Na faamaonia e kovana Togiola Tulafono i le fonotaga ma le Palemia ma le aumalaga mai  Samoa i le vaiaso na te’a nei, le malie mai o le matagaluega o Faatoaga a le malo tele, e tatala le aumaia o aano o manu mai Samoa mo faaoso, pe afai e mautinoa ua faavela lelei.

E ui o lea ua tatala se tasi o vaega sa naunau i ai taitai o malo e lua, peitai o le sini autu e pei ona saunoa Togiola ma le susuga Tuilaepa Sailele Malielegaoi, ia mafai ona i ai se maliliega mo fefaatauaiga i le va o malo e lua.

Ua tuuina atu nei se talosaga a Amerika Samoa i le Failautusi o le Initeria, mo le faataotoina mai lea o aiaiga o se maliliega mo fefaatauaiga i le va o Samoa ma Amerika Samoa.

I le fonotaga a taitai o Samoa e lua na usuia i le vaiaso na te’a nei i le teritori nei, e le gata na talanoaina ai tulaga o aano o manu e aumai faa faaoso, ae faapea foi ma aano o manu e aumai e faatau.

Saunoa la Togiola, e faigofie atu aiaiga o aano o manu e aumai mo faaoso ae o aano o manu e aumai e faatau, o iina lea e tele ai faafitauli, ona o lo o atugalu lava le malo tele i le ono mafai lea ona sao mai ai i ona teritori manu nini’i o lo o maua ai faama’i i manu, pe afai e le lelei ona puipui aano o manu o le a aumai i Samoa.

Fai mai Togiola, e tele taimi sa ia talosagaina ai le malo tele ina ia faataga lava na o aano o manu e aumai i Samoa i Amerika Samoa nei, aua o i laua lava o le uso e tasi, ua masani foi tagata o atunuu e lua e feasiasia’i i aiga ma ave faaoso e faaaoga ai aano o manu, ae o le tulafono lea ua saisaitia ai le toe aumai o aano o manu mai Samoa iinei, ua aafia atu ai ma tulaga o fefaatauaiga.

Ae na saunoa Tuilaepa e faapea, e taua foi le tulafono a le malo tele lea na taofia ai le toe aumai o aano o manu mai Samoa iinei, sei tau taofiofi ai le soona fasi o a latou povi ma la’u mai iinei i tausaga ua mavae, ae lelei le tuu se’i tele povi ona toe fasi atu lea ua lelei ma aoga mo fefaatauaiga.

E le fou ia Samoa le tulafono a le malo tele, lea e faasa ai ona aumai aano o manu fasi mai Samoa ma isi atunuu i le teritori nei, e pei foi ona tutupu i isi atunuu tetele o le lalolagi.

Saunoa Tuilaepa, e mafua ona taofi e malo tetele le aumaia o aano o manu papalagi mai atunuu laiti tau atina’e i o latou laufanua, ona e ilitata tele malo tetele nei i oloa o loo gaosi mai i atunuu tau atina’e ma maualalo lo latou tamaoaiga, e le o iloa poo saogalemu ma lelei le gaosiina o oloa nei mo le soifua maloloina o tagata.

O le taimi nei la i Samoa, ua i ai fale fasi manu faapitoa ua fausia e le malo ma le faamoemoe, e mafai ona feaea’i i nofoaga eseese e fai ai manu, ina ia mautinoa e malu puipuia aano o manu i soo se taimi e fasi ai, ma ausia ai tulaga o tulafono e pei ona moomia mai e malo tetele e aofia ai ma Amerika.

O le isi faataitaiga i oloa gaosi i atunuu laiti e pei ona taua e Tuilaepa, o le pisupo lea na gaosi i Samoa i tausaga ua mavae, peitai e le o toe faia i le taimi nei ona ua gau.

Sa i ai le fautuaga a le malo tele tauala mai i le alii kovana, ia siaki muamua le gaosiina o le pisupo i Samoa ina ia mautinoa o lo o vela lelei le aano o le povi ona faatoa mafai lea ona aumai i le teritori nei, peitai na tali Tuilaepa, e leai se mea e toe popole ai fua Amerika Samoa i le pisupo a Samoa e le o toe faia ua gau.