O le taeao ananafi na tapunia aloaia ai galuega masani a le Fono Faitulafono a Amerika Samoa, i le atoa ai lea o aso e 45 o galuega fa’atino i le tauaofiaga lona tolu o lana nofoaiga lona 34.

E pei ona manino i le Fa’avae Toe Teuteu a Amerika Samoa, e 90 aso fono a le Fono Faitulafono o le tausaga atoa mo tauaofiaga e lua, lea e aofia ai aso fono e 45 i le tauaofiaga e tasi.

Na fa’alogoina i maota fono uma e lua a le atunu’u le agaga fa’afetai mai Ta’ita’i o maota e lua i afioga i Senatoa ma Faipule filifilia o itumalo ta’itasi, ona o galuega sa fita i tuga i ai i masina ua mavae atu.

I luma o le maota maualuga, na fa’afetaia ai e le afioga i le peresetene o le Seante ia Gaoteote Palaie Tofau afioga i Senatoa mo galuega lelei uma sa latou fa’atinoina i lenei tauaofiaga ua mavae, aemaise ai galuega mulimuli sa pasia e le maota maualuga i le taeao ananafi, o totino ia e lua o le Komiti Faafoe a le Faletupe fou o lo o fuafua le malo e fa’atula’i, e aofia ai Steve Watson ma Salaia Gabbard.

E ui e le oo mai sui ia e toalua e molimau i luma o le maota maualuga e tusa ai ma tulafono o lo o lima ta’ita’iina ai galuega fa’atino a le maota, peita’i na talia e le maota se talosaga sa tu’uina mai i le afioga i le ali’i kovana ia Lolo Matalasi Moliga ma le faigamalo, mo se avanoa e pasia ai suafa o i laua nei, ona o lo o toesea mai le atunu’u mo ni isi o fuafuaga fa’aleaiga.

Na fulisia le maota maualuga e ala i le latou palota sii lima e pasia ai Steve ma Salaia, ma ua aloaia uma nei totino e to’a 7 o le Komiti Fa’afoe sa tofia e le ali’i kovana, ina ua pasia uma fo’i e le maota o sui i le vaiaso na te’a nei.

Saunoa Gaoteote i luma o le maota e fa’apea, o le taua o le pasia ai o suafa o i laua nei, ua taofia ai le valaauina e le ali’i kovana o se Fono Fa’apitoa mo le isi lua vaiaso o lo o lumana’i nei.

I luma o le maota o sui, sa fa’afetaia ai e le afioga i le Fofoga Fetalai ia Savali Talavou Ale afioga i faipule, e tusa ai o galuega sa latou faatinoina i lenei tauaofiaga ua mae’a.

Saunoa Savali e faapea, e ui e le i atoatoa ni isi o galuega, ae i ai le lagona e mafai lava ona fa’amae’a pe a tauaofia le tauaofiaga lona fa o le nofoaiga lenei ia Iulai.

Na fa’ai’u le saunoaga fa’afetai a Savali i lona talosagaina o afioga i faipule, ina ia faailoa la latou lagolago i le fa’amoemoe o le Fono Faitulafono mo le latou fautasi, e ala i le afifio atu o afioga i faipule e maimoa ma tapua’i.

O le tele o pili ma i’ugafono sa talosagaina e le faigamalo ua pasia uma e le Fono Faitulafono.

O ni isi o pili sa talosagaina e le faigamalo ua pasia e le Fono e aofia ai le pili mo le paketi toe fa’aopoopo a le malo i le aofaiga e $2.5 miliona, fa’apea ai ma le pili e siitia ai le aofa’i o aitalafu laiti e tu’uina atu i le fa’amasinoga, lea na fa’atoa pasia i le vaiaso nei.

O ni isi o i’ugafono sa talosagaina e le kovana ua pasia fo’i e le Fono Faitulafono, e aofia ai le i’ugafono mo totino o le Komiti Fa’afoe o le LBJ, Komiti Fa’afoe o le Ofisa o Turisi a le malo, fa’apea ai ma le Komiti Fa’afoe o le Faletupe fou a le malo.

E na o le Komiti Fa’afoe o le Faletupe fou ma le LBJ sa pasia uma e le Fono Faitulafono tofiga a le kovana sa tu’uina atu, ae o le Komiti Fa’afoe o le Ofisa o Turisi, e lei pasiaina uma i latou sa tofia e le ali’i kovana, ona e i ai sui sa teena e le maota maualuga, e pei o le susuga ia Roy J. D Hall Jr.