E tolu fa’atoaga o togalaau ‘aina ua tapunia e le Matagaluega o Fa’atoaga, ina ua maua i a latou su’esu’ega ni isi o fa’aletonu o lo o alia’e mai i nofoaga o lo o totoina ai nei fa’atoaga, e pei ona fa’amaonia e le Fa’atonusili o le Matagaluega o Fa’atoaga a le malo i luma o le Komiti o Fa’atoaga a le Senate i le vaiaso nei.

Na taua e le tofa a Lealao M. Purcell e fa’apea, o ni isi o mafuaaga na ala ai ona tapunia fa’atoaga e pei ona taua, e le gata i le fa’aletonu o le tulaga o lo o nonofo ai tagata Asia o lo o galulue i le fa’atoaga, ae sa maua ai fo’i ni isi o atigi fagu vailaau o lo o  fa’aaoga e tausi ai togalaau ‘aina o lo o paepae solo i totonu o le fa’atoaga e le lelei ona fa’amama le fa’atoaga.

Pau le itu na fa’amaonia e Lealao i luma o le komiti, e le i maua lava e lona Ofisa ni atigi fagu vailaau o vailaau e faasa ona faaaoga i togalaau ‘aina i totonu o fa’atoaga ua tapunia nei.

“O lo o fa’aaua pea asiasiga a lo’u Ofisa i le taimi nei ma le fa’amoemoe, e i ai isi fa’atoaga ua talafeagai ona tapunia, pe afai e tumau pea ona le usitaia fa’atonuga ua tu’uina atu i ai ina ia fa’aleleia fale e nonofo ai tagata o lo o galulue i fa’atoaga, atoa ai ma le le faamamaina lenei o vaega uma o le fa’atoaga,” o le saunoaga lea a Lealao.

O fa’atoaga e tolu ua tapunia e pei ona saunoa Lealao, o le a le toe mafai ona la’uina atu ni a latou fa’atoaga laau ‘aina e fa’atau i le School Lunch po o faleoloa fo’i ma le maketi, e le o toe taliaina fo’i lo latou totoina o ni fa’atoaga.

O le iloiloga lenei na mafua ona valaauina e le komiti a le Senate, ona o fa’asea mai le to’atele o le atunuu faapea ai ni isi o aoga, i le tele o fualaau ‘aina o lo o toto e tagata fai faatoaga Asia e le o mautinoa lo latou saogalemu mo le soifua maloloina o le atunuu.

O ni isi o fualaau ‘aina o lo o faatauina atu i le School Lunch, na lafoa’i uma e le i fa’aaogaina e le Aoga Tulaga Muamua a Pago Pago i le lua vaiaso talu ai, ina ua avatu e pala vaega o fualaau ‘aina e pei o kapisi ma kukama.

O se tasi o mataupu na taua e LeAtualevao Asifoa, o le taitaifono o le Komiti o Faatoaga a le Senate e faapea, o se tasi o faaeteetega o lo o tula’i mai i le taimi nei o togalaau ‘aina a tagata Asia, e le o mafai ona iloa i le taimi nei le malosi o le vailaau o lo o fana ai togalaau ‘aina, mo se faataitaiga, afai e fana nei e le tagata mai Asia lana kapisi i le vailaau ae oo taeao ave e faatatau i le School Lunch poo le maketi fo’i, e le mafai ona iloa e le Ofisa o Faatoaga poo le School Lunch le malosi o le vailaau o lo o i luga o le lau kapisi, aua e leai se masini e su’e ai, peitai, e le o faatafa ai le atunuu mai le faatauina o fualaau ‘aina nei, po o le tuuina atu fo’i i le School Lunch e kuka ai taumafa a fanau aoga.

Saunoa le alii senatoa ia Alo Faauuga e faapea, ua amata ona fefefe tagata o le atunuu e toe faatau fualaau ‘aina a tagata mai Asia, ona o popolega i vailaau o lo o faaaoga e tausi ai nei togalaau ‘aina.

“O le mea lea ua maitauina, e le popole le tagata Asia i le ola o le Samoa, pau le mea o lo o naunau i ai ia maua lana tupe ma taulia ana fualaau ‘aina,” o le saunoaga lea a Alo na lagolagoina e ni isi o sui o le Komiti.

I le faaiuga o le iloiloga, ua fautuaina e le Komiti ofisa o le malo o lo o gafa ma le taulimaina o le mataupu i togalaau ‘aina, ina ia mataalia pea i taimi uma mo le siakiina o togalaau ‘aina a tagata mai Asia, ina ia mautinoa o lo o saogalemu ma lelei mo le fofoga taumafa o le atunuu.