O le fa’afitauli i le le lava o faiaoga i nisi o aoga i le atunu’u, ua tu’ua’ia ai le Fa’atonu o le Matagaluega o Tagata Faigaluega a le malo, o ia ma lana matagaluega lea ua mafua ai lea faafitauli.Saunoa le alii faipule ia Taotasi Archie Soliai, e lata i le 50 avanoa faiaoga o lo o fa’atalitali pea i le taimi nei talu mai le masina o Setema 2011, peitai e lei faatutumuina lava ia avanoa.Na taua e Taotasi e faapea, i se latou fonotaga sa faia ma sui o le Matagaluega o Aoga a le malo, sa ia maua ai le ripoti lea i le manaomia o faiaoga mo nisi o aoga i totonu o lona itumalo, ae o le mafua’aga o le tuai atu o le fa’agaioiga o galuega a le Matagaluega a Tagata Faigaluega.Fai mai le alii faipule, e tusa ma le toa 1,500 le aofai o tagata faigaluega a le Matagaluega o aoga, peitai ua vave le faaitiitia ona o le toatele o i latou ua faamavae ae o isi ua malolo litaea.Sa fesiligia e le alii faipule le maota pe mafua aisea lenei faafitauli e ui o loo ia manino i auala e faagaioi ai le faa faigaluegaina o tagata faigaluega e le umi tele, peitai o le faafitauli lea ua aliali mai i avanoa faiaoga ua fai lava si umi, ma ua mafua ai foi ona tele le manaoga mo nisi faiaoga e faaopoopo atu i totonu o aoga o loo i ai le manaoga.Saunoa le afioga i le alii faipule ia Lemapu Suiaunoa Talo, o ia lea o le taitaifono o le komiti o Aoga a le maota o sui e faapea, o le tulaga lava foi lea e tasi sa ia mauaina mai i se latou fonotaga sa faia ma sui o le ofisa o aoga i le vaiaso na tea nei, e ui o loo i ai le avanoa e mafai ai e le Ofisa o Aoga a le malo ona faa faigaluega faiaoga i se auala faanatinati, peitai e le o manino o iai le mafuaaga ua ala ai ona tuai ona faataunuu lea tulaga.Saunoa Lemapu, e atagia mai i le faafitauli lea o lo o i ai pea se fa’aletonu i le fa’a faigaluegaina o tagata faigaluega a le malo pe afai e manaomia i se taimi vave.Sa ia laglagoina le finagalo o Taotasi i le manaomia o le vala’auina o le fa’atonusili o le matagaluega o tagata faigaluega a le malo, ina ia mafai ai ona malamalama le maota i le fa’afitauli o lo o tula’i mai, atoa ai ma le mafua’aga ua ala ai ona le mafai ona foia.O se tasi o faipule e masani ona ia lagaina le mataupu e uiga i aoga o lo o manaomia ni a latou faiaoga, o le alii faipule ia Faimealelei Allen mai le afioaga o Aua.Na taua e Faimealelei, na amata talosaga mai lava i le tausaga na tea nei ni faiaoga se toafa mo le Aoga Tulaga muamua i Aua, peitai e oo mai lava i le amataga o le tausaga nei e lei maua lava se fesoasoani.Na taua e le alii faipule e faapea, afai e faaauau pea ona tulai mai lea faaletonu, e ono aafia ai ma le aoaoina o fanau aoga.Na fautuaina e le afioga i le Fofoga Fetalai le taitaifono o le komiti o le Faagaioiga o le malo, ina ia taumafai e faatulaga se iloiloga ma le faatonusili o le matagaluega o tagata faigaluega a le malo, sei fesiligia e le maota e tusa ai o lenei mataupu.