Ads by Google Ads by Google

Tatala Faitoto’a Ofisa o Tala Fa’asolopito Amerika Samoa - Nu’uuli

Ua masani le Ofisa o Fa’amaumaua & Fa’afailele Mata’aga o Amerika Samoa, o se tasi o Ofisa o lo’o fa’atautaia e le Ofisa o le Kovana Sili o le tatou Malo, e fa’asalalau mai le latou mau, ina ia fa’aulu atu nisi o manatu e mafai ona fa’atautaia ai nisi o galuega ma’oti mo lenei tausaga fa’aletupe a le latou Ofisa, peita’i, e matele ina leai ma se tasi e o’o atu i latou fonotaga fa’apenei.

O le tausaga nei, ua manatu le tatou nusipepa, e ao ina fa’alauiloa atili lea fonotaga, ma ia saga tima’i le mamalu o le atunu’u i le gagana e malamalama lelei ai i latou, ina ia o mai e fa’aali o latou taofi e tusa ai o galuega fa’atino a le Ofisa o lo’o fa’amaumauina lo tatou tala fa’asolopito e ala i ata tapu’e, ae maise o ata video ma le tulaga o meatotino a Amerika Samoa o i ai.

O lea Ofisa o Fa’amaumauga o Mta’aga o Amerika Samoa, e ao ina iloa patino e le atunu’u e mafai ona latou fa’amauina fale tetele ua mae’a tutula’i e silia ma le 50 tausaga, ma latou fa’ailo o nofoaga ua avea ma fa’ailo o le Tala Fa’amau o Amerika Samoa. E taumafai i latou e fa’atumauina nei fale ma nofoaga, ina ia atili ai ona mata’ina nei fale ma ‘avea ai ma mata’aga o le atunu’u i e tafafao mai e maimoaina le atunu’u.

O lo’o i ai fo’i matagaluega o le Malo tele e latou te galulue fa’atasi ae maise fo’i o matagaluega o le tatou Malo ina ia mafai ona ia i latou se malosi’aga e mafai ai ona avea se fale po’o se nofoaga ma mata’aga o le atunu’u.

E latou te puipuia la nei mata’aga ma fai fa’alelei ia tumau so latou lelei e fiafia ai nisi e maimoaina, ma e tatala lo latou faitoto’a ina ia mafai ona fa’aofi sou taofi, po’o sou manatu, ae maise o se nofoaga o lo’o e iloa i lou aiga po’o lou fanua, ina ia avea ma mata’aga o le atunu’u.

Afai e i ai sou taofi, o le aso Tofi, Mati 8, 2012 e amata mai le 9:00 i le taeao se’ia o’o i le 5:00 i le afiafi, o le a mafai ona e susu ane ai i le Ofisa o le Historic Preservation i le fogafale lua o le Fale o Pisinisi sa nofoia e le fale’aiga L&L i Nu’uuli, e tuaoi lelei ma le Malumalu “Jesus Saves”.

Ua latou lisia mai nisi o latou galuega fa’ataoto mo le tupe fa’asoa o lenei tausaga 2012. Mai le itu o le aufaigaluega ma lona pulega, ua mo’omia ai ona i ai se latou talavou e fa’afaigaluega ma a’otauina i lea tiute. E ao ina fa’aauau fa’amaumauga o le Tusi o le Aufaigaluega ma ia sailia fo’i se latou tagata “Akiolisi” po’o le tagata sa sailia tausaga ma fa’amaumauga o ni mea e ono avea ma meatotino a le Ofisa o le Historical Preservation.

E mafai ona fa’aalia sou taofi e tusa ai o nei mea ua fa’ailoa i luga, o lo’o taumafai ona fa’atino i lenei tausaga ua mae’a savalia mai ia Oketopa 1, 2012 se’ia o’o ia Setema 30, 2012.

Ua i ai poloketi ua latou lisia e ao ina latou fesoasoani ai i le atunu’u e fa’ailoa i ai ma ia manino ia te’i tatou uma le latou matafaioi tau’ave i totonu o le Malo. E ao ia i latou ona latou fa’aleleia atili ala e mafai ai ona toe taga’i Amerika Samoa i lona tala’aga fa’asolo mai, ia gafatia ona toe fa’atepa le atunu’u i mea sa tutupu i taimi ua tuana’i ma toe maimoa i ai, ma fa’aleleia atili ala e mafai ai ona faia lea matafaioi e le latou ofisa.

O se tasi o latou tiute, o le taumafai lea ia iloa uma e tagata e to’atele o le atunu’u ona fa’aaoga ala’eseese ua maua nei e toe fa’atepa ai i latou i mea sa tutupu mai tausaga ua leva ma ua tuana’i.

E taumafai fo’i i latou e fa’aliliu le Fuafuaga Fa’ataoto a le latou Matagaluega mo le isi lima tausaga o lumana’i nei, i le Gagana Samoa. O se tasi lea o mea ua tatau ona faia, pe afai sa leai nisi e latou te amana’ia e i ai so latou taofi e ao ina folasia i luma o lea Ofisa i tausaga ua te’a.

E ao i lea Ofisa ona latou mafaia ona fa’aalia fa’alauaitele nisi o a latou polokalama video e 3-5 i tausaga fa’aletupe ta’itasi. O se mea lelei tele lea, e mafai ai ona latou fa’ailoa i le atunu’u, o lo’o latou gafatia ona fa’amaumau lo tatou tala fa’asolopito ua tuana’i. Afai e i ai sou taofi e fia fa’aalia, ona o lo’o fa’asalalauina pea lea fa’asalalauga i le fa’aperetania i tausaga ta’itasi, e ao ina e o’o ane i lea Ofisa i so’o se itula faigaluega lava, ma e fa’aalia ai sou taofi, ina ia manino i lea fo’i Ofisa se aotelega o ni mana’oga o le atunu’u e ao ina fa’amauina.

Vala’au i le telefoni 699-2316 ma e talanoa e tusa ai o lea fonotaga po’o se isi fesili o se mea e te fia malamalama ai a’o le’i o’o i le aso Tofi e faia ai lea fonotaga i le Ofisa autu i Nu’uuli.