Ads by Google Ads by Google

Tapena AS - Arts Festival i Solomona

E ui ina ua tulata fo’i i le fa’amoemoe o Malo uma o le vasa pasefika ina ia fa’aalia a latou Tu ma Agaifanua i se fa’aaliga tele o lenei tausaga, "Pacific Festival of the Arts" ae o lo o ua fa’aalia mai e le susuga le Fa’atonu, Leala Pili - Elisara, "E le’i o’o mai lava le polokalama mai Solomona po ’o le a se ituaiga Fa’aaliga e ao ina tapena mamao atu i ai Malo uma o lo ’o auai. E mautinoa fo’i e tatou te auai."

E le o fa’avaivai le fanoga o le Fa’atonu o le Arts Council e malaga Amerika Samoa, aua o le fa’aaliga talu ai, lea sa talimalo ai Amerika Samoa, e matua tele ma anoanoa’i tala fa’amemelo a atunu’u uma sa auai mai, i le matagofie ona tapena o lea fa’amoemoe.

Lona lua, sa matua latou fiafia tele, aua sa maua fua taumafataga uma o le aso, ae maise e le’i totogia fo’i e i latou nofoaga e alaalata’i ai.

"O le uiga lea o Samoa ma ona tagata e matilatila ai le va’ai mai i ai a atumotu uma o le Pasefika, e ola fiafia tagata, e le popole i se mea, ae talimalo lelei na’ua" O le tali a le sui o le To’asavili na faia i na tagata na tatou talimalo ai, ona o lona fiafia tele, sa ia fa’apea ai, "E leai se atunu’u e leai ni ona fa’afitauli fa’alotoifale, i tulaga o le tamaoaiga ma fete’ena’iga lava i le va o ona tagata ona i faiga fa’apolokiki ma isi tulaga fa’apena, ae a o’o loa i le talimalo, e leai loa se paga o le agaga moni lava o le Samoa! E 'ave uma mea i o, ae sema se mea mulimuli e a’ai ai le aiga!"

Ua i ai pea ni tapenaga ua amatalia, o lo ’o ua mautinoa lava e i ai Siva ma Pese Samoa e tatau ona ‘ave. Ua 'iloga fo’i e taugata le pasese, ma ua fuafua ai e le tina le to’a 40 o se 'ausiva, o le 'aufaipese lava lea, ma o i latou fo’i ia e fa’aaoga i le polokalama atoa o le a taua’aoina mai e Solomona.

O lo o ua amatalia ona tapena Elisara mo le fa’amoemoe, ma ua o’o fo’i i lana ripoti i le fale lomitusi o le Malo mo ni kopi e taua’aoina i le fono ma le nofoa’iga a le faigamalo o lo ’o i ai nei mo lo latou silafia patino o le tapenaga a Amerika Samoa mo lana taligamalo, fa’atasi ai ma lona sao sa taumafai ai se ‘ai o Amerika Samoa i le Fa’aaliga o Tu & Aga a le Pasefika na te’a nei.

Ina ua fesiligia e tusa o le tala o le Tupe sa fa’aaogaina, sa fa’ailoa mai e Elisara, "E le o ia te a’u se tala o le tulaga o le Tupe Fa’asoa, o lo ’o saunia mai lea tulaga e i latou na gafa ma lea fa’amoemoe, ma e avea fa’atasi ma la’u lipoti ina ia pasia fa’atasi, ma fuli ane ai loa le faigamalo mo le tapenaga o so tatou sao i lenei tausaga ma lona fa’aaliga fa’apitoa."

Ina ia mautinoa e masi’i se 'aumalaga a Amerika Samoa, e mautinoa lava e faia se sa'iliga tupe e fesoasoani i le fa’atupega o lea fa’amoemoe.

ìE mautinoa lava e i ai sa matou sa'iliga tupe e ao ina faia, e le’i mautu ae toeitiiti lava a mae’a lelei lea fuafuaga, ma e fa’asalalau fa’alaua’itele lava mo le silafia e le atunu’u. Pau le mea e mautinoa, e le o toe mamao lava ae faia loa, masalo o se vaitaimi o le fa’ai’uga o lenei masina po ’o le amataga o le masina fou e amata ai.î

O le a fa’aaogaina e le afioga le Fa’atonu Leala Pili - Elisara le tapenaga mo la tatou sisigafu’a ia Aperila e fa’amautu atili ai sui o le a auina atu mo le pese, siva ma isi mea uma o le a mo’omia ona fa’aalia i Solomona. Ua i ai fo’i lona fa’amoemoe maualuga, e talia mai e le Kamupani Va’alele a le Polenisia, se pa’u tele o le pasese mo le malaga atu a Amerika Samoa i lenei fa’amoemoe.

"Po ’o fea lava e aga i ai lenei taumafaiga, ia mautinoa e le atunu’u, o lo o ua taumafai le Arts Council i se mea sili lava e fai ma sao o Amerika Samoa i le fa’aaliga fa’apitoa o tu ma agaifanua a le atunu’u i Solomona."