Tatala tautua a le Tri Marine i le tausaga nei

O le vaiaso na te’a nei na faalauiloa mai ai e le pulega a le kamupani o le Tri Marine International ni isi o a latou fuafuaga e tusa ai o le latou auaunaga i le atunuu, e pei o le tatalaina lea o le vaega lua o le latou Fale Tuuaisa ua faaigoaina o le (fresh and frozen facility) i le lala o le latou kamupani, le Samoa Tuna Processors (STP) i le masina fou, atoa ai ma le tatalaina aloaiaina o lana auaunaga mo le atunuu i le fale tuuapa ‘ia i le masina o Setema 2014, ae le o le tausaga fou.

 

O sui o le kamupani na malaga mai ma feiloa’i ma sui o le malo i le vaiaso na te’a nei e aofia ai le Pulesili, ia Renato Curto, o ia fo’i lea o le ta’ita’ifono a le kamupani, susuga ia Joe Hamby lea o lo o faauluulu i ai gaioiga a le kamupani atoa ai ma ni isi o sui sinia, lea na feiloa’i ma le Lutena Kovana ia Lemanu Peleti Mauga ma isi sui o le malo i le aso Faraile na te’a nei.

 

Na taua e le sui faapitoa o le alii kovana ia Iulogologo Joseph Pereira i le Samoa News e faapea, o le taimi o le asiasiga i totonu o le nofoaga lea ua faamoemoe e faatino ai galuega a le kamupani, na faailoa aloaia ai loa e Curto ia Lemanu, o le masina o Setema o le tausaga nei e tatala aloaia ai galuega a le kamupani i le tulaga o le tuuapa ina o ‘ia, ae le o le tausaga fou e pei ona ulua’i faalauiloa mai.

 

Na taua atili e Iulogologo e faapea, e le gata na faamalulu Lemanu ia Curto ina ua le auai atu le afioga i le kovana ia Lolo Matalasi Moliga i lea feiloaiga, ona o ni isi o tuatuagia le ma’alofia, peita’i ua sauni le faigamalo e ofoina atu lana fesoasoani i soo se vaega, e lagolago ai taumafaiga a le STP, lea fo’i o le a mafai ai ona maua le silia i le afe galuega mo tagata Amerika Samoa.

 

I lea feiloaiga, e le gata na faafetaia ai e Lemanu le naunau atu o le kamupani e vave tatala la latou auaunaga mo Amerika Samoa, ae sa faalauiloa ai fo’i e Curto le sauni o le kamupani e galulue faatasi ma le malo, atoa ai ma le faalauiloaina o le latou aisa fou lea o le a tatalaina i le masina fou, lea e 4,400 tane (tons) o i’a e mafai ona teuina ai i totonu.

 

Sa faailoa fo’i e Curto ia Lemanu e faapea, talu ai o le naunau o le alii kovana ina ia faatelevave gaioiga a le kamupani ina ia maua ai ni galuega mo le atunuu, ua ia manatu ai loa o le a una’i fuafuaga uma ina ia tatala ia Setema o le tausaga nei, ma o lea tala na matua lagona ai e Lemanu le fiafia ma ia faafetaia ai le susuga Curto ma lana pulega, i lo latou lagolagoina o taumafaiga a le faigamalo e faaleleia galuega ma fesoasoani i le tamaoaiga o le atunuu.

 

I se feiloaiga a tusitala ma le susuga Curto, sa ia faaalia ai lona agaga fiafia ina ua maua le avanoa e toe taliu mai ai i le teritori, le nofoaga e pele i lona loto, faatasi ai ma le faanaunauga e faanatinati fuafuaga mo le tatalaina o le tautua a le STP.

 

O se tasi o mafuaaga o le toe malaga mai o Curto ma nisi o lana pulega i Amerika Samoa nei, o le fia vaai lea i le tulaga ua i ai le toe faaleleia o fale o le a avea ma nofoaga autu a le kamupani i Atu’u, atoa ai ma le taumafai e faanatinati tapenaga ina ia tatala galuega uma ia Setema o le tausaga nei.

 

Sa ia taua fo’i e faapea, i le atoa ai lona 69 tausaga ia Tesema 2013, ua ia manatu ai e fia vaai ua tulaga lelei ma mautu fuafuaga uma a le kamupani a’o le i atoa lona 70 i le tausaga nei.

 

O le masina o Aperila o le tausaga na te’a nei na tatala ai le fale tuu aisa a le kamupani (Cold Storage) ma le faamoemoe o le isi laasaga lona lua o lea galuega ua fuafua e tatalaina i le masina fou, e pei ona faamaonia mai e Curto, atoa ai ma se tasi o fuafuaga a le kamupani, o le faatauina mai lea o i’a fou mai tagata fai va’a fagota i le atunuu, mo le faamoemoe e faamama le aano o le i’a ona auina atu lea i maketi i fafo e faatau ai.

 

O lea tautua e pei ona taua e Curto, o se mea fou toe ese mai fo’i i auaunaga o lo o i ai, ma o se auala ua manatu ai le pulega e fesoasoani ai i le itu tau tupe a le kamupani, e le gata o le a galulue i le tuu apaina o le i’a, ae o le a latou auina atu fo’i le aano mata o le i’a i maketi i fafo e faatau ai.

 

faaliliu Ausage Fausia

Comment Here