Ua fa’alauiloa e le afioga i le Fa’amasino Sili ia Michael Kruse i sana poloaiga na tu’uina atu i le aso 1 Novema, i sui o le Asosi Loia a Amerika Samoa atoa ai ma le Vaega o Fa’amasinoga, le tatau ona fa’atulagaina taimi e iloilo mataupu eseese uma lava i luma o le fa’amasinoga mo se fa’aiuga mulimuli e aofia ai ma mataupu Apili.Saunoa Kruse, o lo o galulue le Vaega o Fa’amasinoga e aofia ai ma le ali’i fa’amasino ia Elvis Patea ma le Ofisa o le fa’amasino sili i le mata’ituina o ni auala e iloilo ai mataupu fa’apenei, e pei ona galulue ai ma se kamupani tua ma le fa’amoemoe e tatau ona amataina lea tautua i se taimi o le tausaga nei.Na saunoa Kruse, ua avea ma masani fai pei o ni pisinisi tulaga i le taulimaina o mataupu fa’apenei i luma o le fa’amasinoga maualuga, ma fa’aauau ai le tolopo i se taimi umi e aunoa ma le naunau ina ia maua se taunu’uga mo mataupu ta’itasi nei.Saunoa Kruse, e alaga tatau mo tagata lautele, vaega o loia atoa ai ma fa’amasino ona fa’ataua tulaga o taimi ma tupe fa’aalu. E le gata fo’i i lea, sa ia taua, o nisi o talosaga o tagi a mae’a loa ona fa’aulu, ona ta’atia ai lava lea ona o le tele o isi mau talosaga ua faila e uiga i lea mataupu.Saunoa Kruse, ina ia fa’asao ituaiga mataupu ia, ua ia fautuaina le vaega o loia ma fa’amasino ina ia fa’atula’i se alafua e iloilo ai mataupu eseese ina ia taunu’u i se taunu’uga fa’ai’u e aofia ai ma apili.Mo se fa’ata’ita’iga e pei ona saunoa le fa’amasino sili, o mataupu tau i ulugali’i tete’a poo le mataupu fo’i i le totogiina o fanau, e tatau lava ona mae’a i totonu o le 90 aso pe itiiti ifo fo’i.Saunoa Kruse, o mataupu tau i fanua ma suafa e tatau lava ona fa’amae’aina i totonu o le tausaga e tasi e aofia ai ma isi fo’i mataupu savili o lo’o faila atu i luma o le fa’amasinoga.Fai mai le ali’i fa’amasino sili, o se tasi lenei i amioga o lo’o maitauina i luma o le fa’amasinoga fa’aitumalo i le taimi nei, e le gata o le fa’atulagaina o mataupu ae o le fesuisuia’i o loia e tutula’i i mataupu nei i taimi ma aso eseese.I le fa’aiuga o le poloaiga na tu’uina mai i le ali’i fa’amasino sili, ua ia taua ai lona naunau e talanoaina se ata fa’ata’ita’i mo le fa’atulagaina o alafua ma taimi mo mataupu ma fa’aiuga o mataupu eseese nei, e aofia ai ma le iloiloina o fautuaga ma le asosi o loia ma fa’amasino.