O le aso Gafua na tea nei na tatala aloia ai se tusi a le Ekalesia Faapotopotoga a le Atua (Assemble of God) i Samoa ma Amerika Samoa nei, e tuu faatasi uma ai galuega faatino a le ekalesia, amata mai lava i le uluai taimi na faavae ai seia oo mai i le taimi nei, e pei ona vaaia ai le ola ma le tupu o le lotu.

O le afioga Fuimaono Fini Aitaofo Seiuli na tuu faatasia lenei galuega, lea na la galulue faatasi ai ma le faletua ia Daiana Sesepasara-Aitaofo ma o la alo, ma ua avea ai o se latou sao faatasi lea i le galuega a le Atua.

Saunoa Fuimaono,  “O lenei tusi ua talafeagai lava ma le agaga fia fai meaalofa ai fo’i i le aso soifua o le susuga le Ta’ita’i Rev. Elder Sioasi Mageo, ae maise fo’i o se toe fa’atepa lava o i tatou i ulua’i Misionare Samoa  sa latou asaina le gasu o le tai taeao e tusa ai o le galuega fita o tala’iga i Samoa na lua, ae ua lago mau mai i latou nei i ti’asa. O i latou ia e aofia ai le faletua o Malaea Lutu Mageo ma Fa’atamali’i Sesepasara.”

“E lima tausaga o taumafai e tu’ufa’atasia lenei tusi, ua mafai ona fa’ailoa i totonu o le tusi ni ona vaega na aumaia i nisi o tusitusiga fa’aperetania mai le Ekalesia Autu na amata tala’i i Amerika Samoa - Pentecostal Evangel. Ua latou fa’ataga fo’i le toe lomia o fa’amaumauga uma ua latou faia mai tausaga amata o le AOG i Samoa ina ia tu’ufa’atasia i lea tusi o le tala’aga ua mae’a lomia nei.”

O le susuga le Ta’ita’i o le AOG i Amerika Samoa Rev. Siaosi Mageo sa ia tatalo e fa’amanuia i le galuega ua mae’a ma o le a mafai ona fa’atauina e le lautele o le Ekalesia ma so’o se tasi fo’i e manana’o e fia iloa nei fa’amaumauga uma. Peita’i, sa i ai i lea po o nisi o aiga o le au tusitala fa’atasi ai fo’i ma Faife’au ma latou faletua, ina ia latou mua’i talia ulua’i kopi o le tusi, fa’atasi ai ma nai fa’amanuiaga sa saunia e le au tusitala mo lo latou talia o le vala’au fa’aaloalo e auai i lea po’o fa’amanuiaga tau fa’amaumauga ua mae’a tamau i tusitusiga.

Na saunoa le Ta’ita’i AOG i Samoa & Amerika Samoa, Rev. Elder Siaosi Mageo, ia fa’afetaia le Atua i galuega ua mafai ona mae’a ona fa’atino, aua o mea ia e iloa ai, na faia le galuega ma le loto ia mae’a ma ia aoga. A tatou faitau i ai, e maua ai se isi toe fa’amalosi i lo tatou ola auauna ai i le Atua, ae le gata i lea, ia fa’amalosi atu ai fo’i i se isi agaga ia galue mo Ia!”

Ua fa’ailoa mai, o lo’o maua le tusi lenei i le ala o fa’atauga i luga o le uepesite :finiaitaoto po’o sau kopi fo’i e fa’atau sa’o mai le autusitala i Malaloa lava.

O lea afiafi sa fa’ai’u i le ‘aiga fiafia, e sami ai fo’i lea galuega tele, ma ua talafeagai fo’i le mae’a o lea galuega, ma tauaofiaga a le Fonotele a le AOG lea e usuia i Samoa i le masina nei lava! O ituaiga o galuega nei, e sapaia e le to’atele, ina ia mautinoa ua latou iloa le tupuga mai o le Ekalesia, ma ia latou fa’amaumau ma fa’aauau le tala’aga i tausaga ta’itasi.