“IA AVEA LENEI MAA FAI MA FAAMANATU TAUTUA A FITAFITA TUAI”

E ui i le faigata ma le le lava o le seleni na faatinoina ai le galuega o le fausiaina lea o le Ofisa autu atoa ai ma le Maa Faamanatu mo Fitafita Tuai uma i le atunuu, peitai e lei avea lea ma itu na taofia ai le faataunuuina o le sauniga e tatala aloaia ai lea faamoemoe, e pei ona faataunuuina i le taeao ananafi i Tafuna.

O le afioga i le alii kovana sili ia Togiola Tulafono ma lana Masiofo ia Mary Ann Tulafono na auai i le tatalaina o lenei galuega tele, lea foi sa molimauina e Taitai o le Fono Faitulafono, faapea ai ni isi o Fitafita Tuai ma o latou aiga na lolofi atu i le fia molimauina o lenei galuega taua.

O le tatalo na saunia e le Feagaiga o le Ekalesia EFKAS i Matuu, susuga Rev. Fouvale Asiata (CPT. US Army Reserve), ma faagasolo ai loa le polokalame i lalo o le taitaiga a le tofa Nanai Kalasa Afuola, o le Sui Failautusi o le Ofisa o Mataupu Tau Samoa.

Na taua e Rev. Asiata e faapea, o le taua o le Maa faamanatu a Fitafita tuai, o le a ta’u atu ai i tupulaga o lo o feoai i le atunuu, e le taugofie le saolotoga o lo o latou sapi ai, ona o le taulaga sa ofo atu e tama ma tina o le atunuu e puipuia ai le saogalemu o le lalolagi, ma e i ai lona talitonuga, o le a aoga le Maa faamanatu e faamanatu atu ai i tupulaga, e i ai le taimi e valaauina ai i latou i le galuega lenei, a ua latou sauni e tali atu.

I le saunoaga faapitoa o le aso mai le kovana sili, na manino ai ni isi o tala malie o lenei galuega, e le gata sa tau saili solo mai ni tupe e faatino ai, ae a le lava le tupe, ona talosaga lea i le Faatonusili o le Matagaluega o Galuega a le malo, ina ia aumau ni isi mea faigaluega e faamaea ai le galuega mo Fitafita Tuai.

Na faafetaia e Togiola le komiti a vaega o fitafita tuai e tusa ai o lenei galuega ma le tau amataina mai.

Sa ia faafetaia le taitai komiti sa tapenaina lenei faamoemoe, le afioga i le alii Senatoa ia Lemanu Peleti Mauga, o ia foi lea o le Lutena Kovana filifilia mo le nofoaiga fou ma lana komiti, i lo latou maelega i le asaina maia o le fita o le galuega, e ui e leai ni tupe na amata ai le galuega, ae sa latou

TALAAGA O LE GALUEGA

O le galuega mo le fausiaina o se Maa Faamanatu mo Fitafita Tuai, na amata mai i le nofoaiga a le afioga i le alii kovana o Kolumane e pei ona saunoa Togiola, ma faasolo mai ai lava i le nofoaiga a kovana Lutali, e ui ua taoto le fuafuaga peitai e le o mafai ona faatinoina ona e leai se tupe.

Ona tuu atu ai loa lea e kovana Lutali o le avanoa i le komiti, latou te sailia mai ai se ata o le galuega ma fuafua se tau aofai, peitai ina ua maea le sailiga a le komiti, sa latou tuuina atu ai le ata ia Kovana Lutali faatasi ai ma le tau e $4 miliona, ma sa teena e le alii kovana ona e leai se tupe a le malo i lena taimi e faataunuu ai le galuega.

Ina ua oo mai i le taitaiga a kovana Tauese, sa ia tofia ai loa le afioga ia Matautia ao avea ma Failautusi o le Ofisa o Mataupu Tau Samoa e taitai i le komiti o sailiga, peitai e lei taunuu foi le miti mo le fausiaina o se Maa, ina ua valaauina e le Atua le tofa Tauese, ona faaauau ai lava lea ona galue o Matautia e faataunuu le faamoemoe.

Ina ua tulai mai kovana Togiola, sa ia tuuina atu ai se talosaga i le Fono Faitulafono mo se $500,000 e amata ai le fausiaina o se Maa Faamanatu, peitai o lea pili na teena e le Fono, ona tofia ai loa lea e le kovana o le afioga i le alii Senatoa ia Liufau Sonoma e fai ma taitai komiti e faaauauina sailiga mo se tupe, ma pasia ai loa e le Fono Faitulafono se pili na faaulu e le afioga Liufau, e faasoasoa atu ai le $100,000 e amata ai le fausiaina o le Maa Faamanatu.

Ina ua tuumalo le afioga Liufau, sa tofia ai loa e kovana Togiola le afioga ia Lemanu e fai ma taitai komiti, ma faaauau le sailiina o tupe mo le galuega, le komiti la lea na galulue punoua’i faatasi ai ma le toatele o totino o fitafita tuai, mo le faataunuuina o le miti e pei ona vaai mamao i ai Fitafita Tuai ma le malo, mo se Maa Faamanatu faatasi ai ma se Fale e tua i ai fitafita i taimi o a latou fonotaga.

E ui i le lavelave o tala e faatatau i lenei galuega, peitai o le agaga maualuga o le alii kovana, ua maea ma ua tino mai mo Fitafita Tuai.

Na faamalulu Togiola i Fitafita Tuai ona o le utiuti o le fesoasoani a le malo mo i latou, peitai, ia avea lenei fesoasoani o le Fa’alo lea a le atunuu mo Fitafita Tuai uma lava.

O ni isi foi o saunoaga a le alii kovana na vaaia ai le tali e o Fitafita Tuai, ae o le aano moni, ua i ai se sao o le malo mo Fitafita.

Sa ia taua foi ni isi o faafitauli e pei o ni isi o Fitafita Tuai o lo o faaauau pea ona faatuiese i lenei galuega, ae o lona talitonuga, ia avea lenei galuega o se auala e o mai faatasi ai Fitafita Tuai e galulue mo le manuia o le atunuu.

O se tasi o vaega o lea galuega tele e lei maea, o le tusia lea o suafa o fitafita uma sa tautua i vaega au a le malo tele, i vaega o le Maa Faamanatu ua maea ona saunia.

O le afioga ia Lemanu na fai ma sui o Fitafita Tuai e faafetaia le kovana ma le malo e tusa ai o lenei fesoasoani tele.

Saunoa Lemanu e faapea, ina ua avea Togiola ma Lutena Kovana o le malo, o iina na vavala mai ai lona naunau e lagolago taumafaiga a Fitafita Tuai atoa ai ma i latou o lo o tautua i vaega au a le malo tele.

Sa ia faafetaia foi i latou uma sa fesoasoani i lenei faamoemoe e pei o matagaluega a le malo, konekarate tua, pisinisi atoa ai ma tagata taitoatasi, o e na ofo atu lo latou fesoasoani e faatino ai lenei faamoemoe.

Na faaiu le saunoaga a le afioga Lemanu i lona tuuina atu lea o se meaalofa faapitoa mo le alii kovana, e faafetaia ma aloaia ai e Fitafita Tuai lana tautua mo i latou ma le atunuu.

Na maofa Fitafita Tuai i le tala o le galuega na saunoa i ai le Faatonusili o Galuega a le malo ia Taeaotui Punaofo Tilei, i le puupuu tele o le taimi na fausia ai le galuega ae maea.

O le galuega na fausia e le Matagaluega o Galuega a le malo, i le tau e $500,000. O le masina o Iuni na amata fausia ai le Maa Faamanatu ae o le Ofisa na amata fausia ia Aokuso, ma faamaea ai i le aso Tofi na te’a nei ao lumanai ai le faapaiaina o le galuega ananafi.

Saunoa Taeaotui, ana fausia e se konekarate tua le galuega lenei, e lata i le 18 masina le umi e fausia ai, ma le tau e lata i le $2 miliona.

Sa ia faafetaia le fesoasoani a le kovana ma le malo i le tuuina atu lea o mea faufale e totoe mai i le fausiaina o isi galuega a le malo, e faamaea ai le fausiaina o le Fale a Fitafita Tuai.

O le sisiina o le tagavai a le malo o Amerika, faapea ai le tagavai a Amerika Samoa ma fu’a a vaega taitasi sa galulue ai fitafita tuai, na faatinoina lava lea e sui o fitafita tuai, ma faaiu ai loa i le ootiina o le lipine e le masiofo a le kovana ia Mary Ann atoa ai ma le taumafataga sa tapena i ai le komiti ma le vaega o Fitafita Tuai.