E lata i le to’a 20 alii ma tama’ita’i sa galulue i lalo o le polokalama lea na faatupe mai e le feterale, le National Emergency Grant (NEG), ua latou talosagaina se fesoasoani a le malo o Amerika Samoa, ona o le faafitauli ua feagai ma i latou, i le faamalolo mai a latou galuega e aunoa ma ni totogi.

O le faatonusili o le Matagaluega a Tagata Faigaluega a le malo ia Le’i Sonny Thompson ma sui o lona ofisa na faafeiloaia i latou o lo o aafia i lenei mataupu, i se fonotaga faapitoa sa faia i le potu fono a le Ofisa o Fefaatauaiga ma Alamanuia i le maota o le malo, le EOB i Utulei.

O le tamaitai ia Karalina Prendergast sa fai ma sooupu a i latou o lo o aafia i lenei mataupu.  I faamatalaga ua maua e le Samoa News o lo o taua ai e faapea, o i latou nei sa galulue i le A’oga Kuka a le malo (American Samoa Culinary Academy - ASCA), i lalo o le polokalama na faatupe e le NEG, ae i le masina o Ianuari 2013, na sui tulaga ai le kamupani a le Native Hawaiian Holding  Company/Community Investment Corporation (NHHC/CIC) i le puleaina ma le tauaveina o le totogi o tagata faigaluega nei.

Ua maea ona faailoa mai e le pule o le NHHC/CIC i le Samoa News e faapea, pau le latou galuega sa faia, o le tauaveina o faamaumauga mo le totogi o tagata, ae latou te le’i faa faigaluegaina tagata ma tuuina atu i lalo o le latou vaavaaiga.

Ae tusa ai ma faamatalaga a tagata faigaluega a le ASCA o lo o aafia, o lo o taua ai sa latou fonotaga sa faia ma le pule o le NHHC/CIC i se taimi ua mavae, lea na faailoa atu ai e faapea, o i latou lea ua tauaveina ma pulea le ASCA.

I le masina o Ianuari ina ua sui le kamupani e puleaina le ASCA, o iina na amata tulai mai ai le faaletonu ina ua amata ona faamalolo ni isi o tagata faigaluega nei e aunoa ma le faailoaina atu i ai o ni mafuaaga, faapea ai ma le le maua o ni a latou totogi.

Na taua e Prendergast i le fonotaga ananafi ma Le’i e faapea, sa i ai taimi na latou galulue ova taimi ai, peitai ina ua maua mai a latou totogi, e le o aofia ai ova taimi. O ni isi foi e na o le faatasi lava ona maua o latou totogi mulimuli, ae o isi totogi i luma atu e le’i maua.

Na taua e ni isi o i latou nei e faapea, o le agaga o lo o naunau i ai, ia mafai ona totogi i latou e tusa ai o galuega sa latou faatinoina.

O lo o taua foi e latou nei, o i latou sa i lalo o le faamalu a le NEG, ae i le masina o Setema 2012, na tuuina atu ai loa i lalo o le ASCA, i lalo o le taitaiga a le susuga ia Chef Sualua.

O le talitonuga foi i le faafaigaluegaina o tagata i lalo o le polokalame, e na o tagata lava ua lesitala i lalo o le NEG e mafai ona faa faigaluega, peitai o le faafitauli sa maitauina, ua faa faigaluega ai ma tagata e le’i aofia ilalo o le polokalame a le NEG, ae i le taimi lava fo’i lea e tasi,  sa amata ai loa ona faamalolo tagata faigaluega a le NEG e aunoa ma se mafuaaga tatau, poo le tuuina atu foi lea o se tusi e faailoa atu ai mafuaga o faaiuga ua faia.

Talu mai le masina o Ianuari e oo mai i le taimi nei, o ni isi o tagata faigaluega sa faamalolo sa totogi i le ta’i $40, ae o isi fo’i e ta’i $100, e aunoa ma le iloa poo fea e aumai ai tupe nei o lo o totogi ai latou.

Na taua fo’i e Prendergast e faapea, ina ua amata ona faamalolo tagata faigaluega, o iina na amata ai loa ona le lava le aufaigaluega, ma mafua ai loa ona galulue ova taimi ni isi o i latou, peitai ina ua oo atu i le taimi e fai ai totogi, ua aveese itula ova taimi ma ua tele suiga i taimi faigaluega ua faia i ai.