Ads by Google Ads by Google

Tasi tama ‘au lakapi Nu’uuli ioe i moliaga

E to’alima ali’i ta’a’alo mai i le kalapu lakapi a Nu’uuli na molia i le tulafono i le moliaga mamafa o le fa’ao’olima i le tulaga muamua, i le fa’alavelave lea na fasi ai se ali’i laufali mai i Samoa i le masina o Iulai o le tausaga.Ae ua na’o le to’atasi ua sainia se maliliega ma le malo, ma ua ia ioeina fo’i lona moliaga, ina ua toe vala’auina le mata’upu a nei ali’i i luma o le Fa’amasinoga Maualuga i le aso ananafi.O Selefuti Malo Tago lea ua ia ioeina le moliaga o le fa’ao’olima i le tulaga tolu, e pei ona toe suia e le malo i lalo o se maliliega ua mae’a ona latou sainia.O Fuatai Tago ma Barry Pelenato, ua fa’atulaga a la fa’amasinoga autu ia Aperila 25, 2012, ae o Pene Wells ma Iopu Siolo, ua toe tolopo a la mataupu i le aso 5 o Tesema.I le tali ioe ai o Selefuti, 35 tausaga le matua, i lona moliaga, sa ia fa’amaonia ai i luma o le fa’amasinoga lona fa’ao’o o ni manu’a i le ali’i laufali mai Samoa, o Ponifasio Vasa.O lo o talitonu le malo, o Selefuti na muamua tu’ia le ali’i o Vasa, peita’i ina ua fesili le ali’i fa’amasino sili ia Selefuti pe sa’o lea tulaga, na tali le ua molia, na te le’i tu’ia le laufali, ae sa ia fa’aaogaina lona lima e po ma pa’u ai i lalo.Sa toe fesiligia e le fa’amasinoga le ua molia, pe talitonu sa tiga vaega o le tino o le ali’i laufali ina ua pau i lalo, e mafua mai i le gaioiga sa ia faia, na tali Selefuti, “e leai”, ma o le tali lea na mafua ai ona toe tolopo a le fa’amasinoga le fa’aauauina o le fofogaina o le maliliega, seia aulia le taeao nei, ina ia maua ai le avanoa e toe talanoa ai le ua molia ma lana loia e uiga i vaega uma o lenei maliliega.Na taua e le fa’amasinoga, o le solia e se tasi o le solitulafono o le fa’ao’olima i le tulaga tolu, e faia pe afai sa fa’ao’o e lea tagata ni manu’a i se isi tagata i se auala fa’atautala, ma o ia manu’a na mafua ai ona o’o le tiga i le tino o le tagata na a’afia.E ui o lea ua toe tolopo le mataupu a Selefuti seia aulia le taeao nei, peita’i ua ia talitonu ma malamalama, tusa lava pe finau loia i le fa’amasinoga mo se fa’asalaga mama ona o lenei mataupu, e pule le fa’amasinoga pe talia pe teena ia fautuaga, aua o lo’o i ai i le fa’amasinoga le malosi e fa’asala ai so’o se tasi i so’o se fa’asalaga e talitonu le fa’amasinoga e talafeagai mo le solitulafono.O lo o taofia pea i latou nei e fa’atali ai taimi ma aso ia ua fa’atulaga e le fa’amasinoga e toe valaauina ai a latou mataupu i luma o le fa’amasinoga.O Selefuti o lo o tula’i ai le tama’ita’i loia o Marie Alailima, ae o le tama’ita’i loia o Cecilia Reyna o lo o tula’i mo le itu a le malo.