O le ali pagota lea o lo o tuuaia e le malo na sola ese mai i le toese i Tafuna i le tausaga na te’a nei, a’o pisi ai pagota i le latou faiga lotu o le taeao, ua molia nei i le moliaga mamafa o le sola ese lea mai le falepuipui.

O le alii o Pouniu Liu lea o lo o loka i le falepuipui mo le 10 tausaga, ona o le faalavelave lea na ia ulufale faamalosi ai i totonu o le fale o se fafine ma sana fanau e toalua i Pava’ia’i i le tausaga na te’a nei, ma ia taumafai ai e faia ni uiga mataga i lea fafine ao ia tuu le naifi i lona ua, e ono toe faaopoopo e le faamasinoga maualuga le isi 5 tausaga i lona faasalaga o lo o tuliina nei, pe afai ae faamaonia le moliaga fou lea ua toe molia ai o ia.

E tusa ai ma faamaumauga a le faamasinoga o lo o taua ai e faapea, ao fai le faigalotu a pagota i le taeao o le aso 13 Aperila 2011, na tulai ai le alii pagota o Kiki Talamoa ma faitau pagota o lo o i ai i le faigalotu.

A’o faitau e Talamoa le aofai o pagota, sa ia maitauina ai e toalua pagota ua leai mai totonu o le fale, o le alii ua molia nei o Liu, faapea ai ma le isi alii pagota o Derek Ropati, lea foi ua molia e le malo i le mataupu lava lenei.

Na logo e Talamoa leoleo o le falepuipui i le mea ua tupu, ma logoina ai loa le Vaega o Leoleo Suesue e uiga i pagota ua sosola.

I le afiafi o le aso lea lava pe tusa o le itula e 5:35, na toe maua ai e Leoleo Suesue se isi faamatalaga mai se molimau faalilolilo e faapea, o lo o i ai Liu ma Ropati i le fale o le tuafafine a Ropati.

E lei toe faatali leoleo i se isi mea, ae na agai sa’o atu loa i le nofoaga lea o lo o i ai le fale o lo o i ai alii pagota sosola.

Na taunuu leoleo ma latou maua atu i ai Liu ma Ropati, ma toe aumaia ai loa i laua i le toese i Tafuna.

Ina ua fesiligia e leoleo ia Liu i le mafuaaga o lona sola ese mai le toese, sa ia taua ai e faapea, na mafua ona ia sola ese mai le toese, sa fia alu e fesoasoani i le latou aiga i le faiga o feau ma alu se’i tau saili sana galuega.

Sa ia faitio foi i le fafagaina lea o ia ma isi pagota i meaai faaletonu.

E le o se taimi muamua lea ua sosola ai i tua ni pagota ao taofia ai i le toese. O le isi solaaga pagota i le lua tausaga talu ai, na o latou osofaia ai se alii ave taxi i Vailoatai e ala i lo latou fasiina lea o ia ae fao faamalosi ana tupe sa i ai.

O le isi solaaga a pagota na sosoo ai na o latou osofaia ai se alii leoleopo o le faletupe o le ANZ Bank i Tafuna, lea na matua manu’a matuia ai lava lea alii i le fasiga o ia e ni pagota se toafa.

O le masina fou lea ua faatulaga e toe fofogaina ai le mataupu a Liu i luma o le faamasinoga maualuga, i le maea ai lea ona  ia teena o lona moliaga fou i le taeao ananafi.