O le taeao ananafi na tatala aloaia ai le Uafu mo Vaa Faila i Malaloa, lea na faatupe e le Vaega a le Feterale e faatupeina galuega fesoasoani mo faalavelave faafuase’i (Federal Emergency Management Agency - FEMA).

O se sauniga puupuu e tatala aloaia ai lenei galuega sa faataunuuina i le taeao ananafi, lea sa aofia ai le afioga i le kovana sili ia Lolo Matalasi Moliga, faapea ai sui o le itumalo o le Maoputasi i le fono faitulafono, e pei o afioga i alii senatoa ia Mauga Tasi Asuega ma Faagata Mano, atoa ai ma alii faipule ia Vaamua Henry Sesepasara ma Maugaoalii Leapai Tusipa Anoa’i.

Sa faapea foi ona auai sui o ofisa o le malo sa fesoasoani i le tuu faatasia o lenei galuega tele, atoa ai ma taitai o le kamupani o le East & West Construction sa fausia le galuega.

I lana saunoaga e tatala aloaia ai lenei galuega tele, na saunoa ai le alii kovana e faapea, e lua mea taua ua ia maitauina i lenei galuega taua, e le gata o le tumau lea o le alofa faamaoni o le malo tele e tusa ai o lana tautino i le puipuia ma le tausia o Amerika Samoa i soo se taimi e tula’i mai ai se manaoga; ae ua iloa ai fo’i e mafai e kamupani lotoifale a le atunuu ona fausia ituaiga galuega tetele faapenei.

I le tala otooto o le galuega na taua ai e Faalavaau Levi mai le Ofisa e Vaavaaia Tupe mai le Feterale (TOFR) e faapea, o le uafu lenei ua mafai ona faatusatusa lona malosi ma le lelei i ni isi o uafu tetele i totonu o le malo tele ma le lalolagi.

O le uafu na fausia e le East & West Construction i le tau e $3.5miliona, o se tupe na fesoasoani mai ai le FEMA.

Saunoa le alii kovana e faapea, o le galuega ua faatinoina e le konekarate lenei, ua momoli atu ai se feau i isi fo’i konekarate i le atunuu, o le taimi fetaui lenei latou te faatinoina ai galuega mo le atunuu, faatino i le auala sa’o ma fai ia lelei.

O le galuega mo le fausiaina o le uafu na amata mai ina ua tuana’i le galulolo ia Setema 2009 lea na faaleagaina ai le uafu tuai sa i ai, ma faia ai loa se asiasiga a le FEMA mo vaega e moomia ona toe faalelei.

E $1.5miliona le tau sa manatu e mafai ona fausia ai se uafu fou, ma tuuina atu ai loa le talosaga i le FEMA mo le avega tupe, peitai ina ua maea ona tusia le ata, na tula’i mai ai loa le galuega e manaomia se $3.5miliona e faatinoina ai le galuega atoa.

Sa toe tuuina atu le talosaga i le FEMA faatasi ai ma ripoti e tusa ai o le ata sa tusia, ma faamatuu mai ai loa le tupe e pei ona faatinoina ai le galuega.

Na taua e Levi o le TOFR e faapea, e lua vaega o le galuega sa fausiaina, o le uafu o vaa faila ma le tama’i uafu i tua o le Ofisa o le Matagaluega o Puipuia le Vaomatua ma le Sami (DMWR).

E 260 futu le umi o le uafu ua maea ona fausiaina nei, lea na amata fausia mai i le masina o Oketopa 2010, ae talu ai o ni isi o faaletonu i tulaga o mea e faatino ai le galuega, na mafua ai ona toe tolopo le faaauauina o le galuega, ma faatoa faamae’a ai loa i le masina o Iuni 2012, ae o le tama’i uafu i tua o le DMWR na amata ia Iulai 2012 ae faamae’a i le masina o Mati 2013.

O le faatonusili o le Matagaluega o Puipuia le Vaomatua ma le Sami ia Dr. Ruth Matagi-Tiofiga na fai ma fofoga o le aso, ae o le susuga i le alii faifeau ia Rev. Iasepi Ulu mai le Ekalesia EFKAS i Fagatogo na saunia le tatalo e tatala aloaia ai lenei galuega tele.

O le faletua o le alii faifeau ia Leone Ulu na ootiina le lipine, e sui tulaga ai i le masiofo a le alii kovana sili e le’i faatasi atu.

Na faaiu lenei sauniga faapitoa i se maimoaga a malo valaaulia i le tulaga o le galuega sa fausiaina.