Ads by Google Ads by Google

Tatala tauaofiaga a le Fono, leai se paketi fou a le malo

E o’o mai lava i le toe tatalaina aloaia o le Fono Faitulafono i le taeao ananafi, e le’i o’o atu lava i luma o le Fono le Paketi a le malo mo le Tausaga Tupe fou 2013, ma o se tulaga e le fou i le Fono lea tulaga.

Na saunoa le afioga Senatoa Velega Savali Jr., e na o Amerika Samoa lava le atunuu e tiga ona latou iloa o lo o soli le tulafono, ae soli lava.  Na fa’aalia e le sui o le senate, e lava lona iloa o le mataupu lenei ona sa avea foi o ia ma Teutupe a le malo i tausaga ua mavae, ma e i ai vaega o le paketi e tatau ona tuu muamua atu i le Fono, ae o le paketi faaiu e tatau ona oo atu i le masina o Iulai ua taulima e le Fono.

Na fa’aalia e Velega, ua tatau ona taumafai le maota e fai gaioiga uma ina ia mulimulitai ma usitaia ai e le malo le tulafono.

I le talanoaina ai o le mataupu e uiga i le paketi, na toe laga ai e le alii Senatoa ia Galeai Tuufuli le mataupu e uiga i se finagalo o le Senate, ina ia tuu atu i le faamasinoga le mataupu ma le ASPA ona o le tulaga i le paketi e pei ona vavao ai i taimi ua te’a.

Saunoa Galeai, ua maea ona faailoa mai e le alii faipule ia Faleomavaega Eni le ripoti a le Vaega Suesue a le Konekeresi a Amerika sa faia e uiga i le mataupu a le ASPA ma le Fono, ma taua ai e le fetaui le finagalo o le ASPA fai mai e pule lava latou i le latou paketi.

“O loo lagona le pologa o le atunuu i le taugata o le uila, o fea o loo taoto ai se finagalo o le fono, ae ou te tatalo atu, ua tatau ona faaoo le tatou mataupu i le Faamasinoga manu e lei maea le tatou tauaofiaga mulimuli lenei,” o le saunoaga lea a Galea’i.

Saunoa Senatoa Mauga Tasi Asuega e faapea, e tatau ona toe fesiligia le Teutupe a le malo ina ia faamanino tulaga i tupe a le malo, poo fea o ave i ai i le taimi nei, ae e fia foi se tupe o totoe a le malo ma ni ana aitalafu o loo i ai.

“E tatau ona malamalama le fono i aitalafu a le malo o loo i ai, o tupe o loo totoe atoa ai ma tupe mai le feterale o loo maua ma ua le toe maua mai foi, ina ia malamalama le fono ao lei talanoaina le paketi o le tausaga tupe fou,” o le saunoaga lea a Mauga.

Ae na saunoa le Peresetene o le Senate ia Gaoteote Palaie Tofau e faapea, e leai se mea o le a atugalu i ai le maota i mataupu nei, aua o loo i ai le maota le malosi e faatino ai suesuega uma e manaomia.

I le mataupu a le ASPA, na saunoa ai Gaoteote e faapea, ua maea ona tofia le Komiti Suesue a le Senate latou te taulimaina mataupu nei, afai foi la e i ai nisi mataupu o loo nenefu ma le mafai ona manino, o le tiute o le Komiti Suesue faaaoga lona malosi i lalo o le tulafono e faatino ai ana faaiuga.

Afai e maea le vaiaso lenei e le oo mai le paketi i le Fono, o le a le avea lea ma itu e taofia ai galuega a le Fono, e le faatali ai foi le maota maualuga ae o le a faaauau pea ana galuega masani.