E tapuni ane lava fale ofu ma faleoloa ananafi, e le’i vaaia lava se tulaga pisi o tagata faatau mo le sauniuni atu ai i le lotu a tamaitai taeao.

E le pei o tausaga ua mavae, o le taimi lenei ua leva ona pisi solo matua ma tagata faatau i le faiga o faatauga o le lotu a tamaiti.

“O lenei lava ua ta le lotu a tamaiti ae leai lava ni faatauga tetele ua vaaia i lenei vaiaso, tailo i ai pe aisea,” o le tala lea a le isi faatauoloa Asia ma faamimigi i luga ona tauau.

Na fesili atu i ai le Samoa News poo a oloa o lana pisinisi sa tele i ai faatauga a tagata i lenei vaiaso, ae tali le mafine, “na o ofu lotu lava mo fanau teine, o isi e o mai e faatau seevae ae o isi matua e na o le fesili a ma toe o, ou te le iloa pe aisea.”

O le vaiaso lenei na tulimata’i i ai nisi o le aufai pisinisi o le a tele ai faatauga mo le lotu a tamaiti, peitai e le o le tulaga lea o loo i manatu o matua o lo o faasoasoaina le tamaoaiga o aiga.

“A lelei lava le tauloto ma manaia le usuina o le pese a le fanau, ua lava lea mo matou o matua, pau lea mea taua, ia mafolafola le ofu ma ia pa’epa’e lelei,” o le tala lea a Toa Apelu ma ata ina ua fesiligia i lana sauniuniga mo le lotu a tamaiti.

Pau nofoaga sa tau feololo ai le pisi o tagata faatau, o faleoloa tetele e pei o le Laufou i Nuuuli.

O le faleoloa o Manu’a i le afiafi ananafi na vaaia ai le toatele o tagata faatau. O isi faleoloa i Fagatogo sa gaogao e oo atu lava i le afiafi.

Fai mai le isi alii faipisinisi mai Asia, ua amata ona le toe soona faaalu e tagata tupe i ofu ma meaai, ae ua faamuamua manaoga taua o le aiga.