I le tapunia ai o le fonotaga a le US Coral Reef Task Force 2012 i le vaiaso nei, sa faalauiloa ai loa ma ni faailoga taualoa, e aloaia ai nisi o tautua sa mafai ona ofoina atu mo lenei fonotaga.

O se tasi o faailoga taualoa na tuuina atu i le alii kovana, afioga Togiola Tulafono, aua o lana nofoaiga mulimuli lenei, atoa ai ma faauluuluga o teritori ma atumotu sa faatasi mai i lenei fonotaga taua.

Tau a’aoina ia  Kovana Tulafono le Tusi sa tusia fa’apitoa i le a’ao o le Fa’auluuluga o le Ofisa o le NOAA o lo’o va’ava’aia Amerika Samoa, e fa’amalo aloa’ia mai ai ona o tiute fa’atino, o lona loto ina ia fa’atumau le sosia o Amu ma A’au o le Lalolagi atoa, o le onosa’i i tiute fa’atino, ae maise o le taua o le matafaioi sa ia tau’avea mo ona tagatanu’u, tagata o le pasefika, ae maise tagatanu’u uma o Amerika ma atunu’u fa’apa’aga o lo’o tau’avea lenei mau e tasi. Sa ia fa’amanuia mai fo’i i fuafuaga  fa’asolo a Kovana Tulafono, ma ia manuia ona faiva.

Ta’auoina ia te ia e le USEPA le Fa’afanua o le gataifale ma le Si’omaga atoa o le motu o Aunu’u, ma o lea fa’afanua tele, sa amata tusia ma teu mai e le NOAA mai le vaitausaga e 1780. Na tutulu le afioga le Kovana ina ua ia umia lea fa’afanua ua mae’a fa’ava’a, aua o le motu itiiti lea sa ia fanau mai ai!

Fa’ailoga mai le DOI ma le USCRTF ma latou Pa’aga o Agencies o le Malo Tele o lo’o tausoa e i latou tiute o fa’asao, fa’atumau ma fa’aleleia atili le tatou Siomaga e aofia ai le DOI, USDA, NOAA, USEPA, USArmy of Engineers, DMWR, CRAG, AIC, SPREP, DNER ma isi uma sa auai, na latou fa’ao’o ai ia te ia se “Ata Matagofie o le A’au ma ona Puna’oa o i ai!” ma ua mae’a fo’i ona fa’ava’a lelei mo Kovana Togiola Tulafono.

E ese mai fa’ailoga uma nei mo le Kovana, sa taua’aoina le fa’ailoga fa’apitoa mo le tagata sa sili ona tele taimi e fa’amoemoe ai le USCRTF i le fa’atautaiga o galuega saili, fa’amaumau ma tu’ufa’atasia o fa’amaumauga taua mo le Komiti ia fa’afoea lelei latou galuega fa’atino. I totonu o le Ofisa, i fafo i galuega tima’i i le mamalu lautele, o le taumafai malosi ina ia mautu galuega ma fa’amaumauga, o Fatima Sauafea Le’au sa i ai mo nei tiute e tele. Ua le gata i le Komiti lenei lana tautua, ae ua fa’aso’o atu i pa’aga uma a le Coral Reef Task Force atoa.

E to’a fa ali’i Su’esu’e lauiloa ma le ta’uta’ua sa gapatia i le tele o sailiga ina ia mautinoa le mau ua tauavea e le USCRTF, fa’afetaia ai le au saeanisi sailiili toto’a:

- Dr. Stephen Palumbi mai le Iunivesite o Leland Standord i Pacific Grove, Kalefonia.

- Doug Fenner - Biologist mo le Matagaluega o Vaomatua ma Faigafaiva - Amerika Samoa.

- Andy Myner - O se tasi fo’i sa tigaina tele i lana fo’i sailiili mo fa’amaumauga e aoga tele i lenei taumafaiga, ma ua mae’a fa’aaogaina ana su’esu’ega ma fa’ai’uga na maua mai ai, i le fonotaga o lenei tausaga. E le’i i ai lea sui, ae sa taua’aoina i le tama’ita’i taitaifono Eileen Sobeck o le DOI lea fa’ailoga ia taofia ma taua’ao mulimuli i lea sui taua.

- Fa’ailoga mo le fa’alapotopotoga a le “Le Tausagi” o alo o le atunu’u sa a’oa’oina i le ASCC ma avea ai i latou ma nisi e avatua le fe’au e ala i o latou sao fa’atino i totonu o ekalesia, a’oga, na so’o se fa’alapotopotoga tumaoti lava e vala’auina i latou mo se fa’atinoga fa’ale-Si’omaga Matagofie ma le Saogalemu mo tagata uma! O lea fa’ailoga sa taua’aoina i le susuga Misa Aiono, o se tasi sa loa lana tautua i le ASCC Land Grant, ae ua litaea nei, ma ua avea ma se faipisinisi tuma’oti, ae le avea ai lona auai i le “Le Tausagi.”

- Mai le Fa’auluuluga o le USEPA na fa’ao’o mai ai e ala i le latou sui  i le fonotaga CRTF, Jared Blumenfeld, Administrator Region 9, na fa’ao’o mai ai le Fa’ailoga Fa’apitoa mo le Fa’atonu Sili o le Matagaluega ASEPA - Dr. To’afa Vaiaga’e, lea sa ia taumafai atili e fa’atautaia galuega lelei uma lava mo le ola saogalemu ma le manuia o tagatanu’u uma o Amerika Samoa, fa’atasi ai ma lona puipuia uma o sosia ma puna’oa o le Siomaga o Amerika Samoa.

“O lo’o mataituina le sao o Dr. Vaiaga’e i le fausia lea o le ulua’i fale tele o le ASEPA o le a umusaina i le masina fou, e toto ai le vao i lona taualuga, o le isi itu, o lo ua fa’ata’atitia ai panele mo le sapalai o le eletise mo lea fale atoa ma lona anofale. O se matati’a uiga ese lea i lePasefika i Saute, ae o se mata’aga fo’i mo Amerika Samoa.”