Ads by Google Ads by Google

Tapa Togiola fesoasoani Konekeresi tulaga lafoga mo pisinisi

E to’alua ni alii senatoa o le Konekeresi a le Iunaite Setete ua tu’uina atu i ai e le kovana sili sana tusi, e talosagaina ai sa laua fesoasoani mo Amerika Samoa, i iloiloga o lafoga mo pisinisi e pei ona faagasolo i le taimi nei i luma o le konekeresi.

O le talosaga a le afioga i le matua ia Togiola Tulafono ua tuuina atu i alii senatoa, o loo ia faamanatu ai le talosaga ua maea ona tuuina atu e Amerika Samoa, mo le tuuina mai lea e Amerika o le avanoa i lafoga faamagalo mo soo se pisinisi Amerika e fia faatu sona lala i Amerika Samoa, e fesoasoani ai i galuega ma le atinaeina o le tamaoaiga o le atunuu.

Saunoa Togiola, talu ona aveese e le malo tele le lafoga o le 936 lea e maua ai e pisinisi le lafoga faamagalo, ua vaaia ai le taugata o taumafaiga mo isi vaega o le atina’e, aemaise ai o le tau faatosinaina mai o pisinisi Amerika i le teritori.

Na taua e le alii kovana i luga o lana polokalame i le faaiuga o le vaiaso na te’a nei, e na o le kamupani i’a lava o le StarKist o loo agavaa i lalo o le lafoga faamagalo lea o loo i ai i le taimi nei, ae le o agavaa uma ai isi pisinisi i le atunuu. (Lafoga faamagalo i le taimi nei e taua o le 30A)

“O le lafoga o loo i ai nei o loo tautino mai ai le tulafono, e na o kamupani i’a lava e agavaa ai, soo se taimi lava la tatou te taumafai atu ai e faatosina mai nisi pisinisi i le teritori, e matua faigata lava  ona e i ai aulape e tatau ona faaleleia muamua e pei la o le lafoga faamagalo lea ua ou talosagaina ai alii Senatoa e toe tatala mai mo tatou,” o le saunoaga lea a le alii kovana.

O le itu lelei o taumafaiga nei e pei ona saunoa le alii kovana, e faa faigofie ai i le malo tele ona tuuina mai lana fesoasoani e ala i le faataga mai o le lafoga faamagalo, nai lo le tau tusi o se siaki ma tuu mai mo Amerika Samoa.

O le taimi nei, o loo galulue pea le alii kovana ma le alii faipule i le konekeresi ia Faleomavaega Eni, i le unaia o lenei mataupu ina ia mafai ai ona maua se isi auala e siitia ai tulaga o pisinisi i le atunuu.

O le talosaga a Amerika Samoa mo le lafoga faamagalo e pei ona taua e Togiola, ua leva ona taoto i le konekeresi, ae talu ai o lea ua amata a latou iloiloga e talanoaina ai mataupu mo tupe ma lafoga, ua mafua ai ona toe tuuina atu e le alii kovana le tusi e faamanatu ai le talosaga ua i ai.

Na taua e Togiola, o le isi lea auala o loo faa faigata ai ona faatosina mai pisinisi mai fafo i le teritori, o tulaga i lafoga e totogi.

O le isi maga o le talosaga a le alii kovana e pei ona ia taua, sa ia talosagaina ai le Failautusi o le Matagaluega o Setete a le malo tele i se vaitaimi ua fano, ina ia apalai foi ituaiga lafoga nei mo pisinisi Amerika o loo fia faatutu ni a latou lala i Samoa i Sisifo.

“Sa ou fai i le Failautusi, afai e mafai ona ave ni a latou pisinisi e faatutu ni latou lala i Samoa, o se tulaga taua lea mo Amerika Samoa, o le a maua ai galuega mo nai o tatou tagata iinei, e ui e le o aumaia sa’o i le teritori ia faamanuiaga, ae o loo maua ai galuega mo nai o tatou tagata,” o le saunoaga lea a le alii kovana.

I le taimi nei o lo’o faaauau pea iloiloga a le konekeresi i matau tau lafoga mo Amerika ae e le o iloa tonu, sona faaiuga