Ua fa’ailoa mai i tala tusia ma fa’asalalau e le BBC i le vaiaso ua tuana’i nei, ua mae’a galulue punoua’i le Matagaluega o le Puipuiga Lautele o Peretania e fa’atutu a latou ma’aola e tafana ai misele i luga o latou fale maualuluga i totonu o Lonetona a’o tapenapena pea lava le atunu’u mo le Olimipeka i le masina fou. Ua faia lenei gaoioiga a le Matagaluega lea, ae ua mae’a fa’aulu ni fa’asea mai le mamalu lautele, ae maise i latou o lo’o mautotogi i fale tetele nei ua fa’atutu ai nei ma’aola mo misele e tafana ese atu ai.

“E ui ina e le’o i ai ni masalosaloga e i ai nisi o le a latou fa’aaogaina lenei tu’ufa’atasiga o malo eseese mo ta’aloga o le Olimipeka ma auala e fa’ao’o ai e i latou ni faiga fa’aterarisi, ua le nofoa’i le malo o Peretania, e ao ina mautinoa le saogalemu o tagata uma e auai mai mo lea fa’amoemoe.” O se tala lea a le Failautusi o le Saogalemu Lautele a Peretania Phillip Hammod.

“E ui fo’i la ina i ai fa’asea mo le fa’atula’ia o nei meatau i luga o nei fale tetele, ae le tu’ua ai le faiva tau’ave o le matagaluega e ao ina tapena i ai, e mafai ona tua i ai pe afai ae osofa’ia le fa’atasiga i ni faiga fa’aletaupulea a nisi malo, po’o ni tagata Fa’atupu Fa’alavelave. O lenei faiga, o le a fa’afaigata ai ona manatu se tasi e faia e i latou ni mea fa’aletonu i lea vaitau.”

Ua ese mai lea ituaiga o misele fa’atutu i maota nei, ua fa’aopoopo i ai le nofoaga e fa’atula’ia ai va’aleel Helikopa mo le nofo sauniga e mata’i ma sa’ilia i taimi uma ni faiga sese e lamatia ai le soifua o tagata uma e auai i ta’aloga Olimipeka 2012.

Ua fa’ailoa mai fale maualuluga nei o le Fred Wigg Tower ma le Tower Hamlet ua i ai metau misele i latou taualuga, ma o i latou fo’i o nofoia nei fale ua latou fai mai, “Ou te iloa ua amata ona ou ta le moe, aua ua ou iloa ua i ai misele i luga o lenei fale, o lona uiga, e vave lava ona manatu le au fa’atupu fa’alavelave e tafana muamua le fale lea nai lo se i si lava fale i totonu o Lonetona.” O se tala lea a le ali’i tusitala Brian Whelan a le ABC News i le masina o Me, 2012.

Ua fa’ailoa mai e Hammod, “E ui i le tele ma le to’atele o i latou ua fa’asea i lenei tapenaga i luga o fale tetele nei, ae le o fa’avaivai ai le Matagaluega o le Puipuiga o le Saogalemu Lautele mai le faia o galuega e mautinoa ai e mafai ona tete’e e i latou ni faiga fa’aterarisi e alia’i mai i lenei taligamalo. Ua sauni fo’i le Matagaluega e puipuimalu le latou finauga i le fa’amasinoga pe afai o le a o’o iai taumafaiga e soloia le latou galuega tele lea!”

“O le autu o nei galuega uma ua fa’atulaga, ia mautinoa ua sefe ma fiafia fa’atasi tagata uma o le a o’o mai i Lonetona mo ta’aloga o le Olimipeka o lenei tausaga. O se feso’ota’iga tau fa’agatama fa’ale-lalolagi, ma e le to’ele fo’i le taligamalo a Lonetona Peretania i lona tofi, ia puipuimalu ma saogalemu tagata uma e autova’a mai mo lea fa’amoemoe maualuga!”

“E le tatau ona i ai se avanoa lava e tasi, e tu’ua i le fili!"

saunia: Leua Aiono Frost