Ads by Google Ads by Google

Tatala aloaia maota fou a le Fono Faitulafono

E ui i le tele o faafitauli na feagai ma ta’ita’i o le Fono Faitulafono, a’o taumafai mai le galuega mo le tau fausiaina o se tasi o ana Ofisa fou i le tausaga na te’a nei, peitai e le’i avea ia faafitauli ma itu na faalavelaveina ai le galuega, e pei ona molimauina ai le tatala aloaiaina o lea maota fou i le taeao ananafi.

O se sauniga lotu puupuu na faia i le Fale Samoa na tatala aloaia ai lenei faamoemoe, ma agai atu ai loa mo le ootiina o le lipine atoa ai ma le maimoaga i totonu o le galuega, ma toe fo’i atu ai loa i le Fale Samoa mo le taumafataga faapea ai faaaloaloga faaleaganuu na tapena i ai le Peresetene ma le Fofoga Fetalai.

E le’i faatasi atu le Kovana le tumau a le malo, le afioga i le Loia Sili ia Fepulea’i A. Ripley ona o lo o faataotolia i gasegase o le tino, sei vagana ai le Faatonu o le Matagaluega o Galuega a le malo na faatasi atu, le afioga ia Taeaotui Punaofo Tilei, o ia foi lea na tuuina atu le tusi pasi e aloaia ai le galuega.

E ese mai i afioga i Senatoa ma Faipule na auai i le molimauina o lenei faamoemoe, sa faapea foi ona faatasi atu i ai le Kovana Sili filifilia o le atunuu mo le nofoaiga fou, le tofa i le tootoo ia Lolo Matalasi Moliga ma lona faletua.

A’o le’i saunoaga le afioga i le alii Peresetene o le Senate e faalauiloa le autu o le faamoemoe, sa momoli lana faafetai i Senatoa, Faipule faapea ai tagata faigaluega uma o le fono, i lo latou onosa’i ao alo atu ta’ita’i e faataunuu le galuega o le fale.

Saunoa Gaoteote Palaie Tofau e faapea, e le’i faigofie le galuega e le o se galuega taugofie foi, peitai na faigofie ma taugofie ina ua galulue faatasi taitai o le fono ma tagata faigaluega.

“O le fale lenei, e amata lava le galuega o taofi e oo mai lava i le taimi nei o lo o taofi lava, ae faafetai i le Faatonusili o Galuega i le avanoa ua mafai ai ona faamaea lenei galuega,” o le saunoaga lea a Gaoteote e aunoa ma lona faalauiloaina poo ai na taofia le fale.

“E ui lava sa tele tala e faatatau i le fale, o le itu taua ua maea ona fausia ma ua tino mai, e le o se fale mo outou Senatoa poo Faipule, ao le fale o le malo e tautua ai lana Fono Faitulafono, e le faapitoa foi lenei fale mo se tasi, ae fuafua i le lumana’i ma isi tupulaga o lo o fotua’i mai,” o le saunoaga lea a Gaoteote.

E silia i le $600,000 le tau atoa o le galuega na faaulufale  ananafi, lea e aofia ai ma masini komipiuta ua maea nei ona faapipii i totonu e faaaoga i galuega a le Fono.

Mai lea tupe, e na o le $1000,000 le tupe na tuuina atu i le Ofisa e vaavaaia Tupe mai le Feterale (ARRA) e amata ai le galuega, pau fo’i lea o le tupe na mafai ona tuuina atu e le malo mo le galuega, e pei ona saunoa i ai le afioga ia Amituana’i Mika Kelemete sa fai ma sui o le Fono.

“O le isi tupe e silia i le $500,000 na faamaea ai le galuega lenei, sa saili mai lava i totonu o le Fono Faitulafono, e ala i le galuega a taitai a maota e lua, lea ua mafua ai ona maea lenei galuega,” o le saunoaga lea a Amituana’i.

O le Matagaluega o Galuegaa le malo na faamoemoe latou te fausiaina le fale, ae ina ua faamaamulu le Ofisa o Galuega, na sui tulaga ai loa le Kamupani a le Paramount Constructions mo le faamaeaina o le galuega, faatasi ai ma le fesoasoani a tagata faigaluega a le Fono Faitulafono.

O le kamupani a le “PETAIAMEDIA” lea o lo o pule e se alo o le atunuu, susuga Su’a Stephen Petaia sa gafa ma le faapipiiina o masini komipiuta ua mafai ona faaaoga i galuegaa le Fono.