Ads by Google Ads by Google

Tatala ofisa Dr. Saleapaga i le Ofisa Soifua Maloloina

Ua sauni le alii foma’i ia Dr. Iotamo Saleapaga e toe faaauau lana tautua sa masani ona ofo atu mo le atunu’u i le vaiaso fou, e pei ona tautua ai ao galue i lalo i le LBJ i Fagaalu.

I se faatalatalanoaga ma le alii foma’i i le taeao ananafi i le Ofisa o le Soifua Maloloina, sa ia faamaonia mai ai i le Samoa News lea tulaga.

“Masalo o le Aso Gafua e tatau ona tatala ai lo’u Ofisa iinei i le Soifua Maloloina, ma toe faaauau ai la’u tautua mo le atunuu.  Pau le itu taua o a’u lea ua ou galue mo le Matagaluega o le Soifua Maloloina, ua ou fiafia foi e toe ofo atu la’u tautua mo le atunuu,” o le saunoaga lea a le alii foma’i, faatasi ai ma lona le mana’o e faalauiloa nisi tulaga o lana galuega fou.  “E mae’a loa ona faatulaga mea uma mo le ofisa fou ma sauni la’u computer ma mea uma faapena e manaomia, tatala loa ma le ofisa i le aso Gafua”.

“O i latou uma lava e fia agai mai e vaai le foma’i, faafesootai mai le telefoni 633-5871 poo le 633-5872 mo le faatulagaina o appointments.”

Na taua e le alii foma’i e faapea, na te le faamalosia se tasi sa masani ona ia vaaia i le LBJ e o atu i lona ofisa fou i le Soifua Maloloina, pau lana saunoaga, o ai lava e manao e agai atu e fia vaai o ia, e tatala le avanoa.

O se ulugalii Amerika Samoa o lo o nonofo mau i Samoa i le taimi nei, na malaga mai i le vaiaso na te’a nei mo le la talavai ia Dr. Saleapaga, a tete’i ina ua oo atu i le falema’i ae faailoa ane e se teine faigaluega e le o toe faigaluega le alii foma’i i le LBJ, ma taumafai ai loa le ulugalii e saili le mafuaaga o le faafitauli.

Na taua e le tama o Lesa Lameko e faapea, e ta’i lua lava masina ma la malaga mai ma le tina o le aiga mo le la talavai ia Dr. Saleapaga, ae ua faateia i laua ina ua taunuu mai ua e le o toe faigaluega le alii fomai.

E toalua foi isi tina matutua sa i ai faatasi ma Lameko i le nofoaga o le LBJ sa la faaalia lo la naunau pea e fia vaai ia Dr. Saleapaga.

“E lelei Saleapaga e mafai ona matou talanoa faa Samoa ma faailoa i ai mea o loo tiga o le tino poo isi lava fo’i manaoga, ae o isi foma’i e le o ni Samoa, e faigata tele ona matou o i ai ona e le lelei ni a matou nanu, e faigata foi ona faailoa sa’o i ai le mea o lo o mana’omia ma tiga o le tino,” o le saunoaga lea a Lameko.

O le masina na te’a nei na faamuta ai e le LBJ le tautua a Dr. Saleapaga, ina ua le toe faafouina e le falemai lana konekarate.

E lei mafai ona tuuina atu e le pulesili a le LBJ o Michael Gerstenberger ni faamatalaga e faatatau i le faaiuga e le toe faafouina ai le konekarate a le alii foma’i, ina ua fesiligia e le komiti o le LBJ/Soifua Maloloina a le Senate, se’i vagana ai le tulaga lea, o lo o faatali le taitaifono a le Komiti Faafoe a le falemai o lo o malaga i fafo mo se isi faaiuga.