Va’a Fagota San Nunamea - taofia se’i mua’i totogi se Tupe mo le tagi a Kalolo Petelo & Isi

Mai lea so 28 Oketopa, 2011 na faia ai le fa’ai’uga a le Fa’amasinoga Maualuga o Amerika Samoa ina toe tatala le San Nunamea e toe fagota i le vasa pasefika, ina ua malie le fa’amasinoga maualuga a Amerika Samoa i se latou vaega tupe ua fa’amatu’u mai e totogia ai ni sala a le va’a e tusa ai o tagi na fa’aulu e se tasi o lana auva’a, Kalolo Petelo o le tatou tagatanu’u.

Ina ua saisaitia le va’a e le fa’amasinoga maualuga o le tatou malo, ia Aukuso 25, 2011, e afua lea ina ua fa’aulu le tagi e Kalolo Petelo, ona o ni ona manu’a a’o avea o ia ma tagata fagota i luga o lea va’a. O lea tagi e fa’asaga sa’o lava i le va’a fagota o le San Nunamea, lona afi, meafaigaluega,neti ma le e ona lea va’a, Sanford Limited.

Ina au taofia lea va’a mai le toe tu’uva’a ese atu, na fa’atonuina e le Fa’amasinoga Maualuga le kamupani a Neilsen Beaumont Maritime Inc. e tula’i mai e suia le Kamupani moni e ona lea va’a i le fa’amasinoga.

E tusa ai ma le fa’aiuga a le fa’amasinoga, ua malilie fa’atasi itu uma o lea fa’amasinoga, ina ia fa’amatu’u mai e le San Nunamea & Sanford Limited lea e suia e le Nielsen Beaumont Inc., le tinoitupe e $3miliona ma lona tupe fa’asili e 6% i le tausaga, ina ia totogia ai ni salatupe ua fa’atulaga e le fa’amasinoga e tusa ai ma tagi ua fa’asaga i lea va’a ma lona pulega i Amerika Samoa.

Ua fa’apea fo’i malilie mai le va’a ma lona pulega, latou te totogia uma pili o le taula ai e tatalia le fa’ai’uga a lenei fa’amasinoga, o gaoioiga uma i le taofia ai le va’a, fa’atasi ai ma nisi pili fa’ae’e i le sailiga ma su’esu’ega ua faila i le fa’amasinoga a’o le’i toe tu’u atu le va’a fagota lea e malaga ese atu mai Amerika Samoa.

Na fa’atulaga fo’i ina ia mua’i fa’ao’o ane i le teugatupe a le Nielsen Beaumont Inc. ona fa’ato’a tatala lea  o le Sa Nunamea e malaga ese atu, ae o le totogi o le fa’amasinoga ma is fa’ai’uga uma ua fa’atulaga mai o le a totogi sa’o lea i le fa’amasinoga.

Ua malie fo’i le fa’amasinoga ina ia totogia mai e le San Numamea ma lona pulega le aofa’iga e $15,000. i le taimi lava lea ia Kalolo Petelo e tusa ai mea e le’i totogia e le va’a i ona togafitiga ma lona nofo ai i le falema’i ma togafitiga, ae afua mai lea aso se’ia pa’ia le taimi e fa’ao’o ane ai le fa’aiuga a le fa’amasinoga i se vaega tupe e alagatatau ma afaina o Kalolo Petelo, e ta’i $40. i le aso e totogia ia Petelo.

Ua mae’a fa’atulaga fo’i aiaiga e le toe fa’alavelave ai le Va’a fagota lea i nisi tu’ua’iga fou mai le Sui na tagi, peita’i, o le a tu’uina i sui uma e fia tagi e fa’asaga i le Va’a fagota lea ma lona Pulega le 120 aso mai ia Oketopa 28, 2011 ina ia fa’aulu ai a latou tagi, ona tatalia ai lea o le fa’aiuga a le fa’amasinoga i le aofaiga o salatupe mai lea va’a fagota mo i latou uma.

O lea fa’aiuga a le fa’amasinoga sa taua’aoina e tusa ma le 40 itulau le umi ae sainia lelei e le afioga le Fa’amasino Sili Michael Kruse.

Sa ‘ese’ese le tinoitupe sa fa’aalia i tala na tusia a le Talanei News ma le tala na tusia i le Samoa News i le aofaiga o le tupe na totogia mai e le Sanford Limited i le Nielsen Beaumont Inc. e fa’amatu’u mai mo ni sala a le San Nunamea i Amerika Samoa, i le Talanei ia Oketopa 4, 2011 na fa’ailoa ai e $4miliona le vaega tupe na fa;amatu’u mai, ae o le tala a le Samoa News Oketopa 28, 2011 e na’o le $3miliona.

Peita’i i le tala a le talanei sa fa’ailoa ai le isi tagi na fa’asaga lava i le San Nunamea ma lona pulega. O le tagi lea sa fa’aulu e se tasi e igoa ia Joel Magalasin . E $15,000. fo’i ua mae’a fa’atulaga e totogia ia te ia i le amataga, ma le $25. e totogia ia te ia i aso ta’itasi e tatalia ai le fa’ai’uga a le fa’amasinoga i se aofaiga o le tupe e tatau ona ia maua e tusa ai o lana tagi e fa’asaga i le va’a. O lea sui, e foliga mai e le o se tagatanu’u o Amerika Samoa po’o Samoa fo’i, ae le mailoa pe o alaala i Amerika Samoa o ia.

Peita’i i le taimi nei, o le loia o lo’o tula’i mo Kalolo Petelo o le ali’i loia mai le Malo tele, ma sa i ai o ia i le Ofisa loia i Pago Pago lea e mafai ai ona tagi ane uma i ai tagata e lavevea ma le totogia e va’a fagota sa faigaluega ai i luga o le uafu pe fa’aauva’a fo’i.

O lo ua i ai nei Petelo i San Diego mo ni su’esu’ega lava i lona afaina mai lona faigaluega ai o se tagata fagota i le va’a lava lea, ma ua le toe fagota ai nei.

saunia: Leua Aiono Frost