaga e faia ia Aperila 7, 2014 i le potu fono o le matagaluega o Paka ma Malae Ta’alo i Tafuna e talanoa ai se fa’asologa o liki o ta’aloga eseese mo alo talavou.

 

O ta’aloga o le a aofia i nei liki fa’asolo e aofia ai le Pasiketipolo, Volipolo, Little League, Soft Ball, Track & Field Afeleti, Table Tennis ma le Tenisi.

 

O ta’amilosaga uma mo nei ta’aloga ua manatu le matagaluega, ina ia amatalia mo le fanau e 18 tausaga ma aga’i i lalo, ia Me 19 ae ia fa’amae’a ia Iulai 12, 2014.