Tatala sauniga o le fu’a i se sauniga lotu

O se sauniga lotu fa’alemalo na fa’atautaia i le maota o Gov. Rex Lee Auditorium i Utulei i le afiafi o le aso Sa na te’a nei, na tatala aloaia ai sauniga ma polokalame mo le fa’amanatuina o le 114 tausaga o le fu’a a Amerika Samoa.

 

O le susuga Rev. Poututasiomalo Bishop Petelo Brown na taitaia le sauniga lotu, faatasi ai ma le lagolagosua a le susuga i le alii faifeau ia Rev. Elder Siaosi Mageo o le Ekalesia AOG i Amerika Samoa.

 

O ni isi o taitai o le malo sa auai i lenei sauniga e aofia le faletua  o le kovana, ia Cynthia Moliga, o le afioga i le kovana le tumau ia Lemanu Peleti Mauga ma le faletua, Taitai o le fono faitulafono, ma le afioga i le fa’amasino sili ma lona faletua.

 

O le sauniga lotu lenei e masani ona faia i le Malaeoletalu i Fagatogo, e tatala aloaia ai sauniga o le fu’a i le tele o tausaga ua mavae, peitai o le suiga talu ona tula’i mai le faigamalo a Lolo ma Lemanu, ua mafai ai ona fa’aaoga le maota o le malo i Utulei e fa’atino ai lenei sauniga taua.

 

Sa faamamafaina i le sauniga lotu le taulaga fa’afetai a Amerika Samoa ma ona tagatanuu uma, ina ua mafai ona taitaiaina mai e le Atua soifua a ona taitai ma le atunuu, ua aulia mai ai lenei aso taua e faamanatu ai lo la sootaga faaauau pea ma le malo tele o Amerika.

 

Sa manatua fo’i i talosaga i le taimi o le sauniga le toesea ai o le afioga i le alii kovana ia Lolo Moliga, ona o lo o aumau ai i Hawaii i lona gasegase, ina ia vave se taimi e toe mafuta ai o ia ma le atunuu.

 

O le mae’a ai o le sauniga na faalauiloa aloaia ai loa le tatala aloaia o polokalame mo le fu’a a le atunuu i lenei tausaga, ma o le aoauli ananafi faatasi ai ma le po anapo na tatala aloaia ai fa’afiafiaga fa’a Samoa mo le vaiaso lenei o le fu’a, i le malae o le Su’igaula a le Atuvasa i Utulei. E fa’aauau fa’afiafiaga i Utulei i le po nei e oo atu i le po  o le aso Lulu.

Comment Here