Ads by Google Ads by Google

Tapuni le Ofisa o le FBI i Pago Pago

O le faaitiitia ai o le paketi a le Feterale ua faamaonia mai ai e le vaega suesue a le malo tele, le Federal Bureau Investigation (FBI) le tapunia lea o lona ofisa sa i ai i Pago Pago, ae ua tuu faatasi uma galuega sa faia i lea ofisa i le latou ofisa i Honolulu.

I se pepa o faamatalaga na tuuina mai e le alii o loo avea ma sooupu a le FBI mai Honolulu o Vida G. Botton, sa ia faamaonia mai ai le taulimaina lea e le latou ofisa i Honolulu o mataupu uma ma suesuega sa faia i le ofisa i Amerika Samoa nei, ona o se faaiuga sa faia e le Konekeresi.

“O le a faaauau pea ona faia a matou suesuega i mataupu e uiga i le puipuiga atoa ai ma faiga faasolitulafono i Amerika Samoa, peitai o suiga i tupe faaalu ma le paketi a le feterale ua le toe gafatia ai ona faaauau le ofisa i Amerika Samoa,” o le saunoaga lea a Bottom, ma ua i ai le faamoeoe o nai masina o loo lumanai o le a aloaia ai loa le tapunia o le ofisa, i le mae’a ai lea o le la’u ese atu o mea fale i Honolulu.

O le faaaliga mai le FBI na tuuina mai lea i le tuanai ai o le vaiaso talu ona salalau faamatalaga i le tapunia lea o le ofisa, atoa ai ma le le toe i ai lea o nisi o galulue ai i le ofisa. E to’alua sui o le FBI na amata galulue ina ua tatala le ofisa, ae o isi taimi ua oo atu i le toatolu.

I le masina na te’a nei na faailoa ai ese molimau faatuatuaina i le Samoa News, o le a tapunia ofisa a le FBI ona ua faaitiitia le latou tupe faasoasoa. Na taua foi e le molimau lava lea le aveese atu e le Ofisa a le FBI o ana tagata faigaluega mai lo latou suesueina lea o mataupu tau i vevesi i totonu o aiga, lea e le na o Amerika Samoa o loo tulai mai ai.

Ae na taua i le pepa o faamatalaga mai le FBI e faapea, na amata tatala le ofisa i Pago Pago ma le faamoemoe e avea o se ofisa e fesootai mai i ai le ofisa autu i Honolulu, ae talu mai lea taimi, ua i ai mataupu tetele, o faiga faagaoi, faiga e aafia ai aia o tagata atoa ai ma isi mataupu solitulafono ua mafai ona ta’usala ai nisi.

E le o mautinoa mai i le taimi nei, pe ua maea ona logo e le FBI le afioga i le kovana sili ma isi ofisa o le malo e uiga i le latou faaiuga.

O le tausaga e 2001 na amata a’e ai se manatu e faatu se ofisa a le FBI i Amerika Samoa, ina ua alia’e ni mataupu tetele i lea vaitaimi e aofia ai le mataupu i le Daewoosa Samoa ma le faa faigaluegaina faasolitulafono o tagata mai Asia.

Ina ua fesiligia ia le alii o John Gillies ia Aperila 2001 e uiga i le fuafuaga e faavae se ofisa a le FBI i Amerika Samoa, sa ia taua ai lea tulaga o se tulaga lelei, aemaise ai foi o loo talosagaina e ofisa faamalosi tulafono i le atunuu le faavaeina o lea ofisa.

E ui o loo faapea mai le pepa o faamatalaga o le 2006 na amata ai le ofisa i Pago Pago, peitai i faamaumauga a le Samoa News o loo taua ai, o le masina o Ianuari 2003 na amata faavae ai le ofisa, e ala i le auina mai lea o sui o le FBI mai Honolulu e galulue i Pago Pago ma toe foi atu pe afai e manaomia ai.

O le amataga o le 2006 na faatoa tatala aloaia ai loa le ofisa a le FBI i Amerika Samoa, ma amata ai i sui e toalua.

Na taua e William Dennson lea o loo faauluulu i ai le ofisa i Honolulu e faapea, e tele se sao o le ofisa sa faatuina i Pago Pago i a latou suesuega.

Soo se tasi o le atunuu e fia faila sana mataupu i le ofisa o le FBI, e mafai ona faafesootai le numera o le telefoni 808-566-4300.

fa’aliliu Ausage Fausia