Ads by Google Ads by Google

Tapuni Fono Faapitoa Kovana e aunoa ma se pili pasia Fono

O le taeao ananafi na tapunia aloaia ai le Fono Faapitoa a le Fono Faitulafono e pei ona valaauina e le alii kovana, e aunoa ma se mataupu na tuuina atu i ai na pasia e Senatoa ma Faipule.

O le Fono Faapitoa na valaauina e le afioga i le matua ia Togiola Tulafono, sa faamoemoe e le silia ma le 30 aso, ina ia mafai ai ona talanoaina nisi o mataupu sa finagalo le kovana e maua ai se fesoasoani mo le falemai o le LBJ, ona o faafitauli tau tupe o loo tulai mai ai i le taimi nei.

E fa mataupu na tuuina atu e le alii kovana mo lana fono faapitoa lenei, ma o mataupu ia e aofia ai pili tupe e lua na fuafua e ave mo le LBJ, ma o pili tupe ia e lua e aofia ai le 10 miliona  e faatupe ai le auina atu o gasegase i fafo mo togafitiga, ma le 8 miliona e fesoasoani ai i le faatautaiga o galuega a le LBJ.

O isi mataupu e aofia ai le pili e toe faafoi atu ai le falemai i lalo o le vaavaaiga a le malo, faapea ai ma le pasiaina o tofiga e lua a le kovana mo nisi o totino se toalua, e faaopoopo i le Komiti Faafoe a le falemai o loo i ai i le taimi nei.

E le gata na tuuina atu e le alii kovana sana tusi i taitai o le fono e faailoa atu i ai lona lagona e uiga i mataupu o lana fono faapitoa, ae na maua foi le avanoa e saunoa tuu sa’o atu ai le alii kovana i luma o le fono, mo le faamaninoina atili o mataupu mo lana fono faapitoa.

I lea feiloaiga na faamanino ai e Togiola i le fono e faapea, afai latou te le pasia pili tupe ia ua ia tuuina atu mo le falemai, e ono toe tulai mai le faaletonu tau tupe lea na aafia ai le falemai i le masina o Oketopa o le tausaga na te’a nei.

Na faia le faaiuga a le Senate ina ia lagolagoina pea la  latou faaiuga lea na faia i le taimi o le latou tauaofiaga lona tolu na mae’a atu nei, ina ia taoto pea i le komiti le pili e toe faafoi atu ai le falemai i lalo o le malo, atoa ai ma le pili tupe e $8 miliona, se’i vagana ai tofiga a le kovana mo totino e lua o le komiti faafoe a le Falemai na fai i ai iloiloga a le komiti, ma latou teena ai ina ua tuuina atu i le palota.

O tofiga e toalua a le kovana mo isi sui faaopoopo o le komiti faafoe a le falemai e aofia ai le afioga ia Faamausili Mau Jr  ma Gaea Perefoti Failautusi.

Ae mo le pili tupe e 10 miliona, o le faaiuga a le Senate ina ia teena sa faia lea ina ua maea ona faia se iloiloga a le maota e uiga i lenei mataupu.

Mo le maota o sui, e lei faia sa latou faaiuga i le pili lea e toe faafoi atu ai le falemai i lalo o le malo, sei vagana ai le pili tupe e 10 miliona a le kovana sa latou pasia faatasi ma suiga, peitai na teena e le Senate.

Na finagalo nisi o faipule ina ia taofi le pili a le kovana  e toe faafoi atu ai le falemai i le malo seia i ai se isi taimi, peitai na saunoa isi faipule, e lelei foi le faapasia o le pili lea ina ia mafai ai ona gaioi le malo mo le toe faia lea o nisi suiga i le tulafono o loo i ai i le taimi nei e faagaioi tutoatasi ai le falemai.

Saunoa le alii faipule ia Faimealelei Allen e faapea, o se tasi o faafitauli tuga o loo feagai ma le falemai i le taimi nei, o le maualuluga lea o totogi o ana tagata faigaluega.

Sa ia taua, afai ae toe faaleaoga le pulega a le falemai ae toe  tuu atu i lalo o le malo, o le a mafai ai loa e le  kovana ona toe faatulaga se isi poloaiga fou e faatonutonu ai totogi mo faauluuluga a le falemai.

Ua alo atu nei le fono mo lana malologa ma le faamoemoe, o le a toe tauaofia i le aso Gafua lona lua o le masina o Iulai, lea o le a faataunuuina ai lana tauaofiaga lona 4 mo le nofoaiga lona 32 lea o loo nofoia nei.