Ads by Google Ads by Google

Tatala ofisa autu ASCADSV - Tafuna

O le taeao o le Aso Gafua sa tatala ai faitoto’a o le Ofisa fou mo Fa’apotopotoga NGO/NPO e le o ni lala o le Malo, ma e le o ni fa’apotopotoga fo’i e maua ai ni Polofiti, ae ua fa’atuina ina ia taga’i toto’a i ala e mafai ona fesoasoani ai i tagata o le atunu’u ua fa’asauaina i totonu o Aiga, ma nisi fo’i ua soifua i olaga fa’ataugaina fa’aleituaiga i le li’o lava o lona aiga po’o nisi fa’apotopotoga e mafuta i ai.

O le Amerika Samoa Coalition Against Domestic & Sexual Violence (ASCADSV), o lo’o i ai lana komiti fa’afoe, e avea ai le susuga Rev. Tafailematagi Muasau o le Ta’ita’ifono. O le fa’atonu o le susuga Mata’utia Liliu Ma’ilo ma e to’avalu totino o le Komiti Fa’afoe.

Ina ua tafa le finagalo o le afioga le Kovana Sili Togiola Tulafono ma taua’ao ane se fale i le atufalega i le Paka Liona mo se Ofisa autu o lea Fa’apotopotoga ASCADSV, na latou toe saili nisi o a latou aumea mamae i le auaunaga mo le mamalu lautele o le atunu’u e ala i nisi fo’i mana’oga feso’ota’i ma le latou fo’i manulauti, ma ua fiafia Mata’utia e fa’ailoa mai, e lua nisi ua latou fa’afaleula ina ia fetufa’i i latou, feso’ota’i fo’i a latou tautua, ina ia mautinoa ua faia le galuega tima’i ma fesoasoani i sui ua matauina, ua sauaina.

O nei fa’apotopotoga e lua o le Pualele Foundation ma le GRASPS e matele nei fa’apotopotoga i faufautua i tagata i o latou pagatia ona o sauaga i totonu o latou aiga.

“O le malosi’aga o nei ituaiga o fa’apotopotoga e le maua ai ni tupe fa’asili, ina ia maua se fa’atupega e fa’atautaia ai auaunaga, o lo latou galulue fa’atasi i le auau na mafua ai ona fa’atuina le fa’apotopotoga, ae le o le mea e manana’o i ai o latou totino ta’ito’atasi.” O se molimau ola lea a le sui mai Samoa, o le CEO o le SUNGO [Samoa Umbrella for Non Government Organizations]. O ia lea, Roina Fa’atauva’a Vavatau, sa avea ma se tasi o molimau fa’amalosi’au i saosaiete po’o fa’apotopotoga sa aofia i le taeao ananafi, e molimauina le fa’amautu atu o ASCADSV, le Pualele Organization ma le GRASPS i le latou Ofisa autu i le Paka Liona.

Na muamua atu le sao o le faletua o Maiava Visekota Peteru mai fo’i i Samoa, o se tasi sa auai ia i latou na fa’atuina le “Maota o Sulufa’iga” i Samoa, lea ua lauolaola, ma ua aoga fo’i i aiga ua afaina pea i sauaga i totonu o le latou mafutaga fa’aleaiga.

“Ia tatou iloa lelei, i so’o se tagata lava ua soifua, e i ai lana aia tatau e ola sa’oloto ma le fiafia ai i totonu o lona aiga, ma isi mea uma e mafuta atu i ai o ia, a’o soifua. O mea e ao ina ola fiafia ai le tagata, e amata mai lona aiga, a’oga, ekalesia ma lona aiga lautele!”

Sa fa’aauau lana fa’amatalaga ma ia fa’apea ai, “Ua le na’o Samoa na lua e tutupu ai sauaga i totonu o aiga, ua le avea fo’i le avea o oe ma to’alua o se tamaloa, e fai ma mea e fasia ai oe i totonu o le li’o o lou aiga! O le li’o lea, e sili ona alagatatau, ona e malu ai!”

“O a sauaga nei ua a’afia ai i tatou? E mautinoa e le tasi, ae ua lasi!” O le sauaga muamua lava o le fa’ao’olima o le tasi i le isi, sauaga lona lua mo le fanau, o le le va’aia lelei a’o i ai le tamaititi i lona olaga e fa’amoemoe i ona matua e fagaina, fa’ata’ele ma va’aia lona saogalemu.”

“I tagata matutua, o le fa’amaasiasi le isi sauaga e sili ona ogaoga ona taunu’uga tumai i le tagata soifua, sa sili ai ona fa’asaua le tagata i le fa’ao’olima ia te ia.”

A’o le’i tula’i le sui o le ASCADSV e fa’afetaia i latou na tofusao mo le latou lea fa’amoemoe ua tino mai ma ua mae’a fa’anofoia ai i latou, sa mua’i tula’i le Kovana Sili na te fautuina nei Sosaiete ina ia galulue e fa’aaoga le Maota, ma ia sili ona aoga a latou auaunaga, e manuia ai nisi o pagatia o le atunu’u.

“Ia sili ona aoga lo outou tomai, lo outou naunauta’iga e auauna atu i nisi e fa’amama avega i o latou puapuaga, o le autu tonu lena o lenei foa’i, se’i tali se fanoga o lo outou ola totoa e tutula’i mai e fesoasoani ma fa’asao se lagona o’otia i e ua mana’omia lau fesoasoani.”

“Ia tatou iloa le fetalaiga a le Atua ia Isaraelu, ina ne’i galo ia te’i latou le autu na ala ai ona tatou saili fesoasoani mo nei uso ua pagatia i sauaga, “Ia tusi i papa ma’a o outou loto, ia asoa ai i o outou ua!” Oka se fa’ailo a le Atua i lona fanoga i galuega feso’ota’i ia tautuaina e ua puapuagatia i sauaga! Fa’ao’o lau galuega, ia aoga mo isi!”

O mafuaaga o le fa’aletonu, sa pa’i i ai le Kovana fa’apea Roina Fa’atauva’a ma sa fa’apea ai, “Ia iloa afai e taua’aoina mai tupe e fa’atautaia ai galuega mo e mana’omia, e ao ina toe fa’amaumau lelei mo le toe fa’ailoa atu ia i latou na taua’ao mai ai le foa’i tupe! Afai e leai, o le afuaga tonu lea o le malepelepe o tatou Sosaiete!”

Na fa’afetaia e Mata’utia le tele o Kamupani na latou fesoasoani e fa’atupe le latou Ofisa, ma sa aofia ai Kovana ma le Admin Services lea ua toina mai ai lenei fale mo le latou ofisa autu. Taufete’e John Faumuina ma le Ofisa o le Criminal Justice, Silver & Gold Buyers, 5M Inc. a le tama o Albert Mailo ma le latou Ofisa, le Au Si’isi’i Uamea Mamafa, IBC ma le aiga o Nofoagatoto’a ma le Origin Gas ma le pule ia Richard Young.

Ua fa’ailoa mai fo’i, le auaunaga sa mo’omia mo le Maota o Sauaga e faasaga i tina ma tama’ita’i (Violence Against Women), o i latou nei o le a fa’atautaia lea galuega, faufautua ma fa’anofoia lelei aiga pagatia i potu o lea maota o le Matagaluega o Tina ma Talavou ua mae’a fausia.

I le keke o le aso fa’apitoa mo lea nofoaga sa toto’o i ai le tina o Roina Fa’atauva’a ma le faletua o Maiava Visekota Peteru, ae o le lipine e tatala aloaia ai le Maota lea, sa o’otia e le Kovana Sili. Na maimoaina le matagofie o totonu o lea fale ina ua mae’a toe fa’afouina, vali ma fa’ameaafale mo le auaunaga a nei Sosaiete NGO/NPO e tolu. O se ‘aiga fiafia fo’i sa saunia mo le mamalu lautele sa auai, ae o vi’iga ma pesega o le sauniga na tatala ai lea maota, sa usuina e ali’i a’oa’o Kanana Fou Seminary ma latou faletua.