Ads by Google Ads by Google

Tapuni aloaia fonotaga Samoanalua i mataupu tau Soifua Maloloina

Afai e fia soifua umi se tasi, e tatau ona tausisi i meaai paleni e tausi ai lona tino, toaga e koleni, ia lava le malologa, ola fiafia ae aua le ola popole ma faanoanoa.

O le tau sailia o auala eseese e mafai ai ona tausi le soifua maloloina o le tagata ina ia maua ai se olaga fiafia, na mafai ona fetufaa’i i ai alii ma tamaitai foma’i mai Samoa ma Amerika Samoa, i le fonotaga i le va o Samoanalua lea na tatala i le Aso Lulu na te’a nei ma tapunia i le aso na soso’o ai.

I le tuu faatasiga o finagalo na fetufaa’i i ai foma’i atoa ai i latou o lo o galulue i falemai ma vaega o soifua maloloina mo le tausiga o le soifua maloloina o tagata, na manino mai ai i nei manatu uma, o le tausiga o le soifua maloloina e le gata o le galuega mo tagata uma, ae o se tiute tauave foi e tatau ona logologo atu i totonu o le atunuu.

SOIFUA MALOLOINA, O LE TIUTE MO TAGATA UMA

O le avea o se tagata ma tagata soifua maloloina, o se galuega lea e tatau ona faia e tagata uma, mo se faataitaiga e pei ona saunoa Dr. Richard Ripley e faapea, e mafua ona ola maloloina le pepe pe afai e faasusu i suasusu o le tina mai lava i le taimi na faatoa fanau mai ai, seia oo atu i le 9 masina le matua.

I le taimi lava foi lea e tatau, o se pepe e ola maloloina le pepe e amata fafaga i meaai pe afai e oo atu i le 6 masina lona matua, ma faaauau atu ai lava seia oo ina matua o ia.

“O le isi lea polokalame o lo o matou unaia i le taimi nei, faamalosia tina e faasusu a latou pepe, ia lelei meaai e fafaga ai le pepe ma ia lelei foi meaai e ai a le tina failele,” o le saunoaga lea a le alii foma’i.

Na taua e Dr. Ripley e faapea, o le isi faafitauli ua maitauina i aiga i le taimi nei, ua tuulafoai lava tupe i fanau, ma maua ai loa le avanoa o fanau e faaliu bongo, chips, soda pe lole ai foi le $1 na avatu e matua.

O le talitonuga o alii ma tamaitai foma’i, o le tuuina atu e matua o tupe i fanau laiti ma le faaupuga, ‘faatau ai se mea ete manao i ai,’ ua momoli atu ai le feau i le tama poo le teine, pule loa oe i le ituaiga soifua maloloina e te mana’o i ai.

Na taua e le faletua o Pelenatete Stowers mai le Matagaluega o le Soifua Maloloina a Samoa e faapea, o isi auala o lo o faaaoga e Samoa i le taimi nei e tufa atu ai le feau o le soifua maloloina, o le faaaoga lea o Komiti Tumama a faletua ma tausi i nuu i tua, ina ia mafai ai ona unaia nuu i tua e ola tu mama ma tausisi i le ola soifua maloloina o tagata.

Afai e fia ola maloloina se tagata, ia paleni lana tausami i soo se meaai, mo fanau laiti, ia lava le malolo ma le moe i le po, ae mo tagata matutua, e tatau ona i ai se taimi o le aso i vaiaso taitasi e faamalositino ai.

Aua le fiafia i meaai e tele ai le masima, suka, aua foi le fiafia i le ava malosi poo le sikaleti, o mea uma ia e aafia ai le soifua maloloina o le tagata.

Saunoa le afioga i le alii Minisita o le Soifua Maloloina mai Samoa, afioga Tuitama Dr. Leao Talalelei Tuitama e faapea, e leai se isi taimi e pito sili ona soifua maloloina atu ai se tagata, nai lo le taimi o lo o avea ai o ia ma tamaititi.

“O taumafa ete tuuina i lou tino i le taimi nei e fua mai i lou soifua maloloina i le lumana’i, mo se faataitaiga, afai ete fiafia e tausami i meaai e tele ai le masima, suka poo le ga’o foi, lona uiga a oo ina e matua e vave lava ona e aafia i ituaiga gasegase e mafua mai i taumafa na,” o le saunoaga lea a le alii Minisita.

Ae na taua e Dr. Aloiamoa Anesi e faapea, e le na o meaai e aafia ai le soifua maloloina o le tagata, ae aafia foi pe afai e aafia lona mafaufau, le maua se to’a, tele le popole, le lava le malolo o le tino pe ona ua soona fai foi le malosi, ona aafia ai loa lea ma le soifua maloloina o le tagata.

I le aotelega o manatu na mafai ona fetufaa’i, ua atagia mai ai, e leai se isi auala e sili ona maloloina ai le tagata soifua nai lo le ola fiafia, toaga e faamalosi tino ma ai i meaai paleni.

Ua i ai le faamoemoe o taitai o vaega o le Soifua Maloloina a atunuu e lua, o le isi fonotaga o lo o lumana’i nei o le a mafai ai loa ona ausia ni isi o sini ua maea ona faataoto mo le alualu pea i luma o le tausiga o le soifua maloloina o tagata Samoa.